Yehova akendi syalhusiryaho ighuma obubi obwosi obwa Sitani abirikolha. Yehova abirikolha Yesu mwa Mwami ow’ekihugho kyosi. Omwa buthabali bwiwe, ekihugho kyasyahindulhwa mwa paradiso.​—Danieli 7:13, 14; Luka 23:43.

Yehova akalhaghanisaya ebindu bino:

• EBYALYA BYASYAKANYA: ‘Ekithaka kyasya hulhukya byalya bingi; Yehova, Nyamuhanga wethu, asya thutsumulha.’ ‘Hasyabya byalya bingi ebyumire okwa kithaka; okwa bithwe kwasyosulha ebyalya.’​—Esyonyimbo 67:6; 72:16, NW.

• SIHENDI SYASWABYA NYUHI: ‘Mwase, mulebaye emibiiri Yehova abirikolha! mulebaye emyatsi y’eriswekera ey’abirikolha omwa kihugho kyosi! Akakubaya esyonyuhi omwa kihugo kyosi.’​—Esyonyimbo 46:8, 9.

• ABANDU BABI SIBAKIRIHO: ‘Kusangwa abakolha nabi basyahiwa. Omwa kandi kathambi, ababi basya bulirana, inga, wasyasondya omwanya wabo, isibendisyabyaho.’​—Esyonyimbo 37:9, 10.

• ENDWALHA, OBULIGHE, KUTSE OLHUHOLHO SIBIKIRI: ‘N’okwa mughulhu oyo ameso w’esyandimethime asyalibulhwa,  n’amathwe w’abatsiha asyahundukalha. Oko mughulhu oyo omulema asyathwa ebika ng’engabi, n’olhulimi lhw’erikiru lhwasutha obwogho obw’obutseme.’​—Isaya 35:5, 6.

  ‘Kandi Nyamuhanga asyabya haghuma nabo. Kandi akendisyasangulha emisoni yosi okwa meso wabo, kandi olhuholho silhwendisyaswabyaho, erisusumana, kutse eririra, kutse eriagalhwa. Emyatsi y’erimbere yabirirenga.’​—Eribisulirwa 21:3, 4.

Yehova syalikanaya mabehi nga Sitani n’esyambinga. Ebyosi ebyakalhaghanisaya bikendi syabererera. (Luka 1:36, 37) Yehova akwanzire kandi anzire wusyikalha omwa Paradiso eya kendi syakolha. Busana nekyo banangana n’Abema ba Yehova erigha bingi okwa kwenene ey’eriswekerya eyikasangawa omwa Kinywe kya Nyamuhanga. Wamakolesya ekwenene omwa ngebe yawu, iwukendibya bwiranda erilhwa okwa bukobe obw’amabehi, emirwa, kandi n’okwa buthaminya. N’enyuma waho, wasyaboholhwa okwa bukobe obw’ekibi n’olhuholho. Nga Yesu kwabugha: ‘Mwasyaminya ekwenene, n’ekwenene yasyabaha obwiranda.’​—Yoane 8:32.