1. Nyamuhanga ahangika abandu iniawithe kighendererwaki?

NYAMUHANGA awithe ekighendererwa ekyuwene ekyaleka iniahangika abandu. Mwahangika omulhume n’omukali ab’erimbere, iya Adamu na Eva, nuku bikale omw’irima eryuwene. Aby’anzire ibabutha abaana, erikolha ekihugho kyosi mwa paradiso, n’eritheya ebisoro.​—Enzuko 1:28; 2:8, 9, 15; lebaya Endomeko 6.

2. (a) Thukaminya thuthi ngoku Nyamuhanga akendi syaberererya ekighendererwa kiwe? (b) E Biblia yikabugha yithiki okw’ibyaho ly’abandu kera na kera?

² Wukalengekanaya ekihugho kine mwendi syabya paradiso? Yehova akabugha athi, “Kwenene nabiribugha, kwenene nasyakolhakyo.” (Isaya 46:9-11; 55:11) Kwenene, akendi syaberererya ekighendererwa kiwe, kandi sihali ekyanga mulemesya. Yehova akabugha athi hane enzumwa eyaleka iniahangika ekihugho. ‘Mwathahangika ekihugho eribya mulhalha.’ (Isaya 45:18) Anzire abandu ibasyikalha omwa kihugho ehosi. Nyamuhanga anzire ekihugho ikyasyikalha mw’abandu abali bathi, kandi ahabw’omughulhu mungahi? E Biblia yikabugha yithi: ‘Abathunganene [kutse, abowa] basyikalha omwa kihugho mwa buholho, n’erisighalya kyo kera na kera.’​—Esyonyimbo 37:29; Eribisulirwa 21:3, 4.

3. Kundi abandu bakalhwalha n’eriholha, wangana yibulya wuthiki?

³ Aliwe munabwire abandu bakalhwalha n’eriholha. Omwa bihugho bingyi abandu bakalhwa, n’er’ithana.  Omwa kwenene Nyamuhanga mwathathegheka ekihugho eribya kithya. Neryo ibbwa kwesi ekyabere niki kandi busana naki? E Biblia nyisa y’eyanga soborera.

4, 5. (a) Nindi oyuwakanaya na Eva erilhabira omwa nzoka omw’irima ly’Edeni? (b) Omundu oyuwanabya muyisiwa angabya athi mwibi?

⁴ E Biblia yikathubwira yithi Nyamuhanga awithe enzighu ‘eyikahulhawamu Sitani na Diabolo.’ Sitani mwakolesya enzoka erikania na Eva omw’irima ly’Edeni. (Eribisulirwa 12:9; Enzuko 3:1) Mwaleka ikyabya nga ni nzoka eyikakanaya.​—Lebaya Endomeko 7.

⁵ Mbwino Nyamuhanga yuwahangika Sitani Diabolo? Eyihi! Omumalaika oyuwabya iniane elhubulha omughulhu Nyamuhanga ahira Adamu na Eva okwa kihugho mwayihindulha amabya Sitani. (Yobu 38:4, 7) Eki mukyathokekana kithi? Omundu oyunalhue muyisiwa anga hinduka athi eribya mwibi? Mwathabuthwa mwa mwibi. Aliwe angananza ekithe kiwe. Iniabya akakirengekaniako mughulhu wosi, n’engumbu yiwe nyibi iyayongera. Neryo hamabya akaghisa, iniangana kiba. Akabya iniamabiriyikolha mwa mwibi.​—Soma Yakobo 1:13-15; lebaya Endomeko 8.

6. Omumalaika mwabya athi nzighu ya Nyamuhanga?

⁶ Kino ky’ekyabya kyabere okwa mumalaika oyu. Yehova abere abirihangika Adamu na Eva, mwababwira athi babuthe abaana, ‘basulhaye ekihugho.’ (Enzuko 1:27, 28) Sitani angabya imwalengekania athi, ‘Abandu abosi aba balyathanyiramaya omwakanya k’eriramya Yehova!’ Abere anemwongera erilengekania okw’eki kwa kutsibu, n’eriyighomba ebya Yehova kulyanayongera lithya. Omumalaika oyu mwanza abandu bamuramaye. Neryo mwatheba Eva. (Soma Enzuko 3:1-5.) Abere abirikolha eki, mwabya Sitani Diabolo, enzighu ya Nyamuhanga.

