1. Erisighikira okwa bya wamabir’igha omwa kitabu kino, ni kyahi ekya wanga lengekaniako?

ERILHABIRA omw’igha ekitabu kino, wamabir’igha bingyi omwa Biblia, ng’omulhaghe wa Nyamuhanga ow’engebe y’erikotha, emibere eya baholi balimu, n’amaha w’erilhubuka. (Omugambuli 9:5; Luka 23:43; Yoane 5:28, 29; Eribisulirwa 21:3, 4) Wanganabya iwabiritsuka erihindana n’Abema ba Yehova okwa mihindano yabu n’eriligha ngoku bali omw’iramya ly’okwenene. (Yoane 13:35) Wanganabya iwabiritsuka eribya n’engolangana eyuwene na Yehova, kandi iwanganabya iwabirithwamu wuthi  wanzire erimukolera. Neryo iwangana lengekania, ‘Ngakoleki lino nuku ngakolere Nyamuhanga?’

2. Ni kyahi ekyaleka omulhume we Etiopia inianza eribatizibwa?

² Ekyo kyo mulhume owe Etiopia oyuwabyaho omwa buthuku bwa Yesu alengekanayako. Yesu iniabirilhubuka n’erisuba elhubulha, omwigha wa Yesu iya Filipo mwahika okwa mulhume oyu. Filipo mwamukangania ndeke-ndeke ngoku Yesu yuwabya Masiya. Ebya mulhume owe Etiopia igha mubya muhambako kyamaleka iniabugha athi: “Lebaya, hano hali amaghetse! Ekyanga nyikakirya eribatizibwa ni kyahi kwehi?”​—Emibiri 8:26-36.

3. (a) Ni kihano kyahi ekya Yesu aha abigha biwe? (b) Omundu atholere iniabatizibwa athi?

³ E Biblia yikakangiriraya ndeke-ndeke yithi wamanza erikolera Yehova, wutholere iwabatizibwa. Yesu mwabwira abigha biwe athi: ‘Mughende, muyire abigha okwa bihanda byosi; mubatizayebo.’ (Matayo 28:19) Yesu mwabya ky’erileberyako nayu akabatizibwa. Mubamulubba ndeke omwa maghetse butsira eritsa-tsangagho okwa muthwe wiwe. (Matayo 3:16) Namunabwire Omukrisitayo amabatizibwa, atholere inialubbwa ndeke omwa maghetse.

4. Olhubatizo lhwawu lhukakanganaya abandi baki?

⁴ Omughulhu wukabatizibawa, wukabya iwamakangania abandi ngoku wanzire eribya munywani wa Nyamuhanga n’erimukolera. (Esyonyimbo 40:7, 8) Neryo wangana yibulya, ‘Ni byahi ebyanga tholere erikolha imunabatizibwa.

5. (a) Ni kyahi ekya wutholere iwatsuka erikolha imuwabatizibwa? (b) Busana naki ni kikulhu erihindana okwa mihindano y’Ekikrisitayo?

⁵ Wuthe wabatizibwa, wutholere iwatsuka eriminya Yehova  na Yesu. Eki wabiritsuka erikikolha omw’igha e Biblia. (Soma Yoane 17:3.) Aliriryo, eki sikirighunza. E Biblia yikabugha yithi wutholere ‘iwaminya ndeke-ndeke’ erisonda lya Yehova. (Abanya Kolosai 1:9) Emihindano y’Abema ba Yehova yikendi kuwathikya eribya n’engolangana eya hakuhi na Yehova. Eyo ni nzumwa ngulhu eyanga leka iwabya wukahindana okwa mihindano eyo.​—Abaebrania 10:24, 25.

6. Wutholere iwaminya e Biblia ya bungahi imuwabatizibwa?

⁶ Ni kwenene, Yehova syali bugha athi wutholere iwatsuka eriminya obuli kindu ekiri omwa Biblia imuwabatizibwa. Mwathabugha athi omulhume we Etiopia atsuke eriminya ebyosi imwabatizibwa. (Emibiri 8:30, 31) Nibya thukendi syabya ithune mwigha oku Yehova erihika kera na kera. (Omugambuli 3:11) Aliriryo, eritholera eribatizibwa, wutholere iwaminya n’eriligha hakiri-hakiri esyongangirirya esye Biblia esy’omusingyi.​—Abaebrania 5:12.

