Omuhangiki wethu athulengirye amenge. Nga Thatha w’olhwanzo, akathutheghaya. Kandi mwathathuhangika ithwe eriyithabalhako. (Yeremia 10:23) Ngoku omwana akayithagha obusondoli bw’ababuthi, ithwe abosi thukayithagha obusondoli bwa Nyamuhanga. (Isaya 48:17, 18) Obusondoli obuli omwa Biblia ni kihembo ekikalhua oku Nyamuhanga.​—Soma 2 Timoteo 3:16.

Ebihano bya Yehova n’emisingyi yiwe bikathukangiriraya enzira mbuya ey’erikwama omwa ngebe lino kandi ngoku thwangabana emighisa yithabahwa omwa buthuku bw’embere. Kundi Nyamuhanga yuwathuhangika, ni ky’amenge erikwama ndeke obusondoli bwiwe.​—Soma Esyonyimbo 19:7, 11; Eribisulirwa 4:11.

Emisingyi ye Biblia y’ekwenene eyathukaghenderako buthuku bwosi. Aliriryo Ebihano bikakolha okwa buthuku bulebe. (Eryibuka Ebihano 22:8) Thutholere ithwakolesya amaaka wethu aw’erilengekania eriminya ngoku omusingyi we Biblia akakolha omwa mibere mirebe. (Emisyo 2:10-12, NW) Ng’eky’erileberyako, e Biblia yikakangiriraya yithi engebe ni kihembo erilhua oku Nyamuhanga. Omusingyi ng’oyu angana thusondolha ithune aha thukakolera, ithun’eka, n’omughulhu thuli omwa lhughendo. Akaleka ithwa yitheya okw’iyihuthalya.​—Soma Emibiri 17:28.

Yesu mwakania okwa misingyi mikulhu-mikulhu ibiri. Ow’erimbere akakanganaya ekighendererwa ky’engebe—eriminya Nyamuhanga, erimwanza, n’erimukolera buthaleghulha. Thutholere ithwalengekania okwa musingyi oyu omw’ithwamu lyethu eryosi-ryosi. (Emisyo 3:6) Abakaghendera okwa musingyi oyu bakabya banywani ba Nyamuhanga, ibabya  n’etseme ey’ekwenene, kandi bakendi syabana engebe y’erikotha.​—Soma Matayo 22:36-38.

Omusingyi wakabiri akaleka ithwathoka eribya bughuma n’abandi. (1 Abanya Korinto 13:4-7) Erikolesya omusingyi owakabiri oyu mwamuli erigherererya Nyamuhanga ngoku akathwalha abandu.​—Soma Matayo 7:12; 22:39, 40.

Emisingyi ye Biblia yikaleka amaka iniabya mw’olhwanzo. (Abanya Kolosai 3:12-14) Ekinywe kya Nyamuhanga kikathasya theghaya amaka omw’ikangirirya owundi musingyi owakakanganaya ngoku obutheke sibutholere bukathwika.​—Soma Enzuko 2:24.

Erighendera okwa biri omwa Biblia lyangana thutheya n’ebindu byethu. Ng’eky’erileberyako, abinye mibiiri bakanza abakoli abakaghendera okwa misingyi ye Biblia ey’eribya mw’ekwenene n’erikolha n’omuhwa. (Emisyo 10:4, 26; Abaebrania 13:18) Kandi Ekinywe kya Nyamuhanga kikathukangiriraya eritsemera ebike ebya thuwithe n’erilhangira obunywani bwethu na Nyamuhanga ku bulengire eby’omubiri.​—Soma Matayo 6:24, 25, 33; 1 Timoteo 6:8-10.

Erikolesya emisingyi ye Biblia lyangana theya amaghalha wethu. (Emisyo 14:30; 22:24, 25) Ng’eky’erileberyako, erighendera okwa kihano kya Nyamuhanga ekikathanga obuthamiri likathutheghaya okw’amakoni awakalire n’obutandwa. (Emisyo 23:20) Yehova akathulighira erinywa bwabu aliriryo butsira erilhabirirania. (Esyonyimbo 104:15; 1 Abanya Korinto 6:10) Ebihano bya Nyamuhanga bikathughasira omw’ithukangirirya eriyitheya okwa bya thukakolha n’amalengekania wethu. (Esyonyimbo 119:97-100) Nomwabine, Abakrisitayo ab’ekwenene sibali kenga ebihano bya Nyamuhanga busana n’eribaghasira lisa. Bakabikenga busana n’eriha Nyamuhanga y’olhukengerwa.​—Soma Matayo 5:14-16.