ABANDU abak’ikiriraya engangirirya ey’Obusathu bakabugha bathi Nyamuhanga ali mw’abandu basathu​—Thatha, Mughalha, n’Omulimu Abuyirire. Kikabughawa indi abasathu aba balingirirene, buli mughuma ni muthoki w’ebyosi, kandi syawithe nzuko. Neryo erikwamana n’engangirirya ey’Obusathu, Thatha ni Nyamuhanga, Mughalha ni Nyamuhanga, n’Omulimu Abuyirire ni Nyamuhanga, kandi ibbwa ihabya Nyamuhanga mughuma musa.

 Abangi abak’ikiriraya Obusathu bakaligha bathi sibangathoka erisoborera engangirirya eyi. N’omwa bine bithya, bangana yowa indi yikakangiriribawa erilhua omwa Biblia. Ni kibuya eriminya indi ekinywe “Obusathu” sikiri banika omwa Biblia. Aliriryo amalengekania aw’Obusathu akanabanika omwa Biblia? Erisubirya ekibulyo kino, thuthalebya erisako erya bakakolesaya mughulhu mungi erisighika Obusathu.

Yoane 1:1 hakakanaya hathi: ‘Okw’itsuka ly’erimbere Ekinywe kyabyaho, n’Ekinywe ekyo kyabya haghuma na Nyamuhanga, kandi Ekinywe ekyo kyabya Nyamuhanga.’ Enyuma waho omwa sura iya n’eyo, omukwenda Yoane akakanganaya ndeke-ndeke athi ‘Ekinywe’ ni Yesu. (Yoane 1:14) Aliriryo, busana n’Ekinywe eryahulhwa mwa Nyamuhanga, abandi bakaghunzerera bathi Omughalha haghuma na Thatha batholere eribya kitsweka ky’oku Nyamuhanga mughuma.

Wibuke indi akatsweka kano ak’omwa Biblia kasakangawa erimbere omwa Kigiriki. Enyuma waho, ababinduli mubabindulha erisako ery’Ekigiriki omwa yindi mibughe. N’omwa bine, ababinduli bangi abe Biblia, mubatha kolesya ‘Ekinywe kyabya Nyamuhanga.’ Busana naki? Erisighikira okw’iminya lyabu erya babya bawithe ngokwa Abagiriki babya bakasakanga e Biblia, ababinduli abo muba ghunzerera bathi ‘Ekinywe kyabya Nyamuhanga’ kibindulhawe omwa yindi nzira. Bathi? Eby’erireberyako bike bya bino: “Logos [Ekinywe] kyabya enyamuhanga.” (A New Translation of the Bible) “Ekinywe kyabya nyamuhanga.” (The New Testament in an Improved Version) “Ekinywe kyabya na Nyamuhanga kandi kyabya n’emibere ng’eyiwe.” (The Translator’s New Testament) Erikwamana n’esyombindulha esi, Ekinywe si Nyamuhanga iyuwene-wene. * Aliriryo, busana n’ekitsumbi kiwe eky’endatha kutsibu omwa bihangikwa bya Yehova, Ekinywe kikakanibawako nge “nyamuhanga.” Hanu ekinywe “nyamuhanga” kikamanyisaya “ow’obuthoki.”

Abandu bangi sibasi ngokwa Abagiriki basakanga e Biblia. Neryo wangaminya wuthi eky’omukwenda Yoane amanyisaya? Thalengekania okwa ky’erireberyako kino: Omusomesya w’erithendekero akasoborera abathendekwa biwe b’erisomo. Enyuma waho, abathendekwa ibabya n’amalengekania awali mbaghane ngoku bamayitheghererya  erisoborera eryo. Abathendekwa banga ghunza bathi obutsibu obu? Ibakendi bulya omusomesya erithasya basoborera ndeke. Ahathe erithika-thika, eriminya eyindi myatsi eyihambire okwa mwatsi oyu, ikikendi bawathikya eriyitheghererya erisomo eryo rya ndeke. Kuthya, eriyitheghererya Yoane 1:1 ng’akamanyisayaki, wangana lebya omwa Njiri ya Yoane eribana omwatsi mungi owahambire okwa kitsumbi kya Yesu. Eriminya eyindi myatsi okwa mwatsi ono, kikendi kuwathikya erihika okw’ighunzerera erihikire.