7. Erigha e Biblia lyabirikuwathikya lithi?

⁷ E Biblia yikabugha yithi: “Ahathe erikirirya, omundu syangathoka eritsemesya Nyamuhanga.” (Abaebrania 11:6) Neryo kwesi wutholere iwabya n’erikirirya wuthe wabatizibwa. E Biblia yikabugha yithi abandi omwa muyi we Korinto mubowa ebya bigha ba Yesu bakangiriraya neryo, “mubikirirya, mubabatizibwa.” (Emibiri 18:8) Kuthya, iwe erigha e Biblia lyabirikuwathikya eribya n’erikirirya omwa milhaghe ya Nyamuhanga n’omwa kaghalha k’ekihongwa kya Yesu ekyanga thulhamya okwa kibi n’olhuholho.​—Yosua 23:14; Emibiri 4:12; 2 Timoteo 3:16, 17.

8. Ni kyahi ekikendi kuhira mw’omuhwa ow’eribwira abandi okwa bya wamabir’igha?

⁸ Wukendibya wune mwigha bingyi omwa Biblia n’erilhangira ngoku yine mukuwathikya omwa ngebe,  erikirirya lyawu likendyongera erighuma. Wukendianza eribwira abandi okwa bya wuk’igha. (Yeremia 20:9; 2 Abanya Korinto 4:13) Aliwe ni bahi abawanga thulira?

9, 10. (a) Ni bahi abawanga tsukirako eribwira ebya wabirigha? (b) Ni kyahi ekya wangakolha wamanza erisangira omwa mubiiri w’erithulira haghuma n’ekithunga?

⁹ Iwangananza eribwira abahughu, abanywani, abataka, n’abawukakolha nabu okwa bya wuk’igha. Ekyo kyuwene, aliwe wutholere iwakikolha omwa lhukeri n’olhwanzo. Endambi yikendi hika, iwabya iwangana thulira iwune n’abandi ab’omwa kithunga. Wamayowa iwanzire erikolha ekyo, iwangana bwira Omwema oyo muk’igha nayu e Biblia wuthi wanzire erisangira omwa mubiiri w’erithulira haghuma n’ekithunga. Amalhangira iwabiritholera, kandi iwune mughendera okwa biri omwa Biblia, iwe nayu imukendi hika okwa basyakulhu babiri ab’ekithunga.

¹⁰ Ni byahi ebya banga kania nawu? Abasyakulhu ibakendi kania nawu erilebya nga wabiriyitheghererya n’erikirirya esyongangirirya sye Biblia esy’omusingyi, nga wune mughendera okwa bya Biblia yikabugha, kandi nga wunanzire eribya Mwema wa Yehova. Wukiminye ngoku abasyakulhu bakatsomana abalikyethu abosi omwa kithunga, nawu imwawune, neryo isiwasagha erikania nabu. (Emibiri 20:28; 1 Petero 5:2, 3) Bakendibya babirikania nawu, ibangana kubwira nga wangana tsuka erithulira haghuma n’ekithunga.

11. Busana naki ni kikulhu erikolha esyombinduka wuthe watsuka erithulira haghuma n’ekithunga?

¹¹ Abasyakulhu bangana kubwira ngoku wukinatholere erikolha esindi mbinduka wuthe watsuka erithulira haghuma n’ekithunga. Busana naki ni kikulhu erikolha esyombinduka esyo? Kundi omughulhu thukabwira  abandi oku Nyamuhanga, thukabya ithukimanira Yehova, neryo emibere yethu yitholere iyamuha olhukengerwa.​—1 Abanya Korinto 6:9, 10; Abanya Galatia 5:19-21.

12. Busana naki obuli mundu atholere iniayisubamu?

¹² Hane ekindi ekya wutholere iwatsuka erikolha wuthe wabatizibwa. Omukwenda Petero mwabugha athi: ‘Mubindule emithima yenyu, mulholhaye eyiri Nyamuhanga ebibi byenyu bisangulhawe.’ (Emibiri 3:19) Kikamanyisayaki eribindulha emithima kutse eriyisubamu? Ly’eriyikubya bwomo busana n’ekibi ekya thwabirikolha. Ng’eky’erileberyako, wamabya iwulhue musingiri, wutholere iwayisubamu. Kandi nibya nomuwangabya iwabirilengaho eribya iwune mukolha ebihikire, wutholere iwayisubamu, kundi ithwe bosi thukasobaya neryo thutholere ithwasaba Nyamuhanga y’ekighanyiro.​—Abanya Roma 3:23; 5:1.

