1, 2. Obutheya obuwene thwanga bubana hayi munabwire?

THATHERA akasasani iwune omwa nzira neryo embulha nene iyahimba. Olhubulha ilhwakinirana, ehirabyo ihyatsuka eripalya, obuthuku ibwapura. Neryo embulha iyawa. Iwasondya ah’eryuwama. Ka wukatsema kutsibu wukabana ah’eryuwama ahuwene!

² Munabwire thuli omwa buthuku obuli ng’obu. Emibere y’ekihugho yikayongera eribya mibi kutsibu. Iwangana yibulya, ‘Ni hayi ahananga bana obutheya?’ Omuhandiki w’esyonyimbo mwahandika athi: “Ngendi syabwira Yehova nyithi: ‘Wuli busayiro bwaghe n’ahakongothere haghe, Nyamuhanga waghe oyo ngayikethera.’” (Esyonyimbo 91:2, NW) Ni kwenene, Yehova angana thutheya omwa bitsibu byethu lino, kandi akathuha amaha awuwene aw’obuthuku obukasa.

3. Thwanga kolha thuthi Yehova mwa busayiro bwethu?

³ Yehova angathutheya athi? Angana thuwathikya erirwanisya ekitsibu kyosi-kyosi ekya thuwithe, kandi awithe obuthoki obulengire obw’omundu wosi-wosi oyuwanga lengaho erithukolha nabi. Nomuthwanga hikwako ekindu kibi lino, thukayikethera ngoku omwa buthuku obukasa Yehova akayaghunzaho ebyanga lhwiririramu ebithuwene. E Biblia yikathubwira yithi: “Muyibike omo lhwanzo lhwa Nyamuhanga.” (Yuda 21) Thutholere ithwabya ithune bughuma na Nyamuhanga erithoka eribana obuwathikya bwiwe omwa buthuku bw’ebitsibu. Aliwe thwangakolha ekyo kya thuthi?

4, 5. Yehova abirikangania athi ngoku athwanzire?

⁴ Eribya ithune bughuma na Yehova, thutholere ithwaminya ngoku athwanzire kutsibu. Thalengekania okwa byosi ebya Yehova abirithuha. Abirithuha ekihugho ekyuwene n’erikyusulya mw’ebirimwa n’ebisoro ebikatsemesaya. Abirithuha n’ebyalya ebisihire n’amaghetse awuwene aw’erinywa. Erilhabira omwa Biblia, Yehova abirithukangirirya erina liwe n’emibere yiwe eyuwene. Ekikulhu kutsibu, mwathukangania olhwanzo omughulhu athuma Mughalha wiwe, Yesu, okwa kihugho erihayo engebe yiwe busana nethu. (Yoane 3:16) Kandi busana n’ekihembo ekyo, thuwithe amaha awuwene.

⁵ Yehova abirihiraho Obwami bwa Masiya, obuthabali bw’elhubulha obukisiya ibwaghunzaho eriaghalhwa lyosi. Obwami obu bukendi syayira ekihugho mwa paradiso, omo obuli mundu akendi syabya omwa buholho n’etseme kera na kera. (Esyonyimbo 37:29) Eyindi nzira eya Yehova abirithukanganirya mw’olhwanzo ly’erithukangirirya ngoku thwangabya n’engebe eyuwene lino. Kandi akabugha athi thumusabe, kandi akabya iniana yitheghekire erihulikirira emisabe yethu. Yehova abirikangania ndeke-ndeke olhwanzo lhwiwe okwa buli mughuma w’okw’ithwe.

6. Wangakangania wuthi ku wukasima olhwanzo olhwa Yehova?

⁶ Wanga kangania wuthi ngoku wukasima olhwanzo lhwa Yehova? Mukanganaye ngoku wukasima ebyosi eby’abirikukolera. Eky’obulighe abandu bangyi munabwire sibali sima. N’omughulhu Yesu abya okwa kihugho hanabya abathesima. Buthuku bughuma Yesu mwalhamya abahagha ikumi, aliwe omughuma musa yuwamuha ewasingya. (Luka 17:12-17) Thwanzire ithwabya ng’omulhume oyuwaha Yesu y’ewasingya. Thutholere ithwabya thukaha Yehova y’ewasingya mughulhu wosi.