7. (a) Ekyaleka Adamu na Eva ibaholha niki? (b) Busana naki thukakekelhuha n’eriholha?

 ⁷ Adamu na Eva mubathowa Nyamuhanga neryo mubalya ekighuma. (Enzuko 2:17; 3:6) Mubasoberya Yehova, n’obuthuku bwamahika bamaholha, ngoku Yehova abya iniabiribugha. (Enzuko 3:17-19) Abaana ba Adamu na Eva mubabya bakolha-nabi, neryo mubaholha. (Soma Abanya Roma 5:12.) Eriminya ekyaleka abaana ba Adamu na Eva nabu ibabya bakolha-nabi, thulebaye eky’erileberyako kino. Thalengekania okw’ikolha eritafali omwa kathiba akahengemire, eritafali irikendi hengema ng’akathiba ako. Adamu abere akaghana eriowa Nyamuhanga, mwabya mukolha-nabi. Kundi thuli baana ba Adamu, ithwe bosi thuli bakolha-nabi, kutse thwabiribya ng’abahengemire. Kandi kundi ithwe bosi thuli bakolha-nabi, thukakekelhuha n’eriholha.​—Abanya Roma 3:23; lebaya Endomeko 9.

8, 9. (a) Ni kyahi ekya Sitani aby’anzire Adamu na Eva ibikirirya? (b) Ni kyahi ekyaleka Yehova iniathalhuaho ak’itha abayisamambuli?

⁸ Omughulhu Sitani aleka Adamu na Eva ibathowa Nyamuhanga, abya iniamatsukisya eriyisamambulha oku Yehova. Sitani aby’anzire Adamu na Eva ibikirirya bathi Yehova ni mubehi, ni muthabali mubi oyuthabasunzira kibuya. Sitani abya iniakabugha athi abandu si baliyithagha eribabwira eky’erikolha kandi athi Adamu na Eva bangana yithwiramu ekihikire n’ekithahikire. Neryo kwesi, Yehova angakolireki? Ang’ithire abayisamambuli neryo eriyisamambulha iryahweraho. Aliriryo ekyo kyangana kanganirye ngoku Sitani ni mubehi? Eyihi nahake.

⁹ Busana n’ekyo, Yehova mwathalhuaho akabitha. Aliwe, mwaha abandu b’obuthuku obw’eriyithabalhako. Eki kyanga kanganirye ndeke ngoku Sitani ni mubehi kandi ngoku Yehova anasi ebya bandu bakayithagha.  Thukendi sy’igha bingyi okw’eki omwa sura 11. Aliwe wukalengekanaya wuthiki okw’ithwamu lya Adamu na Eva? Mbwino kyanabya kihikire ibo eriligha ebya Sitani n’erithendiowa Nyamuhanga? Ebyosi ebya Adamu na Eva babya bawithe, Yehova yuwabahabyo. Mwabaha engebe eyihikene, omwanya owuwene ow’eribyamu, n’omubiiri  owababya ibanemukolha. Aliwe Sitani abya isyali athabakolera kindu kyosi-kyosi. Ku wabyaho, wangakolireki?

10. Obuli mughuma w’okw’ithwe awithe erithwamu lyahi likulhu?

¹⁰ Namunabwire, obuli mughuma w’okw’ithwe anawithe erithwamu eriri ng’eri, kandi engebe yethu yiseghemere okw’ithwamu eryo. Thwangana thwamu eriowa Yehova ng’omuthabali wethu n’eriwathikya erikangania ngoku Sitani ni mubehi. Kutse ithwasombolha Sitani ng’omuthabali wethu. (Esyonyimbo 73:28; soma Emisyo 27:11.) Ni bandu bake omwa kihugho abakowa Nyamuhanga. Erithwalira haghuma, siyo muthabali w’ekihugho. Ibbwa amabya isiyo muthabali, omuthabali wakyo inindi?

11, 12. (a) Sitani eriha Yesu y’amami kikathweghesaki? (b) Ni Masako wahi awakakanganaya ngoku Sitani yukathabalha ekihugho?

