WUKABYA wukowa ekinywe “ekirimu” ekikasa omw’amalengekania awu niki? Abangi bak’ikiriraya bathi ekinywe eki kikamanyisaya akandu akathulimu akathelhangirawa kandi akatheholha. Bakalengekanaya bathi wukabya wukaholha akandu akathelhangirawa aka kakalhua omwa mubiri neryo  ikathasya yabyaho. Kundi enyikirirya eyi yiyitsatsangire kutsibu, abangi bakasweka bak’igha ngokwa eki sikye Biblia yikakangiriraya nahake. Ibbwa kwesi, erisighikira n’Ekinywe kya Nyamuhanga, ekirimu niki?

Abasakangi be Biblia mubakolesya ekinywe ky’Ekihebrania ruʹach kutse ekinywe ky’Ekigiriki pneuʹma bakasakanga ebihambire okwa “kirimu.” Amasako iwuwene-wene akakanganaya ebinywe ebyo nga bikamanyisaya ki. Ng’eky’erireberyako, Yakobo 2:26 akakanganaya athi ‘omubiri owathe mw’ekirimu [pneuʹma] aholire. Kwesi, omw’isako eri, “ekirimu” kikamanyisaya akaghalha akakaleka omubiri inyabyaho. Hathe ekirimu, omubiri inyaholire. Omwa Biblia ekinywe ruʹach sikiri bindulhawa mwa “ekirimu” lisa, aliriryo kikathasya bindulhawa ‘ng’omuka w’engebe,’ kutse akaghalha k’engebe. Ng’eky’erireberyako, erisighikira n’Eribogha ly’amaghetse ery’obuthuku bwa Noa, Nyamuhanga mwabugha athi: ‘Ngaletha erighunga ly’amaghetse okwa kihugho, eriherya, ebyosi ebikahumulha ebiri n’engebe [ruʹach] omwisi wabyo eyikwa okwa buthuku.’ (Enzuko 6:17; 7:15, 22) Kwesi, “ekirimu” kikamanyisaya akaghalha akathelhangirawa akakaleka ebihangikwa ebyosi ibyabyaho.

Omubiri akayithagha ekirimu ng’eradio kwa yikayithagha amanda awali mw’omuliro​—nuku yanga bugha. Erisoborera eki kya ndeke, thalengekania okwa radio. Wukabya wamahira amanda w’omwa radio neryo wukabuyayo, omuliro owali omw’amanda akaleka eradio eyabugha. Aliriryo, eradio yithe mw’amanda siyanga bugha, yikabya ng’eyikwire. Kwabine bithya n’eyindi radio yamalhusibwa mw’amanda. Kuthya, ekirimu ni kaghalha akakaleka  emibiri yethu iyabya iyineho. Kandi, ng’omuliro owali omw’amanda, ekirimu sikiwithe ngokwa kikayowa kandi sikyanga thoka erilengekania. Ni kaghalha akathawithe emibere ng’ey’omundu. Aliriryo thuthe mw’ekirimu ekyo, kutse akaghalha ak’engebe, emibiri yethu ‘yikaholha, iyasuba okwa lhuthuthu olhwa yalhuamu’ ng’omusakangi w’Esyonyimbo kw’abugha.​—Esyonyimbo 104:29.

Akakania okwa lhuholho lhw’omundu, Omugambuli 12:7 hakabugha hathi: ‘Olhuthuthu [olhwa mubiri wiwe] lhukasuba okwa kithaka ngoku lhwabya, n’ekirimu kikasuba oku Nyamuhanga oyuwahakyo.’ Omughulhu ekirimu, kutse akaghalha k’engebe kakalhua omwa mubiri, omubiri akaholha n’erisuba ah’alhua​—okwa kithaka. Kuthya, akaghalha k’engebe kakasuba aha kalhua​—eyiri Nyamuhanga. (Yobu 34:14, 15; Esyonyimbo 36:9) Eki sikiri manyisaya kithi akaghalha k’engebe kwenene kakaghenda elhubulha. Aliriryo, kikamanyisaya kithi omundu oyukaholha, amaha wiwe aw’erithasyabana engebe omwa mughulhu owakayasa kikasighikira oku Nyamuhanga Yehova. Ni bugha ambu, engebe yiwe yiri omwa byalha bya Nyamuhanga. Erilhabira omw’akaghalha ka Nyamuhanga kasa, ekirimu kutse akaghalha k’engebe kangana thasya hebwa omundu nuku anga thasyabyaho.

Ka kikahumulikanaya eriminya indi eki kya Nyamuhanga akendi syakolha okw’abosi abakahumulikanira “omw’amasinda w’eryibuka”! (Yoane 5:28, 29, NW) Okwa buthuku bw’erilhubuka, Yehova akendi syakolera omundu oyughotsere omwa lhuholho y’omubiri muhya-muhya n’erisubya gho okwa ngebe omw’ihira mugho mw’ekirimu, kutse akalhagha  k’engebe. Obuthuku obwo ka bukendi syabya bw’obutseme bunene!

Wamabya wanzire eriminya bingi ebihambire okwa kinywe “ekirimu” ngoku kikakolesibawa omwa Biblia, wukendi bana omwatsi owakaghasa omw’akatabu Enzira Eyikakolhaya Okwa Ngebe y’Erikotha​—Wabiri Banayo? okwa lhupapura 12-14, n’okwa lhupapura 380-84 olhw’ekitabu Reasoning From the Scriptures, ebyosi bya sakawa n’Abema ba Yehova.