7. Thutholere ithwanza Yehova ya bungahi?

 ⁷ Nethu thutholere ithwakangania ngoku thwanzire Yehova. Yesu mwabwira abigha biwe athi batholere ibanza Yehova n’omuthima wabu wosi, n’engebe yabu yosi n’obulengekania bwabu bwosi. (Soma Matayo 22:37.) Ekyo kikamanyisayaki?

8, 9. Thwanga kangania thuthi Yehova ngoku thumwanzire?

⁸ Mbwino erikwama kya bugha thuthi thwanzire Yehova kikaghunza? Eyihi. Thwamanza Yehova n’omuthima, engebe, n’obulengekania bwethu bwosi, ithukendi kikangania omwa mikolere yethu ngoku thumwanzire. (Matayo 7:16-20) E Biblia yikakikanganaya ndeke-ndeke ngoku thwamabya ithwanzire Nyamuhanga, ithukendi kwama ebihano biwe. Mbwino ekyo kikalire? Eyihi, kundi “ebihano biwe si bikalire.”​—Soma 1 Yoane 5:3

⁹ Thwamowa Yehova, thukathunga engebe eyuwene kandi ey’etseme. (Isaya 48:17, 18) Aliwe, ni kyahi ekikendi thuwathikya eribya ithune bughuma na Yehova? Thulebaye.

10. Busana naki wutholere iwalholha embere erigha oku Yehova?

¹⁰ Wabya wuthi munywani wa Yehova? Erilhabira omw’igha e Biblia, wabiriminya Yehova ya ndeke kandi wabiribya munywani wiwe. Obunywani obu buli ng’omuliro owa wuthanzire akalima. Ngoku esyongwe sikaleka omuliro iniabya inianemwaka, nawu wukayithagha erilholha embere erigha oku Yehova nuku obunywani bwenyu bubye ibunaghumire.​—Emisyo 2:1-5.

11. Ebya wuk’igha omwa Biblia byanga kuhambako bithi?

¹¹ Wukendibya wunemulholha embere erigha e Biblia, wukend’igha emyatsi eyikakuhambako. Thalebya ngoku ababiri b’okw’abigha ba Yesu bayowa akabasoborera amaminyereri we Biblia. Mubabugha bathi: “Emithima yethu  muyithethahuhana omw’isi wethu akakania nethu omwa nzira, n’omughulhu alyathukaniraya Amasako kwehi?”​—Luka 24:32.

12, 13. (a) Ni kyahi ekyangahika oko lhwanzo olhwa thuwithire Nyamuhanga? (b) Thwanga kolha kyahi nuku erianza Yehova siriholhoke?

¹² Ngoku emithima y’abigha ba Yesu yanahambawako bakayitheghererya Amasako, nawu wanganabya iwabiriyowa wuthya wukatsuka eriyitheghererya e Biblia. Eki kyabirikuwathikya eriminya Yehova n’erimwanza. Si wanganza olhwanzo olhu lhukaholhoka.​—Matayo 24:12.

¹³ Wukabya wamabiribya munywani wa Nyamuhanga, wutholere iwahira h’akaghalha obunywani obo eribya ibunaghumire. Wutholere iwalholha embere erimwighako n’erigha oku Yesu kandi iwalengekania okwa bya wuk’igha kandi ngoku wanga bikolesya omwa ngebe yawu. (Yoane 17:3) Wukasoma kutse erigha e Biblia, yibulhaye: ‘Eki kikanyeghesayaki oku Yehova Nyamuhanga? Busana naki ngatholere  ingamwanza n’omuthima waghe wosi n’engebe yaghe yosi?’​—1 Timoteo 4:15.

