1. Erisighikira n’Ekinywe kya Nyamuhanga, ni miringo ibiri misa yahi ey’amadini?

‘MWINGIRE omwa lhukyo lhuke,’ Yesu mwabugha, ‘kusangwa olhukyo ni lhunene n’enzira ni nene-nene eyikalholhaya okw’ihera, kandi ni bangi abakingira omwa lhukyo olhwo; nikwa olhukyo ni lhuke n’enzira ni nge eyikalholhaya okwa ngebe, n’abandu ni bake abakabanayo.’ (Matayo 7:13, 14) Erisighikira n’Ekinywe kya Nyamuhanga, hali miringo ibiri misa ey’edini: ey’ekwenene, n’ey’amabehi; eyihikire, n’eyithahikire; eyikalholhaya okwa ngebe, n’eyikalholhaya okw’ihera

2. Amasako akakanganaya athi ngokwa amadini wosi syali tsemesaya Nyamuhanga?

² Abandi bandu bakalengekanaya bathi amadini wosi aka tsemesaya Nyamuhanga. Emilhondo eyikwamireko eno yika kanganaya yithi kino sikya kwenene:

• ‘Kandi abana ba Israeli mubathasya kolha ebibi omwa meso a Yehova, neryo batsuka erikolera esya Bali na Astaroti n’esyonyamuhanga esye Siria n’esyonyamuhanga sye Sidoni n’esyonyamuhanga esye Moabu; n’esyonyamuhanga sy’abana b’Amoni, n’esyonyamuhanga esy’Abafilistini. Mubasighania Yehova, mubatha mukolera. N’erihithana lya Yehova mulyaghulhumira okwa Baisraeli.’ (Abatsweri 10:6, 7) Thwamaramya ebibatsirwe kutse e nyamuhanga yosi-yosi athe Nyamuhanga ow’ekwenene, isithwendi simwa Yehova.

• ‘Abandu aba bakanyisikaya omwa minywe yabo, nikwa emithima yabo yiri hali okw’ingye. Nikwa bakanyiramiraya buyira, kusangwa bakakangiriraya ebihano by’abandu nga ly’erikangirirya lya Nyamuhanga.’ (Mariko 7:6, 7) Abandu abakayithwalha nga bakaramaya Nyamuhanga bamabya ibakakangiriraya emyatsi yabo ahabwabu omw’omwanya ow’ebye Biblia yikakangiriraya, eriramya lyabu likabya ini buyira. Siriri simawa na Nyamuhanga.

• ‘Nyamuhanga ni Mulimu, n’abakamuramaya litholere ibamuramya omwa kirimu n’omwa kwenene.’ (Yoane 4:24) Eriramya lyethu litholere iryabya bughuma n’ekwenene ey’Ekinywe kya Nyamuhanga.

3. Ni nzira yahi enguma eya wangaminyirako edini ey’ekwenene n’ey’amabehi?

³ Thwangaminya thuthi edini nga yikana simawa na Nyamuhanga kutse eyihi? Yesu mwabugha athya: ‘Buli muthi mubuya akahethaya ebighuma ebyuwene, aliriryo obuli muthi mubi akahethaya ebighuma bibi. Neryo, mwasya minyerera abaminyereri b’amabehi busana n’emibiiri yabo.’ Kikamanyisaya indi, edini yamabya yilhwire oku Nyamuhanga, iyikendi butha ebibuya; aliriryo edini yamabya yilhwire oku Sitani, iyikendi butha bibi.—Matayo 7:15-20.

4. Abakaramaya Yehova bakakanganaya mubere ki?

⁴ Edini ey’ekwenene yikabutha abandu abawithe olhwanzo omwa kathi-kathi kabo kandi ibakangania olhwanzo olhu lhw’abandi. Ni busana Yehova iyo ni Nyamuhanga ow’olhwanzo. Yesu mwabugha athi: ‘Abandu bosi basyaminya kwa muli bigha baghe, mwamabya n’olhwanzo oghundi okwa ghundi.’ Amadini akahikana athi n’ekiyithawa kino eky’eriramya ery’ekwenene?—Yoane 13:35; Luka 10:27; 1 Yoane 4:8.

