Yehova akathuhana athi: ‘Isimwakolha amathebo.’ (Malaki 2:16) Eki kikayithaghisibawa kutsibu-tsibu omwa butheke bwawu, kundi ahali amathebo sihalibya eriyiketherana. Kandi eriyiketherana likaleka ihabya olhwanzo.

Munabwire, obuyisiwa bunemwasa bukabulha omwa butheke. Eritheya obutheke bwawu, wutholere iwahira h’akaghalha erikolha ebindu bibiri.

EKYA BIBLIA YIKABUGHA: ‘Muminye ndeke eby’omughaso munene kutsibu.’ (Abanya Filipi 1:10, NW) Obutheke bwawu ni kighuma ky’okwa bindu by’omughaso munene kutsibu omwa ngebe yawu. Butholere ibwahirwa embere.

Yehova anzire iwahira amalengekania w’okwa mwanze wawu n’eritsemera haghuma omwa ngebe. (Omugambuli 9:9) Akakikanganaya ndeke-ndeke ngoku siwutholere wukaghalhaghandya omwanze wawu, aliriryo ngoku mutholere inywe bosi imwalebya ku mwanga tsemesania. (1 Abanya Korinto 10:24) Leka omwanze wawu ayowe iwukamuyithagha n’erisimwa.

EKYA WANGAKOLHA:

• Lhangira wuthi wukabya iwunemubana obuthuku obw’erisiba haghuma n’omwanze wawu, kandi iyuwanahwerya kw’amalengekania wawu wosi

• Ibya n’amalengekania awa “ithwe” butsira awa “ingye”

EKYA BIBLIA YIKABUGHA: ‘Obuli mundu oyukasamalira omukali n’engumbu nyibi iniamabirisingira nayo omwa muthima wiwe.’ (Matayo 5:28) Erithwalira haghuma, omundu amabera erilengekania okwa by’obutswatswa, akabya isyakiri muyisiwa okwa mwanze wiwe.

Yehova akabugha athi wutholere ‘iwatheya omuthima wawu.’ (Emisyo 4:23; Yeremia 17:9) Erikolha eki, wutholere iwatheya ameso wawu. (Matayo 5:29, 30) Kwama eky’erileberyako kya thathakulhu Yobu, oyuwakolha endaghane n’ameso wiwe athi syanga samalira owundi mukali omwa ngumbu nyibi. (Yobu 31:1) Kibye kilhubirirwa kyawu erithendi lebya nahake eby’obutswatswa. Kandi lhangira wuthi wukayihighulha okw’iyanzirirya okw’oyuthe mwanze wawu.

EKYA WANGAKOLHA:

• Leka abandi balhangire ngoku olhwanzo lhwawu ni lhw’omwanze wawu musa

• Tsomana eriyowa ly’omwanze wawu, n’erilhangira wuthi wukalhua iwathwa obunywani obwanga leka omwanze wawu iniathayowa ndeke