13. Petero eribugha athi “mulholhaye eyiri Nyamuhanga” amanyisayaki?

¹³ Mbwino kikaghunza erikwama kya yikubyabwomo busana n’ebya thwabirikolha? Eyihi. Petero mwongera eribugha athi “mulholhaye eyiri Nyamuhanga” kutse eribinduka. Eki kikamanyisaya kithi wutholere iwalekera ighuma emitse mibi eyawabya wuwithe n’eritsuka erikolha ebihikire. Thuthabugha thuthi ni murundi wawu w’erimbere erighenda omwa kitsweka kirebe. Wukendibya wabirighenda lhughendo ndeke, iwakiminya ngoku wabirithalha. Iwukendi kolhaki? Ahathe erithika-thika iwukendi imana, iwabinduka n’erilholha omwa nzira eya wutholere erilhabamu. Kuthya, wukabya wunemw’igha e Biblia, iwangana minya ngoku hane emitse milebe kutse ebindu omwa ngebe yawu ebya wutholere iwahindulha. Ligha  eribinduka​—ni bugha ambu, erikolha esyombinduka esikayithaghisibawa n’eritsuka erikolha ekihikire.

14. Wukayihayo wuthi oku Nyamuhanga?

¹⁴ Ekindi kiika kikulhu ekya wutholere erikolha wuthe wabatizibwa ly’eriyihayo oku Yehova. Wukabya wukayihayo oku Yehova, wukaha omusabe ow’eribwira Yehova ngoku wamayilhagha erimuramya n’erikolha erisonda liwe mwa kindu kikulhu kutsibu omwa ngebe yawu.​—Eryibuka Ebihano 6:15.

15, 16. Ni kyahi ekikaleka omundu iniayihayo oku Nyamuhanga?

¹⁵ Eriyilhagha erikolera Yehova musa liri ng’eriyilhagha erighunza engebe yawu yosi iwune n’omundu oyo wanzire. Thubughe thuthi, omulhume n’omukali bane omwa buthethane. Omulhume akabya anemuminya omukali ya ndeke, akamwanza neryo inianza n’erimuthahya. Nomwakine indi ni thwamu erikalire, omulhume akaligha olhukwamirwa olhu kundi anzire omukali oyo.

¹⁶ Wukabya wunemw’igha oku Yehova, wukamwanza kandi iwanza kutsibu erimukolera. Eki kikendi leka iwanza erisaba omusabe w’eriyilhagha erimukolera. E Biblia yikabugha yithi omundu oyukanza erikwama Yesu, atholere ‘iniayighana.’ (Mariko 8:34) Ekyo kikamanyisayaki? Kikakanganaya ngoku eriowa Yehova ly’eritholere iryabya embere omwa ngebe yawu yosi. Ebya Yehova anzire birengire kutsibu ebya wanzire n’ebilhubirirwa byawu.​—Soma 1 Petero 4:2.

17. Ni kyahi ekikaleka abandi ibaghana eriyihayo oku Yehova?

¹⁷ Abandi bakaghana eriyihayo oku Yehova kundi bakasagha bathi bakendi lemwa eriberererya eriyilhagha lyabu ery’erimukolera. Si balyanza erihithania Yehova, kutse  ibangana lengekania bathi bamabya isibayihereyo oku Yehova, isibendibya kw’olhubanza embere sya Yehova busana n’ebya bakakolha.

18. Ni kyahi ekikendi kuwathikya erisingura obuba obw’erisagha erihithania Yehova?

¹⁸ Erianza Yehova likendi kuwathikya erisingura obuba obwa wangabya nabu obw’erisagha erimuhithania. Erimwanza likendi leka iwalhangira wuthi wukalengaho eriberererya eriyilhagha lyawu. (Omugambuli 5:4; Abanya Kolosai 1:10) Isiwendi lengekania wuthi kikalire erikolha erisonda lya Yehova. Omukwenda Yoane, mwahandika athi: “Erianza Nyamuhanga ni kwama ebihano biwe, kandi ebihano biwe sibikalire.”​—1 Yoane 5:3.

