Ngoku wabir’igha omwa katabu kano, e Biblia yiri mw’amahano mangyi awanga kuwathikya iwe n’eka yawu. Yehova anzire iwatsema. Akayilhagha athi mwamahira eriramya liwe ly’embere, iniakendi ‘syabaha ebindu byosi ebi.’ (Matayo 6:33) Anzire iwabya munywani wiwe. Kolesaya obuli kaghisa kosi-kosi erikulha-kulhania obughuma bwawu na Nyamuhanga. Olhu lhw’olhusunzo olhulengire olhwa mundu angahebwa.—Matayo 22:37, 38.

EKYA BIBLIA YIKABUGHA: ‘Nasyabya thatha wenyu, nenyu mwasyabya baghalha baghe na bali baghe,’ Yehova athya. (2 Abanya Korinto 6:18) Nyamuhanga anzire imwabya banywani biwe b’okwa ndungu. Enzira nguma y’erikolera mw’eki ly’erisaba. Yehova akabugha athi ‘musabe buthumbya.’ (1 Abanya Tesalonika 5:17) Anayitheghekire erihulikirira ebibali okwa muthima. (Abanya Filipi 4:6) Wamasaba haghuma n’ab’eka yawu, ibakendi lhangira ngoku wuyikethere kutsibu Nyamuhanga.

Eryongera okw’ikania na Nyamuhanga, mutholere imwa muhulikirira. Mwangana kolha eki omw’isoma Ekinywe kiwe n’erisoma ebitabu ebiseghemere okwa Biblia. (Esyonyimbo 1:1, 2) Mughaniraye okwa bya muk’igha. (Esyonyimbo 77:11, 12) Erihulikirira Nyamuhanga mwamuli n’erihindana mughulhu wosi okwa mihindano y’Ekikristayo.—Esyonyimbo 122:1-4.

Eribwira abandi oku Yehova ni yindi nzira nkulhu ey’erikamathirya mw’obughuma bwenyu nayu. Mukabya muk’ongera erikolha eki, kwa mukan’ongera muthya eriyowa imuli bughuma nayu.—Matayo 28:19, 20.

EKYA MWANGA KOLHA:

• Muhire h’obuthuku obw’erisoma e Biblia n’erisaba buli kiro

• Inywe ng’eka muhire emibiiri y’obunyakirimu y’embere okwa by’eriyitsemesya

EKYA BIBLIA YIKABUGHA: ‘Muyithunde hakuhi na Nyamuhanga, nayu akendi yithunda hakuhi nenyu.’ (Yakobo 4:8) Mutholere imwahira h’endegheka ey’eriramya ly’eka n’erikwama-kwamaniayo. (Enzuko 18:19) Aliriryo isiwasubuliraho. Nyamuhanga atholere iniabya omwa ngebe yawu buli kiro. Kamathaya obughuma bw’eka yawu na Nyamuhanga omw’imukaniako ‘omughulhu wikere omwa nyumba yawu, n’omughulhu wukalendera omwa nzira, n’oko mughulhu wukaghotsera, n’omughulhu wukabuka.’ (Eryibuka Ebihano 6:6, 7) Kolha mwa kilhubirirwa kyawu eribya nga Yosua, oyuwabugha athi: ‘Nikwa ingye n’ekithunga kyaghe, thwasyakolera Yehova.’—Yosua 24:15.

EKYA WANGA KOLHA:

• Hira h’endegheka ey’erikangirirya ey’erikwama-kwamania eyanga wathikya obuli mundu omw’eka