1. Ni kyahi ekya thutholere erikolha eritsemesya Nyamuhanga?

ERITSEMERA obughuma na Nyamuhanga, thutholere ithwayihighulha okwa dini ey’amabehi. Thutholere ithwa kwama-kwamania edini ey’ekwenene. Munabwire obukekulhu obw’abandu banamukolha ekyo.

2. Abema ba Yehova bangabanika hayi, kandi omubiiri wabu ni wahi?

² Ng’okwa Biblia yaminyerera, abaramya ab’ekwenene bakakolha “endeko nene” abalhwire ‘okw’obuli kithunga, n’ebihanda byosi, n’abandu bosi, n’emibughe yosi.’ (Eribisulirwa 7:9) Omwa bihugho 235, obukekulhu obw’Abema ba Yehova bana muwathikya abandi erigha emibere ya Yehova ey’olhwanzo n’ebyakayithagha.

3. Abema ibo bakaha eriramya lyabo lyandi, kandi ni miramirya ki eya bakaghana?

³ Abema bano ibo basi bathi Yehova musa yutholere eriramibwa. Bakaghana eryunamira ebibatsirwe kutse ebisasani byosi by’edini. (1 Yoane 5:21) Sibaliramaya abaholi omwi kesya okwa kitsitsi ky’omuliro ekikabya aha kathi-kathi k’obuthalha n’eyindi mikoro eyikasighika edini y’amabehi na “erikangirirya ery’esyombinga.” (1 Timoteo 4:1) Aliriryo, baka humulikanaya abali omwa bulighe omw’ibasoborera erilhagha lya Nyamuhanga ngokwa hakendibya erilhubuka ery’abaholi okwa kihugho paradiso.—Yoane 5:28, 29; Emibiri 24:15.

4. Abandu ba Nyamuhanga bakalhangira bathi obulhaghu?

⁴ Abema sibaliyingiraya omwa bukumu, obulhoyi, kutse obusaki, kundi basi ndeke ebindu ebi kwa bikalhwa oku Diabolo. Sibaliyikethera obukumu eribatheya—eriyikethera lyabu liri omu Yehova.—Emisyo 18:10.

5. Abema ba Yehova ‘si b’ekihugho’ munzira ki?

⁵ Yesu mwabugha athi abigha biwe ‘si b’ekihugho.’ (Yoane 17:16) Yesu iyuwene-wene mwaghana eriyingirya omwa by’obuthabale eby’omwa buthuku bwiwe. (Yoane 6:15) Lithya, Abema sibaliyingiraya omwa by’ekithabale, eriyiheka er’esyanganda, n’erilhwira ebitsumbi by’ekihugho. Aliriryo, bakaliha emisolho yabo n’erisikya ebilhaghiro by’ekihugho ekya bikeremo.—Yoane 15:19; Abanya Roma 13:1, 7. 

6. Ni busondoli ki obw’abaghombe ba Nyamuhanga bakwamire erisighikira okw’ihikania n’erithwa embeta?

⁶ Kusangwa bakasikaya obusondoli obw’obuthabali, Abema bakalhangira bathi obutheke bwabu bunasibwe n’abathabali. (Tito 3:1) Bakasikaya obusondoli bwa Nyamuhanga, busana nekyo sibehikaya bakali bangi. (1 Timoteo 3:2) Kundi bakakolesaya ebihano bye Biblia omwa ngebe syabu, abaghombe ba Nyamuhanga ni kuke erilhangira esya mbeta esy’obutheke bwabu sikathwika.

7. Abema bakakanganaya bathi olhwanzo okw’abandi?

⁷ Abema banzene. Olhwanzo olhu, haghuma n’olhwanzo olhwa bawithe oku Nyamuhanga, lhukabahira haghuma ng’abasubeneko, nomwakine indi bakalhwa omwa bithunga n’ebihanda bingi. Omughulhu akabi kakahika kutse hali obuyithawa, Abema bakanguha eriwathikania. Abema bakakanganaya olhwanzo omwa mibere yabo yosi.—Yoane 13:35.

8. Ni mikolere ki emibi ey’abandu ba Nyamuhanga baka yihighulhako?

⁸ Abema ba Yehova bakakolha kutsibu eribya bayisiwa. Baka yihighulha okw’iba, amabehi, obutswatswa, obuthamiri, n’esuburo eyiri mw’obulibathangania. Abalhume sibeswiraya bakali babo. Bathali babya Abema, abaghuma babya bakakolha ebi, aliriryo busana n’obuwathikya bwa Yehova mubalekabyo. ‘Muberibwa’ omw’ameso wa Nyamuhanga.—1 Abanya Korinto 6:9-11.

9. Ekitabu kighuma mukya bugha kithiki okw’amakanisa aw’omwa Afirika aw’obunyakirimu?

⁹ Ni kwenene, amadini mangi akabugha athi ali n’ekwenene. Bangana kangania emibiiri ey’eriswekya,  abandu bikiriraye bathi ni kwenene. Ng’eky’erireberyako, erisighikira n’amakanisa awa kahulhawa mwa w’obunyakirimu omwa Afirika, ekitabu kighuma kikabugha kithi: “Emikolere ey’obukumu yabirisuba omwa mwanya [w’ebithunga ebihya ebye Kikristayo]. . . . Bakabugha bathi bakaminyerera n’erikolha ebithiko-thiko. Abaminyereri omw’ibo bakaha ebilhotho n’erikumbulhabyo. Baka kolesaya amaghetse awa buyirire, amaghutha awa buyirire, eribu, obubbani n’obukwa erilhamya amalhwere.”