19. Busana naki si wutholere wukasagha eriyihayo oku Yehova?

¹⁹ Sikirimanyisaya kithi wutholere iwabya iwuhikene iwe eriyihayo oku Yehova. Syali thuyithaghako ebya thuthe thwanga thoka. (Esyonyimbo 103:14) Akendi kuwathikya erikolha ebihikire. (Isaya 41:10) Yikethere Yehova n’omuthima wawu wosi, neryo akendi ‘thunganania esyonzira syawu.’​—Emisyo 3:5, 6.

20. Wukabya wabiriyihayo oku Yehova, ni kindi kyahi ekya wutholere erikolha?

²⁰ Wukalengekanaya wanamabirihika eriyihayo oku Yehova? Wukabya wabiriyihayo oku Yehova, hane ekindi eky’erikolha. Wutholere iwabatizibwa.

21, 22. Wanga ‘thulhagho’ wuthi embere sy’abosi erikirirya lyawu?

²¹ Bwira omusangania ow’akathunga k’abasyakulhu ow’ekithunga kyenyu ngoku wabiriyihayo oku Yehova kandi ngoku wanzire eribatizibwa. Neryo akendi bwira abasyakulhu balebe erilhaba haghuma nawu omwa myatsi mirebe eyihambire okwa syongangirirya sye  Biblia esy’omusingyi. Bamalhangira bathi wunatholere, ibakendi kubwira bathi wangana batizibwa okwa lhuhindano olhunene olhukasa olhw’Abema ba Yehova. Okwa lhuhindano olho kukalhabibawa omukania owakasoborera omughaso w’olhubatizo. Neryo oyukalhabaya omukania akabugha athi abakayabatizibawa basubiraye okwa bibulyo bibiri bisa. Wukabya wukasubirya ebibulyo  ebyo, wukabya ‘iwamathulhagho’ erikirirya lyawu okwa bosi.​—Abanya Roma 10:10.

²² Neryo enyuma waho iwabatizibwa. Wukalubbawa ndeke omwa maghetse. Olhubatizo lhukakanganaya obuli mundu ngoku wabiriyihayo oku Yehova kandi ngoku wamabiribya Mwema wa Yehova.

23. Eribatizibwa omwa lina ‘ly’Ise n’ery’Omughalha n’ery’omulimu abuyirire’ kikamanyisayaki?

²³ Yesu mwabugha athi abigha biwe banga batizibirwe ‘omwa lina ly’Ise n’ery’Omughalha n’ery’omulimu abuyirire.’ (Soma Matayo 28:19.) Eki kikamanyisayaki? Kikamanyisaya ngoku wunasi obuthoki bwa Yehova n’olhukwamirwa lhwa Yesu omwa kighendererwa kya Nyamuhanga, kandi ngoku Nyamuhanga akakolesaya omulimu wiwe abuyirire eriberererya erisonda liwe.​—Esyonyimbo 83:18, Matayo 28:18; Abanya Galatia 5:22, 23; 2 Petero 1:21.

24, 25. (a) Olhubatizo lhukimaniraki? (b) Ni kyahi ekya thukendi kaniako omwa sura y’erighunzerera?

²⁴ Olhubatizo lhuk’imanira ekindu kikulhu kutsibu. Wukabya wukalubbwa, wukabya iwamaholha okwa ngebe yawu eya kera, kutse erileka emibere yawu eya kera. Wukabya wukalhua omwa maghetse, wukabya iwamatsuka engebe nyihya-nyihya ey’erikolha erisonda lya Nyamuhanga. Kikakanganaya ngoku wamatsuka erikolera Yehova erihika kera na kera. Wuminye ngoku siwuthayihayo okwa mundu, okwa kithongole, kutse okwa mubiiri. Wukabya iwamayihayo oku Yehova.

²⁵ Eriyihayo lyawu oku Nyamuhanga likendi kuwathikya erikulha-kulhania obunywani nayu. (Esyonyimbo 25:14) Eki sikirimanyisaya kithi omundu akendi syalhamibwa kundi abiribatizibwa. Omukwenda Paulo mwahandika athi: ‘Muberereraye erilhama lyenyu omw’iubaha n’erithithimana.’ (Abanya Filipi 2:12) Eribatizibwa wukabya iwamatsuka ekiika ekikalholhaya okwa mulhamu. Aliriryo wangabya wuthi iwune bughuma na Yehova? Esura y’erighunzerera ey’ekitabu kino yikendi subirya ekibulyo ekyo.