1. Niki ekyangabya thwamayi ‘thunda hakuhi na Nyamuhanga’?

YEHOVA anzire abakamukolera. Wamaramya Yehova, inyakendi kutsumulha munabwire n’omughulhu owakasa. E Biblia yikabugha yithi: ‘Muyithunde hakuhi na Nyamuhanga, nayu akendi yithunda hakuhi nenyu.’—Yakobo 4:8.

2. Thwangaseghera thuthi hakuhi Nyamuhanga, kandi eki kikahamba kithi okwa misabe yethu?

² Eriseghera hakuhi na Nyamuhanga, wutholere erigha n’erikolesya Ekinywe kiwe. Wamasaba n’erikwamana n’erisonda liwe, Yehova inyakendi hulikirira emisabe yaghu n’erisubiryayo. Omukwenda Yoane mwasaka athi: ‘Eki kikaleka ithwasika embere sya Nyamuhanga, kusangwa thwamabulya kindu omw’isonda liwe, akathwowa. Neryo kusangwa thunasi kw’akathwowa, thunasi kandi kw’akathuha ebyo thukamubulhaya.’—1 Yoane 5:14, 15.

3-7. Thwangabana thuthi obwenge bwa Nyamuhanga, kandi bwanga thuwathikya buthi?

³ Erilholya embere, omughulhu wukaseghera hakuhi na Nyamuhanga, inyakendi kuha amenge awanga kuwathikya erisingura emibere ey’engebe eya bulikiro. E Biblia yikabugha yithi: ‘Nikwa hamabya mundu omo kathi-kathi kenyu oyukabulha amenge, abulhaye Nyamuhanga obuthumbya.’—Yakobo 1:5.

⁴ Obwenge bwa Nyamuhanga bwangakuwathikya buthi? Enzumwa ey’erimbere, ibwangana kuwathikya eriminya ebindu ebithe tsemesaya Yehova. Kandi wangan’igha nga ni busana naki ebindu ebi sibihikire kandi ngawangakolha ki eriyitheya okw’ibikolha. Obwenge obu bwangana kuwathikya erikutheya okwa bitsibu ebikabanawa n’abandu bangi. Ng’eky’erireberyako, eribya mwowa ow’ebihano bya Nyamuhanga omwa mibere ey’erithendibya mutswa-tswa yikawathikaya abandu ba Nyamuhanga eriyitheya okwa amakule awa bathanzire, amalhwere awakalethawa n’obusingiri, kandi na matheke awathe mw’obutseme kutse obutheke obuka thwikangika.

⁵ Obwenge bwa Nyamuhanga bwangana thasyakuwathikya buthi? Bwangana kuwathikya eribana engebe eyuwene. Bwangana kuwathikya eribya n’erithwamu erya menge okwa bindu eby’erikolesya, ng’eritheya esyo mbulho syawu. Iwukendithoka erikwama-kwamania ebighendererwa bibuya kandi iwaghana ebighendererwa ebithawithe mubongo.

⁶ Obwenge bwa Nyamuhanga bwangana kuwathikya omwa mibere ey’obughuma bwaghu n’abandi. Iwanganabana engebe ey’amaka awatsemire. Iwukendi himba obunywani obuwene kandi obughumire n’abandi, kandi iwanganabana erisikibwa nabo abathekolera Nyamuhanga.

⁷ Erithasyongera okw’ekyo, eribya n’obwenge bwa Nyamuhanga ibukendi uwania engebe yawu. Bukendi kuwathikya erisingura ebitsibu omwa ngebe yawu. Kandi iwabya isiwulithika-thika busana n’omughulhu owakasa. Obulengekania bwaghu obuwene obo ibukendireka iwabya muyitsotse ki mubiri n’omwa birengekanio.—Emisyo 14:30; Isaya 48:17.

8. Wamakolera Nyamuhanga, niki ekyawuthe wanga sagha?

⁸ Wamakolera Nyamuhanga ow’ekwenene, iwukendibya bwiranda okwa buba obukalyambaya abathe mukolere. Kusangwa wunasi  abaholi sibawithe ngebe ekulimu, isiwendi ubaha ababiriholha. Kusangwa wukayikethera ebya Nyamuhanga abirilhaghanisya erilhubukya abaholi, isiwendi sagha olhuholho. Kandi ngokwa wunasi wuthi Nyamuhanga awithe obuthoki bwosi, isiwendi sagha obukumu kutse obulhoyi.—Yoane 8:32.

9-11. Ni bahi abakendi syikalha omwa Paradiso, kandi ni bahi abathendi syikalha muyo?

