1, 2. Abaghuma b’okwa banywani ba Yehova ni bahi?

WANGANZA erinywana omundu oyuli athi? Omundu oyo wanzire. Omundu oyo mukakolangana nayu ndeke. Oyuwithe emibere eyuwene kandi eyikakutsemesaya.

² Yehova Nyamuhanga akasombolha abandi bandu eribya banywani biwe. Ng’eky’erileberyako, Abrahamu abya mughuma w’okwa banywani ba Yehova. (Isaya 41:8; Yakobo 2:23) Yehova mwanza na Dawudi. Mwabugha athi Dawudi abya ‘mundu oyo anzire.’ (Emibiri 13:22) N’omuminyereri Danieli abya mundu ‘oyukasimawa kutsibu’ na Yehova.​—Danieli 9:23.

3. Ni kyahi ekyaleka Abrahamu, Dawudi, na Danieli ibabya banywani ba Yehova?

³ Ni kyahi ekyaleka Abrahamu, Dawudi, na Danieli ibabya banywani ba Yehova? Yehova mwabwira Abrahamu athi: “Wabirikenga omulenge waghe.” (Enzuko 22:18) Yehova akabya munywani w’abakamwowa. Nibya n’ekihanda ky’abandu banganabya banywani biwe. Yehova mwabwira ekihanda kye Israeli athi: “Muhulikirire omulenge waghe, naghe nasyabya Nyamuhanga wenyu, nenyu mwasyabya bandu baghe.” (Yeremia 7:23) Nawu wutholere iwowa Yehova wamabya wanzire eribya munywani wiwe.

4, 5. Yehova akatheghaya athi abanywani biwe?

⁴ E Biblia yikabugha yithi Yehova anemusondekania enzira yosi-yosi “eriyikangya mo w’amaaka busana n’ab’omuthima  ahikene okw’iyo.” (2 Emyatsi y’Emigulu 16:9) Omwa Esyonyimbo 32:8, Yehova akalhaghanisaya banywani biwe athi: “Nasyakukangirirya enzira wangalhabamo; nasyakuhana n’erikweghesya.”

⁵ Enzighu y’amaaka yanzire iyalemesya obunywani bwethu na Yehova. Aliwe Yehova anzire erithutheya. (Soma Esyonyimbo 55:22.) Ithwe ng’abanywani ba Yehova, thukamukolera n’omuthima wosi. Thukasighalha ithune bathaleghulha okw’iyo n’omuthwangabya omwa mibere eyikalire yithi. Kandi thuwithe eriyikethera eriri ng’erya muhandiki w’esyonyimbo abya nalyo. Mwakania oku Yehova athi: “Kusangwa ali okwa byalha byaghe by’amali singendi syathundwa.” (Esyonyimbo 16:8; 63:8) Sitani akalengaho athi erithukakirya okw’ibya banywani ba Yehova?

6. Sitani mwathika-thikira athi abandu?

⁶ Omwa Sura 11 muthwalhangire ngoku Sitani mwahakanisya Yehova n’eribugha athi ni mubehi kandi athi syawithe obulingirirania omw’ithendi lighira Adamu na Eva eriyithwiramu ekihikire n’ekithahikire. N’ekitabu kya Yobu kikathubwira ngoku Sitani akahakanisaya abandu abakanza eribya banywani ba Nyamuhanga. Sitani akabugha athi bakakolera Nyamuhanga busana n’eby’akabaha, butsira ambu bamwanzire. Kandi Sitani akayipanga athi angana lhusya omundu wosi-wosi y’oku Nyamuhanga. Thulebaye ekya thwang’igha oku Yobu kandi ngoku Yehova amutheghaya.

7, 8. (a) Yehova mwalhangira Yobu y’athi? (b) Sitani mwabugha athiki oku Yobu?

⁷ Yobu abya inindi? Abya mulhume mubuya oyuwabyaho hakuhi myaka 3,600 eyihwere. Yehova mwabugha athi okwa buthuku obo okwa kihugho sikw’abya owundi mundu oyuwabya ng’iyo. Yobu abya asikirye Nyamuhanga  ya kutsibu, kandi aby’aponire ekibi. (Yobu 1:8) Kwenene Yobu abya munywani wa Yehova.

⁸ Sitani mwabugha athi Yobu akakolera Nyamuhanga busana n’eby’akamuha. Sitani mwabwira Yehova athi: “Sulithamuthimbya kw’ekikunda [kutse, olhughuthu] n’ekithunga kiwe, n’ebyosi awithe okwa mbande syosi kwehi? Wabiritsumulha omubiiri w’ebyalha biwe, n’obutheke bwiwe bwabirikanyirira omwa kihugho. Nikwa thahira ebyalha byawu lino, wuthule okwa byosi awithe, nayu akendi kutsuma embere w’obusu bwawu.”​—Yobu 1:10, 11.

9. Yehova mwalighira Sitani erikolhaki?

⁹ Sitani mwahangirira Yobu athi akakolera Yehova busana n’eby’akamuha. Kandi Sitani mwabugha athi angana lemesya Yobu erikolera Yehova. Yehova mwathaligha ebya Sitani, aliwe mwaleka Sitani alenge oku Yobu erilebya nga nina munywani wa Yehova busana n’erimwanza.

