Sitani n’esyombinga siwe sibendi syaswatheba abandu mughulhu mungi. Yehova abiri baghusa erilhwa omwa lhubulha. (Eribisulirwa 12:9) Omughulhu owa kasa, Nyamuhanga akendi tswera Sitani n’esyombinga siwe. Akalhothesibwa na Nyamuhanga, omukwenda Yoane mwabugha athi: ‘Neryo munalhangira omumalaika akandaghalha akalhwa elhubulha, inyawithe ekiboholi ky’obuhya, n’obuhulhulha bunene omwa byalha biwe. Neryo mwatsimba ekiyoka ekyo, enzoka eyo ya kera, oyuli Diabolo kandi Sitani, neryo mwabohayo ahabwa ebirimo rukumi (1,000). Kandi mwaghusayo omwa buhya obuthawithe kabuno, neryo mwaliba obuhya obo n’erihira kubo kw’omuwatho, siyithebe ebihanda kandi erihika aho ebirimo rukumi (1,000) byasyahwera.’ (Eribisulirwa 20:1-3) Enyuma waho, Diabolo n’esyombinga siwe bakendi syathoghothibwa kera na kera.​—Eribisulirwa 20:10.

Abandu babi abali okwa kihugho nabo bakendi syathoghothibwa.​—Esyonyimbo 37:9, 10; Luka 13:5.

Sitani n’esyombinga bakendibya babiri thoghothibwa, Yehova akendi letha emighisa mingi okwa bandu. Wibuke wuthi abaholi sibawithe engebe, sibaliho. Yesu mwalinganisya olhuholho ng’othulho—othulho thunene othuthe kw’erilhotha. (Yoane 11:11-14) Akolha ekyo kusangwa mwaminya obuthuku bwangasire omughulhu abali omwa thulho thw’olhuholho bangalhwire mutho ibasuba okwa ngebe. Mwabugha athi: ‘Endambi yikasa, okw’omughulhu oyo, abosi abali omw’amasinda basyalhwa omw’amasinda wabo.’​—Yoane 5:28, 29; linganisaya Emibiri 24:15.

Basyahebwa engebe hano okwa kihugho. Omw’omwanya w’eriranga bathi abandu babiri holha, eriranga erikatsemesaya lyathwasyowa erikaranga abamalhubukira engebe! Yasyabya tseme yingahi eriangirira abanze bethu abakalhwa omwa masinda!