ERISOMO 01

E Biblia Yanga Kuwathikya Yithi?

BUGHAYA

Hakuhi ithwe bosi thuwithe ebibulyo ebihambire okwa ngebe, eriaghalhwa, olhuholho, n’obuthuku obukasa. Kandi thukalengekanaya kutsibu oko myatsi ya buli kiro, ng’erisondekania amaisya kutse erianza eribya n’eka eyitsemire. Abangyi e Biblia yabiribawathikya eribana eby’erisubirya okwa bibulyo bikulhu-bikulhu omo ngebe n’eribaha amenge awanga bawathikya omwa ngebe ya buli kiro. Wukalengekanaya e Biblia yangana wathikya abandu?

1. E Biblia yikasubiraya oko bibulyo nga byahi?

E Biblia yikasubiraya oko bibulyo bikulhu-bikulhu bino: Engebe yatsuka yithi? Ekighendererwa ky’engebe ni kyahi? Busana naki abandu abatheko lhubanza ibaghalhwa? Omundu amaholha akaya hayi? Obuli mundu amabya inianzire obuholho, busana naki hali esyonyuhi? Ekihugho kikendibya kithi obuthuku obukasa? E Biblia yikathuhira mw’omuhwa w’erisondekania eby’erisubirya okwa bibulyo ng’ebyo, kandi esyomiliyoni sy’abandu babiribana eby’erisubirya ebyuwene.

2. E Biblia yanga thuwathikya yithi eritsemera engebe yethu ya buli kiro?

E Biblia yikathuha amenge awuwene. Ng’eky’erileberyako, yikakangiriraya amaka ngoku angabana etseme y’okwenene. Yikathuhabulha ngoku thwanga rwanisya ebirengekanio binene kandi ngoku thwanga tsemera omubiiri. Wukendi minya ebya e Biblia yikakangiriraya okwa myatsi eyi n’ebindi bingyi thuk’igha ekitabu kino kya haghuma. Eki kikendi leka iwaligha ngoku ‘Amasako wosi ali n’endundi.’—2 Timoteo 3:16.

Ekitabu kino sikirisuba omwa mwanya we Biblia. Aliwe, kikakuhira mw’omuhwa w’eriyithendya ndeke okwa Biblia. Neryo, thukakuhira mw’omuhwa w’erisoma amasako awakanganibwe omwa masomo aya n’erihambaniagho n’ebyo wunemwigha.

THASYIGHA BINGYI

Thulebaye e Biblia nga yabiriwathikya yithi abandu, ngoku wangatsemera erisomayo, kandi n’ekikaleka ikyabya ini kibuya erisaba obuwathikya bw’eriyitheghereryayo.

3. E Biblia yangana thusondolha

E Biblia yiri ng’ekyakakalha kinene. Thwangana kolesya e Biblia erithukangania ngoku thwanga thwamu ndeke n’erithuwathikya eriminya ebikendibya obuthuku obukasa.

Soma Esyonyimbo 119:105, mwanakania okwa bibulyo bino:

Omuhandiki w’olhwimbo olhu aby’awithe malengekaniaki okwa Biblia?
E Biblia wukalhangirayo wuthi?

4. E Biblia yangana subirya okwa bibulyo byethu

Omukali mughuma mwabana omwa Biblia mw’eby’erisubirya okwa bibulyo biwe ebyabya ibyabirimulyambya habw’emyaka mingyi. Mubughaye EVIDIYO, mwanakania okwa bibulyo ebikakwamako.

EVIDIYO: Isiwahwa Amaha! (1:48)

Omwa vidiyo, omukali oyu aby’awithe ebibulyo ebiri bithi?
Erigha e Biblia mulyamuwathikya lithi?

E Biblia yikathuhira mw’omuhwa w’eribulya ebibulyo. Soma Matayo 7:7, mwanakania okwa bino:

Ni bibulyo byahi ebyo wuwithe ebyo e Biblia yanga kuwathikya erisubirya?

5. Wangana tsemera erisoma e Biblia

Abandu bangyi bakatsemera erisoma e Biblia kandi yinemubaghasira. Mubughaye EVIDIYO, mwanakania okwa bibulyo ebikakwamako.

EVIDIYO: Erisoma e Biblia (2:05)

Omwa vidiyo, abalere bakayowa bathi okw’isoma?
Busana naki lino banzire erisoma e Biblia?

E Biblia yikabugha yithi yangana thuha obusondoli obwanga thuhumulikania n’erithuha amaha. Soma Abanya Roma 15:4, mwanakania okwa kibulyo kino:

Omulhaghe we Biblia ow’erithuhumulikania n’erithuha amaha akanakutsemesaya?

6. Abandi bangana thuwathikya eriyitheghererya e Biblia

Eryongera okw’iyisomera e Biblia, abangyi babirilhangira ngoku ni kikulhu abandi eribawathikya eriyitheghereryayo. Soma Emibiri 8:26-31, mwanakania okwa kibulyo kino:

Thwanga yitheghererya thuthi e Biblia?—Lebaya omulhondo 30 na 31.

Omulhume Omuetiopia mwayithagha oyukendi muwathikya eriyitheghererya Amasako. Abangyi munabwire babirilhangira ngoku ni kikulhu abandi eribawathikya eriyitheghererya e Biblia

ABANDI BAKABUGHA BATHI: “Erigha e Biblia ni tsandya buthuku.”

Iwe wanga bugha wuthiki? Busana naki?

OMWA BIKUHI

E Biblia yikaha amenge aw’erighenderako omo ngebe yethu ya buli kiro, yikasubiraya okwa bibulyo bikulhu-bikulhu, n’erihumulikania abandu n’eribaha amaha.