¹¹ Yesu abya inianasi oyukathabalha ekihugho nga nindi. Buthuku bughuma, Sitani “mwamukangya amami wosi w’ekihugho n’olhukengerwa lhwagho.” Neryo Sitani mwalhaghanisya Yesu athi: “Ebyosi ebi nasyakuhabyo wamanyikukamira n’erinyiramya.” (Matayo 4:8, 9; Luka 4:5, 6) Thalengekania okwa kino, ‘Amami aya kw’athabya wa Sitani, anganaheregho Yesu?’ Eyihi. Amathabali awosi ni wa Sitani.

¹² Iwangana yibulya: ‘Sitani angabya athi muthabali w’ekihugho? Yehova ka ya Muthoki w’Ebyosi oyo wahangika ekihugho kyosi! (Eribisulirwa 4:11) Ni kwenene yuwakihangika, aliwe Yesu mwakangania ndeke-ndeke Sitani ku ya ‘muthabali w’ekihugho kino.’ (Yoane 12:31; 14:30; 16:11) Omukwenda Paulo mwahulha Sitani Diabolo mwa “nyamuhanga mubi w’ekihugho kino.” (2 Abanya Korinto 4:3, 4) N’omukwenda Yoane mwahandika athi: ‘Ekihugho kyosi kiri omwa buthoki bw’omubi oyu.’​—1 Yoane 5:19.

13. Busana naki thukayithagha ekihugho kihya-kihya?

¹³ Ekihugho kino kine muyongera eribya kibi kutsibu. Kyoswire mw’esyonyuhi, obulibathangania, obuthebya, n’esyongoli sy’ebibi. Abandu sibanga thoka erighunzaho ebitsibu ebi, nomubanga lengaho bathi. Aliwe Nyamuhanga akisiya iniahwerekererya ekihugho kibi kino omwa lhuhi lhwiwe olhwe Harmagedoni, n’erisubyaho ekihya-kihya ekithunganene.​—Eribisulirwa 16:14-16; lebaya Endomeko 10.

14. Nyamuhanga abirisombolha ndi eribya Muthabali w’Obwami Bwiwe? E Biblia muyalhaghulha yithiki oku Yesu?

¹⁴ Yehova mwasombolha Yesu Kristo eribya Muthabali w’Obwami Bwiwe bw’elhubulha. Kera, e Biblia muyabugha yithi Yesu akendi syathabalha ‘ng’Omunya-mwami w’Obuholho’ kandi yithi obuthabali bwiwe sibwendi syahwaho. (Isaya 9:6, 7) Yesu mwakangirirya abigha biwe erisaba obuthabali obu omughulhu abugha athi: “Obwami bwawu bwase. Erisonda lyawu liyirawe omwa kihugho ngoku liri omwa lhubulha.” (Matayo 6:10) Omwa Sura 8, thukendi sy’igha Obwami bwa Nyamuhanga nga bukendi syasuba buthi omwa mwanya w’amathabali w’ekihugho. (Soma Danieli 2:44.) Neryo Obwami bwa Nyamuhanga bukendi syakolha ekihugho mwa paradiso.​—Lebaya Endomeko 11.

15. ‘Ekihugho kihya-kihya’ niki?

¹⁵ E Biblia yikalhaghanisaya yithi: “Nyamuhanga abirithulhagha olhubulha n’ekihugho bihya-bihya, aho ekithunganene kikasiba.” (2 Petero 3:13; Isaya 65:17) Okwa bundi buthuku e Biblia yikanakanaya okwa “kihugho” yikamanyisya abandu abikere kukyo. (Enzuko 11:1) Neryo ‘ekihugho kihya-kihya’ ekithunganene b’abandu abosi abakowa Nyamuhanga kandi iniabatsumulha.

16. Ni kihemboki kibuyanga ekya Nyamuhanga akendi syaha abakendi syabya omwa kihugho kiwe kihya-kihya, kandi ni kyahi ekya thutholere ithwakolha erisyahebwa ekihembo eki?

 ¹⁶ Yesu mwalhaghanisya ngoku abakendi syabya omwa kihugho kihya-kihya kya Nyamuhanga bakendi syabana “engebe y’erikotha.” (Mariko 10:30) Ni kyahi ekyathutholere erikolha erisyabana ekihembo eki? Eribana eky’erisubirya soma Yoane 3:16 na 17:3. Lino thulebaye ekye Biblia yikabugha engebe nga yikendi syabya yithi omwa kihugho Paradiso.

17, 18. Thukaminya thuthi ngoku hakendi syabya obuholho omwa kihugho kyosi kandi isihali ekikathubahisaya?