Ng’eky’erireberyako, thalengekania okwa ekya Yoane akathasya sakanga omwa sura 1, omulhondo 18: “Sihali mundu wabiril[h]angira Nyamuhanga [Muthoka w’Ebyosi] na kera.” Aliriryo, abandu babirilhangira Yesu, Omughalha, kundi Yoane akabugha athi: ‘Ekinywe ekyo mukyabya mundu, nayu mw’ikalha omwa kathi-kathi kethu. Nethu muthwalhangira olhukengerwa lhwiwe.’ (Yoane 1:14) Ibbwa, kyanga thokekene kithe Omughalha eribya kitsweka ky’oku Nyamuhanga Omuthoki w’Ebyosi? Kandi Yoane akabugha athi Ekinywe kyabya ‘haghuma na Nyamuhanga.’ Ibbwa kyanga thokekana kithi omundu eribya n’owundi mundu kandi inyabya iya n’omundu oyo? Eryongera okw’ekyo, ngoku kisakangire omu Yoane 17:3, Yesu akahiraho embaghane eyilhangirikire ahakathi-kathi kiwe na Thatha wiwe ow’elhubulha. Akahulha Thatha wiwe mwa “Nyamuhanga mug[h]uma w’ekwenene.” Kandi akaya ghunzerera Enjiri yiwe, Yoane omwa bikuhi akabugha athi: ‘Ebi bisakire imwathoka erikirirya Yesu kw’ali Kristo, Omughalha wa Nyamuhanga.’ (Yoane 20:31) Yitheghereraye indi Yesu akahulhawa mwa Mughalha wa Nyamuhanga, butsira Nyamuhanga. Eyindi myatsi eyi eyiri omwa Njiri ya Yoane yikakanganaya ngoku thutholere ithwa yitheghererya Yoane 1:1. Yesu, Ekinywe, ni “nyamuhanga” erimanyisya indi awithe ekitsumbi eky’endatha aliriryo sy’ingene-ngene na Nyamuhanga Omuthoki w’Ebyosi.

Thasyalengekanaya okwa ky’erireberyako ky’omusomesya ow’erithendekero n’abathendekwa. Thubughe thuthi abandi bakina thika-thika nomwakine indi babiri hulikirira erithasya soborera ery’omusomesya. Bangakolha ki? Ibakendi bulya owundi musomesya erithasya basoborera ndeke okw’isomo irya n’eryo. Omusomesya owakabiri amaghumya erisoborera ly’ow’erimbere, erithika-thika ery’abathendekwa bangi lyanganahwa. Kuthya, wamabya iwukathika-thikira ebyo omusakangi we Biblia ya Yoane akanaya ebihambire okwa bughuma obuli ahakathi-kathi ka Yesu na Nyamuhanga Omuthoka w’Ebyosi, wangana thasyasuba okwa wundi musakangi we Biblia  erithasya minya mwatsi mungi. Ng’ekyerireberyako, thalengekania okwa ebya Matayo asakanga. Erikwama n’enduli y’omughulhu mubi ono, akasuba omwa ebya Yesu abugha athi: ‘Nikwa sihali mundu wasi erihika ly’ekiro ekyo, kutse endambi eyo, n’omubangabya abamalaika b’elhubulha, kutse Mughalha, nikwa Thatha yunasi iyuwene.’ (Matayo 24:36) Ebinywe ebi bikaghumaya bithi ngoku Yesu si Nyamuhanga Omuthoki w’Ebyosi?

Yesu akabugha athi Thatha asi bingi kwilhaba ebya Mughalha asi. Aliriryo, Yesu kwalhwe kitsweka ky’oku Nyamuhanga Omuthoka w’Ebyosi, angaminyire ebya Thatha wiwe asi. Kwesi, Mughalha na Thatha sibang’ingana. N’omwa bine, abandi bangana bugha bathi: ‘Yesu abya w’emibere ibiri. Hano akakanaya ng’omundu w’omubiri.’ Aliriryo n’omukyangabere ikwakiri kithya, ibbwa n’omulimu abuyirire nu? Kwalhwe kitsweka ky’oku Nyamuhanga mughuma ya Thatha, busana naki Yesu syali bugha athi omulimu abuyirire asi ebya Thatha asi?

Wukendibya wuna mw’ongera erigha e Biblia, wukendi minya amasako mangi awali omwa Biblia awahambire okwa mwatsi oyu. Akaghumaya ekwenene eyihambire oku Thatha, Mughalha, n’omulimu abuyirire.​—Esyonyimbo 90:2; Emibiri 7:55; Abanya Kolosai 1:15.