14. Erisaba lyanga leka lithi olhwanzo olhwa thuwithire Yehova ilhwabya ilhunakamathire?

¹⁴ Wamabya n’omunywani mubuya, wukakanaya nayu mughulhu wosi, n’eki kikaleka obunywani bwenyu ibwabya ibunaghumire. Kuthya, omughulhu thukakanaya na Yehova mughulhu wosi omwa musabe, kikaleka olhwanzo olhwa thumuwithire ilhwakamatha. (Soma 1 Abanya Tesalonika 5:17.) Omusabe ni kihembo kibuyanga ekya Thatha wethu w’elhubulha abirithuha. Mughulhu wosi thutholere ithwamubwira ebiri okwa muthima. (Esyonyimbo 62:8) Si thutholere thukabya thukasubirira omwa misabe eya thwabirihambira omwa muthwe, aliriryo thutholere ithwamubwira ebikalhua okwa muthima. Kwenene, thwamalholha embere erigha e Biblia n’erisaba ebikalhua okwa muthima, ikikendi leka olhwanzo olhwa thuwithire Yehova ilhwabya ilhunakamathire.

15, 16. Omubiiri w’erithulira wukalhangiragho wuthi?

¹⁵ Thwamanza eribya ithune bughuma na Yehova thutholere ithwabwira abandi okw’ikirirya lyethu. Eribwira abandi oku Yehova ni lhusunzo lhubuyanga. (Luka 1:74) Kandi ni lhukwamirwa olhwa Yesu abiriha Abakrisitayo abosi ab’okwenene. Obuli mughuma w’okw’ithwe atholere iniathulhughania engulhu yuwene ey’Obwami bwa Nyamuhanga. Wanabiritsuka erikolha eki?​—Matayo 24:14; 28:19, 20.

¹⁶ Omukwenda Paulo mwalhangira omubiiri w’erithulira mw’ow’obughuli bunene, neryo amahulhagho mwa “butheke.” (2 Abanya Korinto 4:7) Eribwira abandi oku Yehova n’ekighendererwa kiwe w’omubiiri mukulhu owa wanga kolha. Ni nzira eyawanga kolera mwa Yehova, kandi akatsemera ebya wukamukolera. Kandi erithulira lyangana ghasira iwe  n’abakakuhulikirira kundi wukabya iwukawathikaya abandi nawu iwuwene-wene eriyithunda hakuhi na Yehova n’erisyabana engebe y’erikotha. (Soma 1 Abanya Korinto 15:58.) Ihanabya owundi mubiiri awanga kulethera etseme ng’oyu?

17. Busana naki omubiiri ow’erithulira ni w’erikolha omwa byalhuba?

¹⁷ Omubiiri w’erithulira akayithaghisibawa omwa byalhuba. Thutholere ithwathulha “engulhu yuwene . . . oko mughulhu mubi, kutse oko mughulhu owene.” (2 Timoteo 4:2) Abandu batholere ibowa ebihambire okwa Bwami bwa Nyamuhanga. E Biblia yithi: “Ekiro kinene ky’Omwami Mukulhu kiri hakuhi, kiri hakuhi kandi kikasa lhuba.” Enduli ‘siyendi malha!’ (Zefania 1:14; Habakuki 2:3) Omo kwenene, omwa buthuku obuthe bwahali, Yehova akayathoghothaya ekihugho kibi kya Sitani. Eki kithe kyabya, abandu bakayithagha erikungwa nuku bangathwamu erikolera Yehova.

