Nomumwanga lengaho muthi eribya n’etseme omw’eka, ekya muthayitsulirye kyanganabya ikyaleka ikyabakalira eribya imune n’etseme. (Omugambuli 9:11) Omwa lhwanzo, Nyamuhanga akathuwathikaya omughulhu thukabana ebitsibu. Wamaghendera okwa misingyi ye Biblia eyiri ahikwa eno, iwe n’eka yawu imukendi thoka erighumira n’ebitsibu ebikalire kutsibu.

EKYA BIBLIA YIKABUGHA: ‘Muhire erihangya-hangya lyenyu lyosi oko Mwami Mukulhu, kusangwa akabatheghaya.’ (1 Petero 5:7) Ambi iwabya iwun’ibukire ngoku Nyamuhanga yuthekulengako. (Yakobo 1:13) Wukendibya wunemuyithunda hakuhi nayu, akendi kuwathikya omwa nzira yosi-yosi eyitholere. (Isaya 41:10) ‘Mumubwire amalighe wenyu wosi.’—Esyonyimbo 62:8.

Kandi n’ekindi ekikendi kuhumulikania ly’erisoma n’erigha e Biblia buli kiro. Eki kikendi leka iwayilhangirira ngoku Yehova ‘akathukiranaya omwa malighe wethu wosi.’ (2 Abanya Korinto 1:3, 4; Abanya Roma 15:4) Akayilhagha erikuhererya ‘obuholho bwa Nyamuhanga obulengire amenge wosi.’ —Abanya Filipi 4:6, 7, 13.

EKYA WANGA KOLHA:

• Saba Yehova y’obuwathikya obw’eribya iwunathekene n’erilengekania ndeke

• Lengekanaya ndeke okwa bya wukanza erikolha wana sombolha kw’ekyuwene

EKYA BIBLIA YIKABUGHA: ‘Omuthima w’omugherekania akabana eriminya; n’okuthwe kw’ow’amenge kukasonda-sondaya eriminya.’ (Emisyo 18:15) Yitheghereraye ndeke omwatsi. Lebaya obuli mundu omw’eka ng’akayithaghaki. Kanaya nabu. Bahulikirire ndeke.—Emisyo 20:5.

Kandi ibbwa wamawa kw’olhuholho? Isiwubaha erikangania ku wukayowa. Wibuke ngoku Yesu nayu “mwalira.” (Yoane 11:35; Omugambuli 3:4) Kandi ni kikulhu eribana endambi y’erilhuhuka n’erighotsera ndeke. (Omugambuli 4:6) Eki kikendi leka ikya kwolhobera erighumira obulighe obuliho.

EKYA WANGA KOLHA:

• Ibya n’omubere w’erikanirania n’ab’eka yawu n’omughulhu hathe ekitsibu. Eki ikikendi leka ibayowa buholho erikania nawu omughulhu hali ekitsibu

• Bulhaya n’abandi abangabya ibanawire kw’ekitsibu ng’eki

EKYA BIBLIA YIKABUGHA: ‘Omwira akanza emighulhu yosi, kandi ni mughalha wabu oyukabuthawa busana n’obulighe.’ (Emisyo 17:17) Banywani bawu bakabya ibananzire ibakuwathikya, aliwe banganabya isibasi nga bakuwathikaye bathi. Isiwaghana eribabwira ekya wukayithagha. (Emisyo 12:25) Kandi saba obuwathikya bw’obunyakirimu okw’abasi Amasako. Erihabulha erya banga kuha erilhua omwa Biblia lyangana kuwathikya.—Yakobo 5:14.

Wukendi bana obuwathikya obwa wukayithagha omughulhu wukahindana mughulhu wosi n’abandu ab’ikirirye Nyamuhanga n’eriyikethera emilhaghe yiwe. Kandi ikikendi kuhumulikania kutsibu wamawathikya abandi abakayithagha erihiribwa mw’amani. Babwira okw’ikirirya lyawu erya wuwithe omu Yehova n’emilhaghe yiwe. Kolha kutsibu eriwathikya abali n’obuyithawa, kandi isiwayisolholha okwa bakwanzire n’erikutsomana.—Emisyo 18:1; 1 Abanya Korinto 15:58.

EKYA WANGA KOLHA:

• Yihanuzaye okwa munywani wawu kandi leka akuwathikaye

• Bugha ekyo nyine-nyine ekikakuluma