WUKABYA wukasoma olhupapura lhw’amakuru, erilebya etivi, kutse erihulikirira eradio, wukalhangira n’eriowa emyatsi mingyi eyihambire okw’ikolha ebithuwene, ey’esyonyuhi, n’ey’obutsindi! Obundi nawu wune mwaghalhwa busana n’obulhwere kutse eriholerwa oyowanzire.

Yibulhaye:

• Mbwino eki kya Nyamuhanga anyitheghekere n’ab’eka yethu?

• Ni hayi aha nanga bana obuwathikya obw’erighumira ebitsibu byaghe?

• Hane mwendi syabya obuholho bw’okwenene?

E Biblia yikaha eby’erisubirya ebyuwene okwa bibulyo ebi.

• Abandu sibendi syasyowa obulhumi, sibendi syakekelhuha, kutse eriholha.​—Eribisulirwa 21:4

• “Olhughatha [kutse ekirema] lhwasyathwa ebika ng’engabi.”​—Isaya 35:6

• “Ameso w’esyo ndime-thime asyalibulhwa.”​—Isaya 35:5

•  Abaholi bakendi syasuba.​—Yoane 5:28, 29

• Sihali oyukendi syalhwalha.​—Isaya 33:24

• Obuli mundu okwa kihugho akendi syabya n’ebyalya bingyi.​—Esyonyimbo 72:16

Kyolhobire erilengekania wuthi emilhaghe eyiri okwa syombapura esikatsuka ekitabu kino ni bilhotho buyira. Aliwe Nyamuhanga abirilhaghanisya erikolha esyombinduka esyo okwa kihugho omwa buthuku obuthe bwa hali, ne Biblia yikasoborera ng’akendi syakikolha athi.

Aliriryo si by’ebyo bisa ebye Biblia yikakanayako. Yikathubwira ebya thutholere eriminya nuku thwangabya n’etseme ey’okwenene n’engebe eyuwene lino. Thalengekania hake okwa bindu ebikakulethera amaghaniryo. Byanganabya imwamuli eribulha esyosente kutse ebitsibu by’amaka, amaghalha awathuwene, kutse eriholerwa omundu oyowanzire. E Biblia yangana kuwathikya erighumira ebitsibu ebi, kandi yangana kuhumulikania omw’isubirya okwa bibulyo nga bino:

• Busana naki thukaghalhawa?

• Thwanga ghumira thuthi ebitsibu byethu?

• Thwangana bana etseme omw’eka yethu?

• Thwamaholha thukabya omwa mibereki?

• Thune mwendi syasalholha okwa bandu bethu ababiriholha?

• Ni kyahi ekyanga leka ithwayikethera ngoku Nyamuhanga akendi syakolha ebyosi eby’abirilhagha?

 Iwe eribya iwune musoma ekitabu kino kikakanganaya ngoku wanzire eriminya ebya Biblia yikakangiriraya. Ekitabu kino kikendi kuwathikya. Esyonungu siwithe ebibulyo, ebikendi kuwathikya eriyitheghererya e Biblia ya ndeke. Esyomiliyoni sy’abandu babiritsemera erigha e Biblia n’Abema ba Yehova. Thukyasi ngoku nawu wukendi kolha ekyo. Nyamuhanga akutsumule wukaminya ebya Biblia yanga kukangirirya!