18. Busana naki thutholere ithwaramya Yehova ithune haghuma n’abandi Bakristayo ab’okwenene?

¹⁸ Yehova anzire ithwamuramya ithune haghuma n’abandi Bakristayo ab’okwenene. E Biblia yithi: “Thughaniraye ngoku thwangibukania okwa lhwanzo n’emibiiri yuwene. Si thuleke erihindana lyethu haghuma, ng’emibere y’abandi bandu, nikwa thusikanaye. Kandi thuyitsinge omw’ebyo, omughulhu thukalhangira ekiro ky’Omukama kikahika hakuhi.” (Abaebrania 10:24, 25) Thutholere ithwalengaho kutsibu erihindana okwa mihindano yosi. Emihindano yikathuha akaghisa ak’erihimbangana n’erisikania emithima.

19. Ni kyahi ekyanga thuwathikya erianza Balikyethu Abakrisitayo?

¹⁹ Omughulhu wukahindana, wukabana abanywani abuwene abakendi kuwathikya eriramya Yehova. Wukendibana balikyethu muthina-muthina abakahira h’akaghalha ng’iwe erimuramya. Kandi nabu sibahikene ng’iwe kandi bakasobaya. Bamakusoberya, wutholere iwabaghanyira. (Soma Abanya Kolosai 3:13.) Mughulhu wosi wutholere iwatsomana  emibere mibuya y’abalikyethu Abakrisitayo, kundi ekyo ikikendi kuwathikya eribanza n’eriyithunda hakuhi na Yehova.

20, 21. “Engebe eyiri ngebe kundu” niki?

²⁰ Yehova anzire banywani biwe abosi ibabya omwa ngebe eyuwene. E Biblia yikathubwira ngoku omwa buthuku obukasa engebe yethu yikendi syabya y’embaghane kutsibu okwa ya thuwithe lino.

²¹ Obuthuku obukasa, thukendi syabyaho kera na kera, butsira ahabw’emyaka 70 kutse 80 misa. Thukendisya thunga “engebe y’erikotha” ithunawithe amaghalha awahikene, obuholho, n’etseme omwa paradiso. Eyo y’engebe eye Biblia yikahulha mwa “engebe eyiri ngebe kundu.” Yehova akalhaghanisaya erithuha engebe eyi, aliriryo thutholere ithwakolha ekyosi-kyosi “erihamba ndeke” engebe eyi.​—1 Timoteo 6:12, 19.

22. (a) Thwanga ‘hamba thuthi engebe eyiri ngebe kundu’? (b) Busana naki ahabwethu sithwanga tholera engebe y’erikotha?

²² Thwanga ‘hamba thuthi engebe eyiri ngebe kundu’? Thutholere ‘ithwakolha ebibuya’ n’eribya ‘batheke omwa mikolere eyuwene.’ (1 Timoteo 6:18) Eki kikamanyisaya kithi thutholere ithwaghendera okwa bya thuk’igha omwa Biblia. Aliriryo, eribana engebe eyi sikirisighikira okwa kaghalha kethu. Ahabwethu, sihali ngoku thwanga tholera engebe y’erikotha. Ni lhuhembo olhwa Yehova akaha abaghombe biwe abathaleghulha, akakangania ‘olhukogho’ lhwiwe. (Abanya Roma 5:15) Thatha wethu w’elhubulha anzire iniaha abaghombe biwe abathaleghulha b’olhuhembo olhu.

23. Busana naki wutholere iwathwamu ndeke lino?

²³ Yibulhaye, ‘Ngane muramya Nyamuhanga omwa nzira ey’akaligha?’ Wamalhangira aha wutholere iwakolha esyombinduka, isiwalindiriraya. Thwamayikethera Yehova n’erikolha ekyosi-kyosi ekya thwanga thoka erimukenga, Yehova iniakendibya busayiro bwethu. Akendibya iniane mutheya  abandu biwe abathaleghulha omwa biro by’enyuma-nyuma eby’ekihugho kibi kya Sitani kino. Neryo Yehova akendi syalhangira athi thukabya omwa paradiso kera na kera ngoku abiriyilhagha. Kwenene wangana thunga engebe eyiri ngebe kundu wamathwamu ndeke lino!