Aliriryo busana naki Sitani n’esyombinga siwe bakakolha n’akaghalha eritheba abandu? Kusangwa bakanza thusangire nabo omwi yisamambulha lyabu. Bakanza thubaramaye. Bakanza thwikiriraye amabehi abo n’erikolha ebindu ebyo Yehova athanzire. Ebingi eby’okwa mikolere eyi mwamuli emitse eyihambangene okwa mirwa y’abaholi.

Olhuholho olhw’omwanze lhukitha obulighe, kandi nikya bulikiro, kitholere nibya eririra. “Yesu mwalira” omughulhu munywani wiwe Lazaro aholha.​—Yoane 11:35.

Hali emirwa mingi eyihambangene okwa lhuholho, kandi yikahinduka erisighikira n’emibere ey’abandu. Emingi kuyo si yirighanibawa ne Biblia. Okwa lhundi lhuhandi, eyindi mitse yika lhwiririra omw’ibugha bathi abaholi baneho kandi bangana lhangira abaliho. Erikesya okwa kitsitsi omwa buthalha, erisusumana erithehwa, n’erithasyasesya olhuholho kutse erighemberwa abaholi, ebyosi ebi bilhwire omw’isagha erihithania emirimu ey’abaholi. Aliriryo kundi abaholi “sibasiki,” abo abakakolha ebindu ng’ebi baka kulhakulhanaya amabehi a Sitani.​—Omugambuli 9:5.

 Eyindi mitse kutse emibalha yika lhwiririra omwa nyikirirya ey’eribugha ambu abaholi bakayithagha obuwathikya erilhwa okw’abaliho kandi ibakendi huthalya abaliho bamathendibaha obuwathikya obo. Omwa bindi bihugho, emibalha n’erihonga bikakolhawa omwa biro 40 kutse enyuma w’ekirimo kighuma omundu aholire. Ebi bika lengekanibawa eribugha bathi bikawathikaya omuholi ‘erikyurukira’ omw’ithwale ly’ebirimu. N’oghundi mutse ow’asibwe ly’erihongera abaholi b’ebyalya n’eby’erinywa.

Ebindu ebi ni bibi kusangwa bikakulha-kulhanaya amabehi a Sitani okwa baholi. Yehova anganathusima thwamakolha emirwa yosi-yosi eyihambangene n’engangirirya ey’esyombinga? Eyihi na hake!​—2 Abanya Korinto 6:14-18.

Abaghombe ba Nyamuhanga ab’ekwenene sibangaghabana omwa mitse eyikahamiraya amabehi wa Sitani. Aliriryo, omwa lhwanzo bakatsukumirira eriwathikya abaliho n’eribahumulikania. Bakyasi indi omundu amabiriholha, Yehova musa yuwangawathikya  omundu oyo.​—Yobu 14:14, 15.

Abandi bakakolhangana n’esyombinga kutse erilhabira omwa musaki. Eki ky’ekikahulhawamo obukumu. Obulhoyi, erilhaghulha, obusaki, eribandwa, erilhaghulirya ebithu, n’eribulirirya okwa baholi ebyosi ebi ni bukumu.

E Biblia yikathanga ebyosi ebi, yikabugha yithi: ‘Simusyebanika kw’omundu oyukalhabaya mughalha wiwe kutse mwali wiwe omwa muliro, n’oyukakolha obulhaghu, oyukalhaghuliraya ebithu, kutse omukumu, kutse omulhoyi, kutse omusaki, kutse oyukakanaya na balimu, n’oyukabirikira abaholi. Kusangwa omundu oyukakolha emyatsi eyi ni nye oku Yehova.’​—Eryibuka 18:10-12.

Busana naki Yehova akathukunga kutsibu okwa mitse eyi?

Busana n’erianza thubye n’amaghalha mabuya, Yehova  akathukunga okw’obuli mulingo wosi ow’obukumu. Anzire abandu n’eribatsomana, kandi anasi ngokwa abo abakakolhangana n’esyombinga ibakendiaghalhwa.

Omundu oyuwabya athya, ni Nilda owe Brazil, oyuwabya musaki. Esyombinga musyamukolha muwa olhulighe-lighe. Akabugha athi: “Abalimu . . . mubanyikolha mwa musire, erinyithwalha eyi n’eyi. Ininga holha ingana musuba, kandi munatalibana kw’omuthwe. Esyombinga musyanyihigha-highania kutsibu erihika eribya ng’omusire. Munamera ebinini ebikahumulikanaya n’erighotserya kandi munatsuka erinywa obwabu n’erihulhulira ethaba. Eki muna kikolha ahabwa birimo bingi.”

Obuthuku mubwahika, busana n’obuwathikya bwa Yehova n’Abema biwe okwa kihugho, Nilda mwayihighulha okwa syombinga kandi hathya awithe amaghalha awuwene, aw’akatsemesaya. Akabugha athi: “Nga wathikaya abosi n’eribahira mw’omuhwa indi isibalengesaya na hake eriyingirya omwa myatsi y’emirimu [mibi].”