⁹ Wamayithunda hakuhi na Nyamuhanga, isiwanga sagha omughulhu owakasa. Ngokwa thwabirilhangira, e Biblia muyaminyerera ebitsibu bingi ebyathukalhangira okwa kihughu munabwere. Yehova akathubwira athi ebindu ebi ni by’omughulhu muke; Obwami bwa Nyamuhanga bukisiya ibwakolha ekihugho kino mwa paradiso.—Luka 21:10, 11, 31; 23:43.

¹⁰ Abo basa abakayithunda hakuhi na Yehova n’erimukolhera babakendi syikalha omwa Paradiso. E Biblia yikabugha yithi: ‘Omwa kandi kathambi, ababi basyabulirana; inga wasyasondya omwanya wabo, sibendisyabyaho. Nikwa abakayikehaya basyikalha omwa kihugho, basyayitsemera omwa buholho bunene.’— Esyonyimbo 37:10, 11.

¹¹ Abo abaka kighenderera erithendikenga ebihano bya Nyamuhanga basyathoghothibwa kera na kera. (2 Abanya Tesalonika 1:8, 9) Sibendisyasabyaho kandi. Basyabya haghuma na Sitani n’esyombinga siwe omwa lhuholho lhwa kera na kera. (Eribisulirwa 20:10, 14) Aliriryo abo abak’igha oku Yehova n’erimukolera basyabana obutseme bunene omwa kihugho Paradiso.

12. E Biblia yikabugha yithiki okwa omughulhu owakasa?

¹² Yehova awithe ebindu ebyuwene ebibikirwe busana nabo abamwanzire! Thasamalira eby’Ekinywe kiwe kikabugha okwa ngebe omwa kihugho Paradiso:

• Ebyalya bingi eby’erirya: “Hasyabya engano [kutse, ebyalya] bingi omwa kihughu; n’ehithwa hyasyusulha mw’ebyalya.”—Esyonyimbo 72:16, NW.

• Amanyumba awuwene: ‘Basyahimba amanyumba n’erikalha mugho.’—Isaya 65:21.

• Omubiiri owakatsemesaya: ‘Omubiiri owe byalha by’abayisoghawa baghe, asyatsemesya. Sibendisya kolera busa.’—Isaya 65:22, 23.

• Sihakiri malhwere: ‘Sihali ndulhani eyikendi syabugha yithi ‘nyilhwere.’—Isaya 33:24.

• Sihendisyaswabya obulema: ‘Okwa mughulhu oyo ameso w’esyondime-thime asyalibulhwa, n’amathwe w’abatsiha asyahundukalha. Okwa mughulhu oyo, olhughatha lhwasyathwa ebika ng’engabi, n’olhulimi lhw’ekikiru lhwasyutha obwogho bw’obutseme.’—Isaya 35:5, 6.

• Sihendisyaswabya eriaghalhwa, erisusumana, n’olhuholho: ‘Nyamuhanga asyasangulha emisonia yosi okwa meso wabo, kandi olhuholho silhwendisyaswabyaho, kutse erisusumana, kutse eririra, kutse eriaghalhwa. Kusangwa emyatsi y’erimbere yabirirenga.’—Eribisulirwa 21:4.

• Sihendisyaswabya nyuhi: ‘Nyamuhanga akakubaya amalhwa omwa kihugho kyosi.’—Esyonyimbo 46:9.

• Engebe ey’erikotha: ‘Abathunganene basyikalha omwa kihugho mwa buholho n’erisighalyakyo kera na kera.’—Esyonyimbo 37:29.

13. Nindi musa yuwangakolha ekihugho mwa paradiso, kandi busana na ki?

¹³ Abandu sibangathoka eriretha ebindu ebi, aliriryo Yehova yuwithe obuthoki erikolha ebyosi eby’akabugha athi inyakolha. Sihali kindu ekyangamukakirya erikolha ekyanzire. E Biblia yikabugha: ‘Kusangwa oku Nyamuhanga sihali ekithethokekana.’—Luka 1:37.

14. Wang’ingira wuthi omwa nzira eyikakolhaya okwa ngebe ey’erikotha?

¹⁴ Erilhabira omwa Bema biwe, Yehova akaha abandu b’obuthuku ‘eringira omwa lhukyo lhuke’ n’erilendera omwa nzira eyikakolhaya okwa ngebe ey’erikotha. Ibya mughuma wokwabo abali n’obutseme eriligha erikokibwa eri. Kwesi kwama-kwamanaya edini ey’ekwenene wangatsemera emighisa ya Yehova kera na kera!—Matayo 7: 13, 14.