ERISOMO 6
Hali Maha ki okw’Ababiriholha?
1. Engulhu yuwene eyihambire okw’abaholi ni yahi?
Yesu abere akahika e Betania hakuhi ne Yerusalemu, munywani wiwe Lazaro abya iniamabirighunza biro bbini aliholire. Yesu mwaghenda okw’isinda haghuma na Marata na Maria, bali bobu muholi. N’abandi bandu bangyi mubabakwama enyuma waho. Thalengekania iya Marata na Maria nga mubabya n’etseme nyingahi Yesu abirilhubukya Lazaro!—Soma Yoane 11:21-24, 38-44.
Marata iyo abya inianasi engulhu yuwene eyihambire okw’abaholi. Abya inianasi ngoku Yehova akendi syalhubukya abaholi neryo ibikalha okwa kihugho kandi.—Soma Yobu 14:14, 15.
2. Abaholi bali omwa mibere ki?
Nyamuhanga mwabwira Adamu athi: ‘Wuli lhuthuthu, kandi wasyasuba omwa lhuthuthu.’—ENZUKO 3:19.
Abandu balhua omwa lhuthuthu. (Enzuko 2:7; 3:19) Thuli bandu b’omubiri. Sithuli mw’ekirimu ekitheholha. Thukabya thukaholha, obwongo bwethu kwa bukanaholha buthya, isithwanga thasyathoka erilengekania kutse eriyisunza kindu. Ky’ekyaleka Lazaro iniathabugha okwa mibere eya abyamu inianaholire kundi abaholi sibasiki.—Soma Esyonyimbo 146:4; Omugambuli 9:5, 6, 10.
Nyamuhanga akanaghalhaya abandu b’omwa muliro babiriholha? Abakakangiriraya bathi Nyamuhanga akahisaya abandu b’omwa muliro bakamuhangirira kundi e Biblia yikakanganaya ngoku abaholi sibasiki. Nayu iyuwene-wene ekindu eky’eriaghalya abandu b’omwa muliro akakikwa esyonye.—Soma Yeremia 7:31.
Lebaya evidiyo Abaholi Bali Omwa Mibereki?
3. Abaholi bangana kania nethu?
Abaholi sibanga kania kutse eriowa. (Esyonyimbo 115:17) Aliwe abamalaika abandi ni babi, kandi bangana kania n’abandu n’eriyisosekania ng’abaholi. (2 Petero 2:4) Yehova akathanga erikania n’abaholi.—Soma Eryibuka Ebihano 18:10, 11.
4. Ni bahi abakendi syalhubuka?
Engulele y’abandu ababiriholha bakendi syalhubukibwa n’eribana engebe okwa kihugho. Nibya n’abandi ababya isibasi Nyamuhanga n’erikolha ebithuwene, nabu bakendi syalhubukibwa.—Soma Esyonyimbo 37:9; Emibiri 24:15.
Abakalhubuka bakendi sy’igha ekwenene eyihambire oku Nyamuhanga n’erighondera Yesu bakakangania ngoku bamwikirirye. (Eribisulirwa 20:11-13) Abakendi syalhubuka neryo bakakolha ebibuya bakendi syikalha okwa kihugho kwa kera na kera.—Soma Yoane 5:28, 29.
5. Erilhubuka likathweghesayaki oku Yehova?
Nyamuhanga erithuma Mughalha wiwe erisyathuholera mukyaleka ihabya amaha busana n’abaholi. Busana n’ekyo, erilhubuka likaleka ithwaminya Yehova kwa withe olhwanzo n’olhukeri lhunene. Abaholi bakendi syabya bakalhubuka, iwe wanzire iwasyalholha okundi?—Soma Yoane 3:16; Abanya Roma 6:23.