¹⁷ Obubi, esyonyuhi, esyongoli sy’ebibi, n’eby’obwithi bikendi syahwaho. Sihendi syabya abandu babi okwa kihugho. (Esyonyimbo 37:10, 11) Nyamuhanga akendi ‘syakubya amalhwa omwa kihugho kyosi.’ (Esyonyimbo 46:9; Isaya 2:4) Omwa kihugho mukendi syabya abandu abanzire Nyamuhanga kandi abakamwowa. Hakendi syabya obuholho kera na kera.​—Esyonyimbo 72:7.

¹⁸ Abaramya ba Yehova basyabya omwa buholho. Omwa buthuku bwakera, Abaisraeli ibakabya bamwowa Nyamuhanga, ibakabya buholho kundi Nyamuhanga iniakabatheghaya. (Abalawi 25:18, 19) Omwa Paradiso, sithwendi syubaha kindu kutse mundu wosi-wosi. Mughulhu wosi thukendi syayowa buholho.​—Soma Isaya 32:18; Mika 4:4.

19. Thukaminya thuthi ngoku ebyalya bikendi syakanya omwa kihugho kihya-kihya kya Nyamuhanga?

¹⁹ Hakendi syabya ebyalya bingyi. “Engano yibyeho nene omwa kihugho; n’ehithwa hyusule mw’ebyalya.” (Esyonyimbo 72:16) Yehova, ‘Nyamuhanga wethu, akendi syathutsumulha,’ ‘n’ekithaka kyasyerya esyombutho syakyo.’​—Esyonyimbo 67:6.

20. Thukaminya thuthi ngoku ekihugho kikendi syabya paradiso?

²⁰ Ekihugho kyosi kyasyabya paradiso. Abandu bakendi syabya n’amanyumba awuwene n’amalima. (Soma  Isaya 65:21-24; Eribisulirwa 11:18.) Ekihugho kyosi kikendi syuwana ngoku eririma lye Edeni lyabya. Yehova akendisyabya akathuha obuli kindu kyosi ekya thukayithagha. E Biblia yikamukanayako yithi: “Akughuthaya obwagha bw’abosi.”​—Esyonyimbo 145:16.

21. Thukaminya thuthi ngoku hakendi syabya obuholho ahakathi-kathi k’abandu n’ebisoro?

²¹ Hasyabya obuholho ahakathi-kathi k’abandu n’ebisoro. Ebisoro sibyendi syasahuthalya abandu. Abaana sibendi syabisagha, nibya bakendisyabya hakuhi n’ebisoro ebikalire munabwire.​—Soma Isaya 11:6-9; 65:25.

22. Ni kyahi ekya Yesu akendi syakolera abalhwere?

²² Sihendi syabya oyulhwere. Omughulhu Yesu abya okwa kihugho, mwalhamya abandu banene. (Matayo 9:35; Mariko 1:40-42; Yoane 5:5-9) Aliwe lino ng’Omwami w’Obwami bwa Nyamuhanga, akendi syalhamya obuli mundu. Sihali endulhani eyikendi syabugha yithi: “Nyilhwere.”​—Isaya 33:24; 35:5, 6.

23. Ni kyahi ekya Nyamuhanga akendisyakolera ababiriholha?

²³ Ababiriholha bakendi syasuba. Nyamuhanga akalhaghanisaya athi akendi syalhubukya esyomiliyoni sy’abandu ababiriholha. ‘Hasyabya erilhubuka ly’abathunganene n’ababi [“abathathunganene” NW].’​—Soma Yoane 5:28, 29; Emibiri 24:15.

24. Erisy’ikalha omwa Paradiso kikaleka iwayowa wuthi?

²⁴ Obuli mundu atholere iniayithwiramu. Thwangana thwamu erigha oku Yehova n’erimukolera, kutse ithwakwama kya thwamu erikolha ebya thwanzire. Thwamathwamu erikolera Yehova, ithukendibya n’amaha awuwene. Omulhume abere akabwira Yesu athi asyamw’ibuka, Yesu mwa mulhaghanisya athi: “Wukendisyabya naghe omwa Paradiso.” (Luka 23:43, NW) Thukend’igha bingyi oku Yesu Kristo kandi ngoku akendi syaleka emilhaghe ya Nyamuhanga iyabererera.