Emirimu yineho! Omw’ithwale ery’emirimu eyithelhangirawa, muli emirimu eyuwene n’emirimu mibi. Aba b’abandu ababyaho neryo baholha okwa kihugho?

Eyihi, sibo. Omughulhu omundu akaholha, syali thasyaya omwa kihugho eky’emirimu, abangi kwa bakalengekanaya bathya. Thukaminya eki kya thuthi? Kusangwa e Biblia kwa yikabugha yithya. E Biblia kya kitabu eky’ekwenene ekikalhwa oku Nyamuhanga eyuwene, oyukahulhawa mwa Yehova. Yehova oyo wahangika abandu; yuwasi ndeke-ndeke ekikahika okw’ibo omughulhu bakaholha.​—Esyonyimbo 83:18; 2 Timoteo 3:16.

E Biblia yikabugha yithi Nyamuhanga mwabumba Adamu, omulhume w’erimbere, ‘omwa lhuthuthu lhw’ekithaka.’ (Enzuko 2:7) Nyamuhanga mwamuhira omwa Paradiso, eririma erya Edeni. Adamu alitheghaya ebihano bya Yehova, syangaholire; angabere inyakineho okwa kihugho munabwire. Aliriryo omughulhu Adamu athwa ekihano kya Nyamuhanga omwiyiririra, Nyamuhanga mwabugha nayo athi: ‘Wasyasuba okwa kithaka, kusangwa walhusibawa omwa lhuthuthu. Kandi wuli lhuthuthu n’akandi wasyasuba omwa lhuthuthu.’​—Enzuko 3:19.

Eki kikamanyisaya ki? Ibbwa, Adamu abyahayi Nyamuhanga athali amubumba erilhwa omwa lhuthuthu? Syabyaho. Syabya mulimu elhubulha owathali abuthwa. Abya isyali athabyaho. Busana nekyo omughulhu Yehova abwira Adamu ngokwa anga “subire okwa kithaka,” amanyisaya athi Adamu anga holire. Mwatha kyurukira omw’ithwale  ly’emirimu. Omwa lhuholho, Adamu angabere isyakiwithe ngebe, isyangathasyabyaho. Olhuholho ry’eribya isiwuli na ngebe.

Ibbwa biri bithi okw’abandi ababiri holha? Nabo si bakiriho? E Biblia yikasubiraya:

• ‘Abosi abandu n’ebisoro bakaya haghuma. Abosi balhusibawa omwa lhuthuthu, n’abosi bakahinduka mwa lhuthuthu.’​—Omugambuli 3:20.

• ‘Abaholi sibasiki.’​—Omugambuli 9:5.

• ‘Olhwanzo n’erihali n’omuhwa wabu byabiri-biriranwa.’​—Omugambuli 9:6.

• ‘Siyiri mubiiri, kutse eritheghekania, kutse amenge, omw’isinda, eyo wukaya.’​—Omugambuli 9:10.

• ‘Omundu omughulhu akaholha akasuba okwa kithaka; ebirengekanio biwe byosi bikahwa.’​—Esyonyimbo 146:4.

Wukana bana Amasako aya ng’akalire er’ikirirya? Kyamabya ikwakiri kithya, thalengekania:  Omwa maka mangi, omulhume akakolha esyombulho busana n’eriwathikya erihiika liwe. Omughulhu omulhume amaholha, eka yiwe yik’aghalhawa. Owundi mughulhu wukasangana omukali n’abana biwe ibabya isibakiwithe esyombulho esyangaghulha ebyalya. N’obundi esyanzighu esy’omulhume esyabya sika balyambya. Hathya thayibulhaya: ‘Omulhume alyabya inyaneho omwa kihugho ky’emirimu, busana naki syalibya inyanamuwathikya abeka yiwe? Busana naki syalibatheghaya okwa bandu babi aba?’ Ni kusangwa amasako ahikire. Athi abaholi sibawithe ngebe, sibanga thoka erikolha ekindu kyosi-kyosi.​—Esyonyimbo 115:17.

Obo eki kikamanyisaya kithi abaholi sibendiswasyabya n’engebe kwehi? Eyihi, kwakithe kithya. Thukendi kania okw’ilhubuka okwa yindi ndambi. Aliriryo kikamanyisa kithi abaholi sibasi ebyo wukakolha. Si bangakulhangira, eryowa ebyo wukabugha, kutse erikania nawu. Si wutholere eribasagha. Sibanga kuwathikya kutse erikwaghalya.​—Omugambuli 9:4; Isaya 26:14.