ERISOMO 10
Wangaminya Wuthi Eriramya ly’Ekwenene?
1. Mbwino hali dini nguma nyisa ey’ekwenene?
‘Mutheghaye busana n’abaminyereri b’amabehi.’—MATAYO 7:15.
Yesu mwakangirirya abigha biwe b’edini nguma nyisa, ey’ekwenene. Yiri ng’enzira eyikakolhaya okwa ngebe y’erikotha. Yesu mwabugha athi: “Abandu ni bake abakabanayo.” (Matayo 7:14) Eriramya erya Nyamuhanga akaligha ly’eriseghemere okwa Kinywe kiwe, e Biblia. Abaramya abosi ab’ekwenene bawithe erikirirya lighuma.—Soma Yoane 4:23, 24; 14:6; Abanya Efeso 4:4, 5.
Lebaya evidiyo Mbwino Nyamuhanga Akanaligha Obuli Mulingo Wosi wʼEriramya
2. Yesu mwabugha athiki okw’Abakrisitayo ab’amabehi?
‘Bakabugha bathi banasi Nyamuhanga, nikwa emibiiri yabu yikamughana.’—TITO 1:16.
Yesu mwabugha athi abaminyereri b’amabehi bakendi syatsandya Ekikrisitayo. Omw’ithabasamalira, bakabya nga ni baramya b’ekwenene. Omwa bisomo byabu wukabana ibabiriyahulha mw’Abakrisitayo. Aliriryo wangana minya abandu ng’abo ngoku si Bakristayo ab’ekwenene. Wuthi? Eriramya ly’ekwenene lisa ly’erikabya mw’Abakrisitayo ab’ekwenene abakakanganaya emibere n’emikolere mibuya eyikalhangirika.—Soma Matayo 7:13-23.
3. Wangaminya wuthi eriramya ly’ekwenene?
Thulebaye ebindu bithano ebikaminyikalhayalyo:
-
Abaramya b’ekwenene basikirye e Biblia ng’Ekinywe kya Nyamuhanga. Bakalengaho erighendera okwa biri muyo. Busana n’ekyo, edini y’ekwenene yiri mbaghane okw’amadini awakakangiriraya eby’abandu. (Matayo 15:7-9) Abaramya b’ekwenene sibali kangiriraya kino kandi bakakolha kirya.—Soma Yoane 17:17; 2 Timoteo 3:16, 17.
-
Abigha ba Yesu ab’ekwenene bakasikaya erina lya Nyamuhanga, Yehova. Yesu mwasikya erina lya Nyamuhanga omw’iriminyikalya. Mwawathikya abandu eriminya Nyamuhanga n’eribakangirirya athi basabe bathi erina lya Nyamuhanga libye libuyirire. (Matayo 6:9) Eyawikere, ni dini yahi eyikaminyikalhaya erina lya Nyamuhanga?—Soma Yoane 17:26, NW; Abanya Roma 10:13, 14.
-
Abakrisitayo ab’ekwenene bakathulhughanaya Obwami bwa Nyamuhanga. Nyamuhanga mwathuma Yesu erisyathulhughania engulhu yuwene ey’Obwami. Yesu abya iniane muthulhughania engulhu eyi erihika okwa lhuholho lhwiwe. (Luka 4:43; 8:1; 23:42, 43) Mwabugha athi n’abakamukwama banga thulhughaniryeyo. Omundu amakuhikako neryo akakukanirya okw’Obwami bwa Nyamuhanga, iwukendi mubarira dini yahi?—Soma Matayo 24:14.
-
Abigha ba Yesu sibali yingiraya omwa by’ekihugho kibi kino. Wangana baminyerera kundi sibali yingiraya omwa by’ekipolitiki kutse amalhwa w’abandu. (Yoane 17:16; 18:36) Kandi, sibali gherereraya emibere mibi n’amalengekania mabi aw’ekihugho.—Soma Yakobo 4:4.
-
Abakristayo ab’ekwenene banzene kundu. Ekinywe kya Nyamuhanga kikabeghesaya erisikya abandu b’ebihanda byosi. Nomwakine indi amadini w’amabehi abirisighika kutsibu esyonyuhi, abaramya b’ekwenene sibalikolha ekyo. (Mika 4:1-3) Aliriryo, Abakrisitayo ab’ekwenene, bakakolesaya endambi yabu n’ebyabawitheko eriwathikya n’erihira omw’abandi mw’akaghalha.—Soma Yoane 13:34, 35; 1 Yoane 4:20.
4. Wangana minyerera edini y’ekwenene?
Ni dini yahi eyikaseghemeraya esyongangirirya syayu esyosi okwa Kinywe kya Nyamuhanga, eyikasikaya erina lya Nyamuhanga, n’erithulhughania Obwami bwa Nyamuhanga ng’amaha masa w’abandu? Ni dini yahi eyiri mw’olhwanzo kandi eyithayingiraya omwa nyuhi? Wukalengekanaya wuthi ki?—Soma 1 Yoane 3:10-12.