5. Ekitabu kighuma kikakanaya kithiki okw’isubura abiraghulhu ng’abakobe?

⁵ Thalengekania okwa suburo ey’abakobe omu Afirika. Ekitabu The New Encyclopædia Britannica kikabugha kithi: “Omwa birimo ebya 650 na 1905 hakuhi Abiraghulhu 18,000,000 mubaghulibwa ng’abakobe omwa Basiramu ab’okwamusirya owakulya owe Sahara n’engetse nene eye Indian Ocean. Omwa kitsweka ekyakabiri eky’ekighonye ekye 15 Abasungu b’Ebulaya mubatsuka erisuburira okwa mwalu ow’ebuwa lyuba bwa Afrika, aha ekirimo 1867 kyahikira Abiraghulhu ahakathi-kathi ka 7,000,000 ne 10,000,000 babya ibabiri hekwa n’erithwalhwa e America.”

6. Edini muya yitsungira yithi omw’ighulya abandu mw’abakobe?

 ⁶ Amadini mwakolha ki omughulhu Afirika yayisanga omwa kabi ako omughulhu abalhume, abakali, n’abana balhusibawa omwa maka abo n’omwa mahiika abo, bakabohwa omwa njeghere, bakahisibwa n’ebyuma ebihisirye, n’erighulhwa n’erighulibwa ng’esyande? Bethwell Ogot mwasakanga omwa lhupapura olhwa amakuru Daily Nation e Nairobi, Kenya athi: “Abakristayo n’Abasiramu baka kangiriraya abandu eribya bughuma, aliriryo abosi mubatsukisya emibere ey’akasolholho n’eribya bakaghulya abandu mw’abakobe. . . . Thutholere erikirirya olhubanza Abasiramu n’Abakristayo bawithe, olhuli okw’abandu ab’Ebulaya n’okw’Abaharabu, n’eribya ndimethime bunyakirimu ekyalhwiramu abiraghulhu eriaghalhwa kutsibu aha bw’ebighonye bingi.”

7. Abakulhu b’amadini babirikolha ki omwa syanyuhi?

⁷ Nomwa sindi nzira edini ey’amabehi yabirikangania ebighuma byayo ebitsandire. Ng’eky’erireberyako, e Biblia nomwa yikana kangiriraya yithi “wanze muliranwa wawu,” abakulhu b’amadini omwa kihugho kyosi bakawathikaya esyonyuhi n’omuhwa munene.—Matayo 22:39.

8. (a) Abakulhu b’amadini mubahira omuhwa ow’eritha wabathi omwa syonyuhi esilhwe omwa Afirika? (b) Omughulhu ow’olhuhi lhw’omwa kathi e Nigeria, pasita mughuma mwabugha athiki okwa bakulhu b’amadini?

⁸ Kyasibwe ndeke indi omwa kirimo 1994, aba sisita n’aba faza mubayitsungira omw’itha abandu e Rwanda. Edini yabiri kolha mubiiri munene n’omwa wandi malhwa omwa Afirika. Ng’eky’erireberyako, olhuhi olhw’omwakathi olhwutha musasi mungi e Nigeria, amadini okwa syombande syosi inyakahira abandu babo mw’omuhwa ow’eriyalhwa. Olhuhi lhwabere lhukalholya emuliro, pasita mughuma mwabugha athi abakulhu b’amakanisa “babirihira omubiiri wa Nyamuhanga abaha walhuhande.”  Kandi athasyabugha athi: “Ithwe thukayahulha mwa bakobe ba Nyamuhanga thwabiribya bakobe ba Sitani.”

9. E Biblia yikabugha yithiki okw’abaghombe ba Sitani?

⁹ E Biblia yikabugha ekindu ekiri ngekyo: ‘Sitani nayo yika yihindulikanaya, mwa malaika ow’ekyakakalha. Neryo simwatsi akalire abaghombe bayo bamayisosekania ng’abaghombe ab’erithunganene.’ (2 Abanya Korinto 11:14, 15) Ngokwa abandu babi bangi bakayisosekanaya eribya babuya, Sitani akatheba-theba abandu n’abaghombe abakalhangirika ngani bathunganene aliriryo emibiiri yabo n’ebighuma byabo ibitsandire.