10, 11. Busana naki ebikahulhawa mwa bithiko-thiko munabwire, sibye kanganaya bithi edini yikalhwa oku Nyamuhanga?

¹⁰ Abandu abomw’amadini aya bakabugha bathi erikolha ebithiko-thiko bika kanganaya edini yabu kwa yitsumwirwe na Nyamuhanga. Aliriryo ebikahulhawa mwa bithiko-thiko sibirikanganaya indi edini yikasimawa Yehova. Satani akaha abaramya aba mabehi b’akaghalha akerikolha ‘ebithiko-thiko.’ (2 Abanya Tesalonika 2:9) Eryongerako, e Biblia muyaminyerera yithi ebithiko-thiko erilhwa oku Nyamuhanga, ng’eriminyerera, eribugha omwa mibughe, olhusunzo lhw’eriminya, ‘byasalhusibwaho.’—1 Abanya Korinto 13:8.

¹¹ Yesu mwahayira: ‘Si yo mundu oyukabugha athi, Mukama, Mukama, yo wasyingira omwa bwami bw’elhubulha; nikwa yo n’oyukakolha erisonda lya Thatha waghe oyuli elhubulha. Omughulhu ekiro ekyo kyasyasa, abandu bangi basyabugha naghe bathi, ‘Mukama, Mukama, omwa lina lyawu mwa thuthaminyerera, n’omwa lina lyawu mwa thuthahigha esyombinga, n’omwalina lyawu mwa thuthakolha ebithiko-thiko bingi kwehi?’ Neryo nasyabwirabo nyithi: Mondabaminya na kera! Mulue aha nyiri, inywe bakolha-nabi.’—Matayo 7:21-23.

12. Ni bahi abakendisyingira omw’Obwami bw’elhubulha?

¹² Ni bahi kwesi abakendisyingira omw’Obwami obw’elhubulha? Babu abakakolha erisonda lya Yehova.

13. Ni mubiiri ki owa Nyamuhanga akabugha athi abandu biwe bakole munabwire, kandi ni bahi abakakolhaghu?

¹³ Erisonda lya Nyamuhanga ni ryahi munabwire okw’abandu biwe? Yesu mwabugha athi: ‘Engulhu yowene y’obwami eyi yasyatsuka erithulhaghanibwa omwa kihugho kyosi busana n’eriminyisya ebihanda byosi.’ (Matayo 24:14) Oyu w’omubiiri ow’Abema ba Yehova bakakolha no muhwa.

14. Obwami bwa Nyamuhanga niki, kandi ni bahi abakendi syathabalha omw’Obwami?

¹⁴ Omwa ‘kihugho ekyosi,’ Abema ba Yehova bakathulhaghanaya Obwami bwa Nyamuhanga ng’obuthabali obw’elhubulha obukendi syathabalha ekihugho kyosi omwa lithunganene. Bakakangiriraya bathi Yehova abiri sombolha Yesu Kristo eribya Omwami ow’Obwami obo, n’abandu 144,000 abasombwerwe erilhwa omw’abandu, basyathabalha haghuma nayu.—Danieli 7:14, 18; Eribisulirwa 14:1, 4. 

15. Obwami bukendi syahwerekererya ki?

¹⁵ Omw’ikolesya e Biblia, Abema bakakanganaya abandu indi Obwami bwa Nyamuhanga bukendi syahwerekererya emikolere eyosi eya Satani. Sihendi syaswabya esya dini sy’amabehi n’esyongangirirya syasyo esithehereraya Nyamuhanga y’ekitsumbi aliriryo isikaha Diabolo y’olhukengerwa! (Eribisulirwa 18:8) Obuthabali bw’omundu obulhwe bukahakanisya Nyamuhanga nabu sibwendi syaswabyaho!—Danieli 2:44.

16. Ni bahi abakendi syabya omwisi sy’obusondoli bwa Yesu Kristo, kandi basikalha hi?

¹⁶ Neryo kandi, Abema ba Yehova bakathulhaghu bathi Yesu kristo akendi syaletha ebibuya okw’abo abakakolha ebyo Nyamuhanga akayithagha. Basyabya ahisi sy’obusondoli bwiwe okwa kihugho. E Biblia yikalhaghanisaya: ‘Asyalhamya abanakwa abakamulhakira, n’abali n’obwagha, n’abakasighanibawa. Akaghanyira abanakwa, n’abandu abolho-bolho, akalhamaya esyongebe sy’abandu abali n’obwagha.’—Esyonyimbo 72:12, 13.

17. Ni bahi basa abakathulhaghanaya Obwami bwa Nyamuhanga?

¹⁷ Sihali ekindi kithunga eky’abandu ekikakolha erisonda lya Nyamuhanga omw’ithulhughania engulhu yowene ey’Obwami. Abema ba Yehova basa babakathulira abandu b’omwatsi w’Obwami bwa Nyamuhanga omwa kihugho kyosi.