Iwe n’omwanze wawu mukendibya mukatsuka obutheke bwa haghuma, hakendi buthuka ebitsibu muthina-muthina. Byanganasa busana n’erithendi hambangana omwa malengekania, eriyowa, n’emibere eya mukakolera mw’ebindu. Kutse ibyanganasira handi, kutse busana n’ebikabya kitsumbukirania.

Hanganayira iwanza eribisama okwa bitsibu byawu, aliriryo e Biblia yikathuhabulha yithi ambi ithw’imanirabyo. (Matayo 5:23, 24) Erighendera okwa misingyi ye Biblia ky’ekyanga kuwathikya ndeke erighunzaho ebitsibu byawu.

EKYA BIBLIA YIKABUGHA: ‘Hali omughulhu w’eribugha.’ (Omugambuli 3:1, 7) Mulhangire muthi mukabana obuthuku obukaghunza erikania okwa kitsibu. Leka omwanze wawu aminye ndeke ngoku wukayowa kandi n’ekya wukalengekanaya okwa mwatsi oyo. Mughulhu wosi ‘bugha eby’ekwenene’ n’omwanze wawu. (Abanya Efeso 4:25) Nomuwanga hithana kutsibu, isiwabulikira wukalhwa. Erisubirya iwunahumulikene lyangana leka ebya mukakanayako imuthalhwiririra amalhwa.—Emisyo 15:4; 26:20.

Nomuhangabya erithendi lighirana, ibya iwune w’olhukogho, kandi isiwibirirawa erikangania omwanze wawu y’olhwanzo n’erisikya. (Abanya Kolosai 4:6) Mulengeho erighunza h’ekitsibu omwa byalhuba, kandi isimwalekera aho erikanirania.—Abanya Efeso 4:26.

EKYA WANGAKOLHA:

• Muhire h’obuthuku obutholere obw’erikania okwa kitsibu

• Yamabya ini ndambi yawu y’erihulikirira, isi wabughira omwa wundi. N’eyawu ndambi yikendi hika iwakania

EKYA BIBLIA YIKABUGHA: ‘Mwanzane kutsibu ng’abasubeneko. Mukengane n’eribya n’omuthima ow’erisikya abandi.’ (Abanya Roma 12:10) Ni kikulhu erihulikirira ndeke. Omwa lhwanzo kandi iwunayikehirye, lengaho eriyitheghererya eky’omwanze wawu akabugha. (1 Petero 3:8; Yakobo 1:19) Isi wayilingiriranaya nga wune muhulikirira. Kyamathokekana, thatsuka erileka ebya wuliko wanahulikirira ndeke omwanze wawu, kutse mubulhaye nga mwangana kikaniako eyindi ndambi. Wamalhangira omwanze wawu ng’omunywani, butsira ng’oyuwanzire erikuhakanisya, isi wendi anguha okw’ihithana.—Omugambuli 7:9.

EKYA WANGAKOLHA:

• Ebya wukowa nomubyangabya isibiri kutsemesaya, lholha embere erihulikirira iwunanzire eriyitheghererya

• Hulikirira enzumwa eyiri omwa binywe biwe. Yitheghereraye ng’amayithwa athi, n’omulenge owakakolesaya

EKYA BIBLIA YIKABUGHA: ‘Omw’ikolha lyosi muli endundi; nikwa erikania ly’eminywe likaletha erithalya.’ (Emisyo 14:23) Sikirighasa erilighirana okwa mwatsi, kandi wukathendi kolha ngoku mulyahanulha. Eki kyangana yithaghisya erihiraho akaghalha kanene, aliriryo sikalikwa busa. (Emisyo 10:4) Mwamakolha haghuma ng’abanywani, imukendi bana ‘olhuhembo olhuwene’ busana n’akaghalha kenyu ako.—Omugambuli 4:9.

EKYA WANGAKOLHA:

• Muhireho ebya buli mundu anga kolha ebitholere, ebyanga bawathikya erighunzaho ekitsibu

• Mubye imunemulebya nga binemuwathikya