1, 2. Ni ky’erireberyako kyahi ekikakanganaya omubongo ow’eribya n’olhulengo olhw’eriminya emyatsi y’edini?

TWANGAMINYA thuthi Nyamuhanga? Kinayithaghisibwe eriyitheghererya esya ngangirirya esyosi esy’amadini mangi? Ekyo sikyangathokekana. Nomwa thwangakolha thuthya, thwangaminyire thuthi engangirirya eyihikire?

² Kwenene, erisighikira namalengekania wosi awe mbaghane oku Nyamuhanga, thukayithagha enzira ey’eriminya ekihikire, omusingi ow’abandu bangana lighana nagho. Eky’erireberyako: Thuthabugha thuthi omwa kathali muli erikangalhukania okwa buli obw’olhukimba. Omughulya akabugha athi olhukimba ni yadi isathu, aliriryo kighulha inyalengekania athi ni yadi nge kwaho. Erikangalhukania eri lyangahwa lithi? Ly’erirenga olhukimba n’olhukoba olhw’eyadi.

3. Ekyaleka e Biblia iya sakangwa niki?

³ Hane olhukoba olhw’eyadi, ng’olhulengo olhwanga thuwathikya eriminya emyatsi ey’edini? Inga, ye Biblia. Nyamuhanga mwa sakangisya e Biblia inyakanza abandu ehosi-hosi bighe ekwenene okw’iyo. Obukekulhu bwayo bwa biri kopororwa. Yabirihindulibwa, eyosi kutse mwa bitsweka-bitsweka omwa mibughe eyilhabire 2,100. Hakuhi obuli mundu angana soma ekwenene oku Nyamuhanga omwa mubughe wiwe.

4. Ni mwatsi ki owali omwa Biblia?

⁴ E Biblia ni lhuhembo olhuwene erilhwa oku Nyamuhanga. Yikasoborera ebindu ebya thuthe thwangaminyire. Yikathubwira okwabo abikere omw’ithwale ry’ebirimu. Yikakumbulha obulengekania bwa Nyamuhanga,  emibere yiwe, n’ebighendererwa biwe. Yikathubwira erikolangana liwe n’abandu habw’esyankumi esy’ebirimo. Yikakanaya okwa bindu ebikendi syabyaho omughulhu owakasa. Kandi iyathukangya ngoku thwangabana enzira eyikakolhaya okwa ngebe ey’erikotha.

5. Ni ky’erireberyako kyahi ekikakanganaya kithi e Biblia yikalighirana n’esayansi?

⁵ Hali esyanzumwa nyingi esyangaleka ithwikirirya thuthi e Biblia kwenene ni Kinywe kya Nyamuhanga. Enzumwa nguma yiri yithi e Biblia yi kalighirana n’esayansi. Omughulhu wa kera abandu omwa kihugho kyosi ibakalengekanaya bathi ekihugho kithekire okwa kindu. Ng’eky’erireberyako, ebulengera lyuba bwa Afrika, abandu babya ibikirirye bathi ekihugho kithekire okwa mulingolera w’enzoka eyiyiringire emirundi 3,500 endatha n’eyikwa. Aliriryo, erikwamana n’esayansi, omusakangi we Biblia mwasakanga ebirimo ebilhabire mu 3,500 athi Nyamuhanga ‘mwahanika ekihugho ahathe kindu.’​—Yobu 26:7.

6. Ni bwimiri bwahi obulengire obukakanganaya indi e Biblia yalhwa oku Nyamuhanga?

⁶ Obwimiri obulengire obukakanganaya indi e Biblia kwenene yalhwa oku Nyamuhanga ly’erithulha lyayo emyatsi eyihikene eyikendi syabya omwa buthuku obw’embere. Eryahukana n’eby’abandu bakalhaghulha, Nyamuhanga anasi ndeke eby’omughulhu ow’akasa; ebyosi akabugha bikahikerera.

7. Ni maminyereri ahi aw’omwa Biblia aw’abererera obuthuku obulhabire?

⁷ Obuthuku bwa kera, ebikumi eby’amaminyereri aw’omwa Biblia mw’abererera. Ng’eky’erireberyako, yabere yikine ebirimo 700 embere, e Biblia muyabugha yithi Yesu angabuthirwe omwa muyi owe Betelehemu, kandi kwa kyabya kyabere kithya. (Mika 5:2; Matayo 2:3-9) Erithasyongera okw’amaminyereri mangi awahambire oku Yesu, e Biblia muyalhaghulha yithi anga buthirwe n’omumbesa oyuthali athaghotsera na mulhume kandi banga mughoberye ahabw’ebihandi 30 eby’ebitsipa. Amaminyereri aya naghu mwa bererera. Omwa kwenene, sihali omundu oyo wangaminyerere ebyosi ebyo!​—Isaya 7:14; Zekaria 11:12, 13; Matayo 1:22, 23; 27:3-5.

8. Ni maminyereri ahi awe Biblia aw’ane mubererera munabwire, kandi akakanganaya ki?

⁸ Ni maminyereri mangi awe Biblia awana mubererera omwa buthuku bwethu buno. Aya wa make okw’igho:

•   “Erihanga lyasyalhwa n’erindi ihanga, n’obwami bwasyalhwa n’obundi bwami; kandi hasyabya emisiki minene-minene, kandi hasyabya enzalha n’esyandwalha.”​—Luka 21:10, 11, NW.

• Hangabere ‘erikanyirira ery’obubi.’​—Matayo 24:12.

• ‘Omwa biro by’enyuma-nyuma abandu basyabya abakayanza, n’erianza esyambulho, abathyowa ababuthi babo, abathetsomana, abatsibu, abathanzire ekibuya, abakayiheka, abanzire eriyitsemesya isibanzire Nyamuhanga.’​—2 Timoteo 3:1-5.

Siwul’ikiriraya wuthi ebindu ebi binamubya munabwire? Ekwenene n’erihikerera ery’obuminyereri obwe Biblia kikakanganaya kithi e Biblia si kitabu ekya bulikiro. Ni kinywe ekyatheghekanibawa na Nyamuhanga!​—2 Timoteo 3:16.

9, 10. Ni kyahi ekikakanganaya kithi Nyamuhanga syathalighira abandu bakahindulha e Biblia?

⁹ Thutha bugha thuthi wuwithe erikolero kandi thuthi wamahiraho ebiraghiro eby’abakoli bawu bangaghenderako. Enzighu yamahindulha ebya wabiri sakanga, wanga kolha ki? Siwangalhungulha eby’abirihindulhwa? Omwanzira iye n’enguma, Nyamuhanga syalirighira abandu erihindulha Ekinywa kiwe, e Biblia.

¹⁰ Abo ababirilengesaya erihindulha engangirirya ey’Ekinywe kya Nyamuhanga sibetha singura. Thwamathalinganisya e Biblia eya thuli nayo munabwire neya kera, sisosene. Eki kikakanganaya kithi omwa myaka mingi eyihwere e Biblia siyiri yathahindulhwa.