ERISOMO 7
Obwami bwa Nyamuhanga Niki?
1. Obwami bwa Nyamuhanga niki?
Ni kyahi ekikaleka Yesu iniabya Mwami oyutholere?—MARIKO 1:40-42.
Obwami bwa Nyamuhanga ni buthabali obukathabalira elhubulha. Bukendi syaghunzaho awandi mathabali awosi kandi bukendi syaleka erisonda lya Nyamuhanga iryakolhwa omwa lhubulha n’okwa kihugho. Engulhu eyihambire okwa Bwami bwa Nyamuhanga ni mbuya. Obwami bwa Nyamuhanga bukisigha ibwaberererya ekiyithawa ky’abandu eky’obuthabali obuwene. Bukendi syaleka abandu abosi abali okwa kihugho ibabya omwa bughuma.—Soma Danieli 2:44; Matayo 6:9, 10; 24:14.
Obwami bwosi-bwosi butholere ibwabya n’omwami. Yehova mwasombolha Mughalha wiwe, Yesu Kristo, eribya Mwami w’Obwami bwa Nyamuhanga.—Soma Eribisulirwa 11:15.
Lebaya evidiyo Obwami bwa Nyamuhanga Niki?
2. Busana naki Yesu yutholere eribya Mwami?
Mughalha wa Nyamuhanga yutholere eribya Mwami kundi ni w’olhukogho kandi akasighika ekithunganene. (Matayo 11:28-30) Kandi awithe obuthoki bunene obwa anga kolesya eriwathikya abandu kundi akendi syathabalha ekihugho iniane elhubulha. Abere abirilhubuka mwasuba elhubulha, amalinda inian’ikere okwa lhuhandi lhw’amali lhwa Yehova. (Abaebrania 10:12, 13) Erighunzerera, Nyamuhanga mwamuha obuthoki obw’eritsuka erithabalha.—Soma Danieli 7:13, 14.
3. Ni bahi abakendi syathabalha na Yesu?
Endeko y’abandu abakahulhawa mwa “abandu ba Nyamuhanga [“ababuyirire,” NW]” bakendi syathabalha haghuma na Yesu elhubulha. (Danieli 7:27) Ababuyirire abatsuka erisombolhwa babya ib’abakwenda ba Yesu abatheleghulha. Erihika na lino, Yehova anemusombolha abalhume n’abakali abatheleghulha eribya babuyirire. Nga Yesu, bakalhubukibawa omwa mubiri w’ekirimu.—Soma Yoane 14:1-3; 1 Abanya Korinto 15:42-44.
Ni bangahi abakendi syaghenda elhubulha? Yesu mwabugha athi ni “kihyo kike.” (Luka 12:32) Erighunzerera bakendi syahika 144,000. Bakendi syathabalha ekihugho haghuma na Yesu.—Soma Eribisulirwa 14:1.
4. Ni kyahi ekyabya kyabere Yesu akatsuka erithabalha?
Obwami bwa Nyamuhanga bwatsuka erithabalha 1914. * Ekindu ekyo Yesu abya atsukire erikolha ng’Omwami lyabya ery’erighusa Sitani n’esyombinga siwe okwa kihugho. Sitani mwahithana kutsibu neryo amatsuka eriletha emilyambo okwa kihugho. (Eribisulirwa 12:7-10, 12) Erilhwiririra naho, amalighe abirikanyirira kutsibu okwa kihugho. Esyonyuhi, esyonzalha, amakoni, n’emisiki ebyosi ebi ni bighuma by’okwa ‘kiminyikalho’ ngoku Obwami bukisiya ibwathabalha omwa buswire ekihugho.—Soma Luka 21:7, 10, 11, 31.
5. Busana naki Obwami bwa Nyamuhanga bukayithaghisibawa?
Erilhabira omw’ithulhughania ery’ekihugho kyosi, Obwami bwa Nyamuhanga bune mukuma-kuma endeko nene ey’abandu erilhua omwa bihanda byosi neryo ibabya bughuma. Esyomiliyoni sy’abandu ab’omuthima mwolho sine muligha obuthabali bwa Yesu. Obwami bwa Nyamuhanga bukendi syabatheya bukathoghothya omughulhu mubi ono. Kwesi, abosi abanzire erighasirwa omw’Obwami bwa Nyamuhanga batholere ibigha erighondera Yesu.—Soma Eribisulirwa 7:9, 14, 16, 17.
Omw’ithabalha ery’emyaka 1,000, Obwami bukendi syaberererya ekighendererwa kya Nyamuhanga eky’erimbere. Ekihugho ekyosi kikendi syabya paradiso. Erighunzerera, Yesu akakendi syasubulirirya Thatha wiwe y’Obwami. (1 Abanya Korinto 15:24-26) Wunasi omundu wosi-wosi oyo wanga bwira okw’Obwami bwa Nyamuhanga?—Soma Esyonyimbo 37:10, 11, 29.
^ enu. 6 Eriminya bingyi ngoku e Biblia muyalhaghulha omwaka owa 1914, lebaya olhupapura 215-218 olhw’ekitabu E Biblia Yanga Thukangiriryaki?