10. Abakulhu b’amadini babiri ghana Nyamuhanga y’omwa nzira ki?

¹⁰ Erithimba omwa kihugho kyosi, abakulhu b’amadini babiri kangirirya olhwanzo, obuholho, n’obubuya, aliriryo balhwe bakakolha eripona, esyanyuhi, n’obuthubaha Nyamuhanga. Ne Biblia yikabakanayako ndeke. Yika bugha yithi: “Bakabugha bathi basi Nyamuhanga, aliriryo emibiiri yabo yikakanganaya kwa bamughanire.”—Tito 1:16, NW.

11. E Biblia yikakanaya yithi okwa dini ey’amabehi?

¹¹ Thwamasoma ekitabu eky’Eribisulirwa hathukalhangirira ngoku Yehova akalengekanaya okwa dini ey’amabehi. Edini ey’amabehi yikakanibawako ng’omukali, ‘Babeli Mukulhu.’ (Eribisulirwa 17:5) Thungerera Nyamuhanga ngokwa akamukanayako:

• ‘Omumalaya mukulhu oyo abami b’ekihugho basingira nayu.’ (Eribisulirwa 17:1, 2) Omwa mwanya ow’eribya muyisiwa oku Nyamuhanga, edini ey’amabehi yabiri yingirya omwa kithabale, mughulhu mungi bakabwira n’amathabali eky’erikolha.

• ‘Omusasi w’abaminyereri n’omusasi w’abandu ba Nyamuhanga n’omusasi w’abosi ab’ithibawa okwa kihugho mwabanika omw’iyo.’ (Eribisulirwa 18:24) Edini ey’amabehi yabiri endererya abaghombe ba Nyamuhanga kandi yiriko n’olhubanza olhw’obukekulhu obwa mabirikwira omwa syonyuhi.

• “Mwayipipa n’eriyisanzira omwa ngebe ey’obughuda obw’esisoni.” (Eribisulirwa 18:7, NW) Edini ey’amabehi yiwithe bughuda bungi kutsibu, obw’abakulhu babo babiri kalhamo bakayisanza.

• ‘kusangwa ebihanda byosi eby’ekihugho byathebibawa omwa busaki bwiwe.’ (Eribisulirwa18:23) Busana n’engangirirya yiwe ey’amabehi athi ekirimu sikiriholha, edini y’amabehi yabiri kyungulira olhuyi lhwa obuli busaki n’obukumu kandi yabiri leka abandu ibabya bakasagha abaholi n’eriramya ababiriholha.

12. Ni kunga lyahi erye Biblia yikaha busana n’edini ey’amabehi?

¹² Yikaghusa erikunga erikalire okwa bandu bayihighulha okwa dini ey’amabehi, e Biblia yikabugha yithi: ‘Mulhwe mugho abandu baghe mukasya ghabana nagho ebibi byagho, kandi mukasya ghabana nagho erisuyira lhyagho.’—Eribisulirwa 18:4, 5.

13. Niki ekyasyahika okwa dini ey’amabehi nabo abakwamireyo?

¹³ Omughulhu owathe wahali, Babeli Mukulhu, obuthabali obw’ekihugho kyosi obw’edini y’amabehi, bukendi syathoghothibirwa ighuma. E Biblia yikabugha yithi: “Kyakikaleka amalighe wagho asya hikiragho omwa kiro kighuma, olhuholho n’erisusumana n’enzalha, kandi asyathoghothibwa omwa muliro, kusangwa Yehova Nyamuhanga oyukamutswera, akalire.” (Eribisulirwa 18:8, NW) Erithendighabana okwa malighe iwe, thutholere ithwayilhusya kw’emirihi yosi-yosi ey’edini y’amabehi, isithwangakolha kindu kyosi, amagheni abo, n’esyangangirirya esitha tsemesaya Nyamuhanga. Ni mwatsi wa lhuba-lhuba. Engebe yethu yiri omwa kabi!—2 Abanya Korinto 6:14-18.