10. Sitani mwalenga athi oku Yobu, kandi Yobu mwakolhaki?

¹⁰ Erimbere Sitani mw’itha ebisoro bya Yobu ebyosi. Neryo amitha n’abaghombe ba Yobu bangyi. Yobu mwaherya ebyosi aby’awithe. Erighunzerera, Sitani mw’itha abaana ba Yobu ikumi omwa kihunga. Aliwe Yobu mwabya muthaleghulha oku Yehova. “Omwa byosi ebi, Yobu mwathakolha erilholho, kutse eriahulha Nyamuhanga omwa bukiru.”​—Yobu 1:12-19, 22.

11. (a) Ni kindi kyahi ekya Sitani akolha oku Yobu? (b) Yobu mwakolhaki?

¹¹ Sitani mwathalhuhirira. Mwahakanisya Nyamuhanga omw’ibugha athi: “Nikwa lino wukakaye ebyalha byawu wuthule ahali erikuha liwe n’omubiri wiwe, nayu akendi kutsuma embere sy’obusu bwawu.” Neryo Sitani mwaswirya Yobu y’omwa bulhwere obukalhuma kutsibu. (Yobu 2:5, 7) Kandi Yobu mwasighalha iniane muthaleghulha oku  Yehova. Mwabugha athi: “Erihika okw’iholha lyaghe singendi syaghana erithunganene lyaghe.”​—Yobu 27:5.

12. Yobu mwakangania athi ngoku Sitani ni mubehi?

¹² Yobu syabya asi ngoku Sitani abirimuhangirira kandi n’ekikaleka iniaghalhwa kutsibu. Mwalengekania athi Yehova yukamulethera ebitsibu. (Yobu 6:4; 16:11-14) Nomubyanabya bithya, Yobu mwasighalha muthaleghulha oku Yehova. Muhabya isihakiri erithika-thika. Yobu syabya akakolera Yehova busana n’eby’akamuha. Abya munywani wa Nyamuhanga kundi aby’amwanzire. Ebyosi ebya Sitani abugha abya mabehi.

13. Obuthaleghulha bwa Yobu mumwalhwiririraki?

¹³ Nomwakine indi Yobu mwathaminya ebyabya byabere elhubulha, mwasighalha muthaleghulha oku Nyamuhanga kandi mwakangania ngoku Sitani ni mubi. Yehova mwahemba Yobu busana n’eribya munywani oyutheleghulha.​—Yobu 42:12-17.

14, 15. Ni hangirira lyahi erya Sitani akahira okwa bandu abosi?

¹⁴ Ebyahika oku Yobu bikathweghesaya bingyi. Munabwire, Sitani akathuhangirira athi thukakolera Yehova busana n’eby’angathuhererya. Omwa Yobu 2:4, Sitani mwabugha athi: ‘Omundu anganaha ebyosi awithe busana n’engebe yiwe.’ Neryo kwesi Sitani akahangirira abandu abosi, butsira Yobu musa, athi bakakolera Yehova busana n’eby’akabaha. Myaka mingyi Yobu iniabiriholha, Sitani abya iniakinatsuma Yehova n’erihangirira abaghombe biwe. Ng’eky’erileberyako, omwa Emisyo 27:11, hakabugha hathi: “Mughalha waghe wubye n’amenge, n’eritsemesya omuthima waghe, inathoka erisubirya oyukanyitsuma.”

¹⁵ Wangana thwamu eriowa Yehova, iwabya munywani wiwe oyuthaleghulha, erikangania Sitani ku ni mubehi.  Nomukyangabya ikikakuyithaghisaya erikolha esyombinduka esikalire omwa ngebe yawu, iwe erithoka eribya munywani wa Nyamuhanga, iwukendibya iwamathwamu ndeke. Erithwamu eri si mwatsi w’amasatha. Sitani akabugha athi siwanga sighalha muthaleghulha oku Nyamuhanga wamabana ebitsibu. Akalengaho erithulemesya eribya bathaleghulha oku Nyamuhanga. Athi?

16. (a) Ni nzira syahi esya Sitani akakolesaya erianza erilemesya abandu erikolera Yehova? (b) Sitani anganza erikulemesya athi erikolera Yehova?

¹⁶ Sitani akakolesaya esyonzira nyingyi akanza erithulemesya eribya banywani ba Nyamuhanga. Ali “ng’endale, eyikaruruma n’erisonda-sonda oyo yangalya.” (1 Petero 5:8) Isikyakuswekaya banywani bawu, abahughu bawu, kutse abandi eribugha bathi wuleke erigha e Biblia n’erikolha ebyuwene. Iwangana yowa nga wamawirirwa n’endale. * (Yoane 15:19, 20) Sitani kandi ‘akayisosekanaya ng’omumalaika w’ekyakakalha.’ Neryo angana lengesya erithuthebya nuku sithwowe Yehova. (2 Abanya Korinto 11:14) Eyindi nzira eya Sitani akakolesaya eryanza erithulemesya erikolera Yehova ly’erianza thulengekanaye thuthi sithwanga tholera nahake erikolera Nyamuhanga.

17. Ni kyahi ekikaleka ithwowa Yehova?

¹⁷ Thwamowa Yehova, thukabya ithukakanganaya ngoku Sitani ni mubehi. Ni kyahi ekikendi thuwathikya eribya bowa? E Biblia yikabugha yithi: ‘Wasyanza Omwami Mukulhu Nyamuhanga wawu n’omuthima wawu wosi,  n’engebe yawu yosi, kandi n’akaghalha kawu kosi.’ (Eryibuka Ebihano 6:5) Thukowa Yehova kundi thumwanzire. Olhwanzo olhwa thuwithire Yehova lhukendibya lhunemuyongera, ithukendi anza erikolha ekyosi-kyosi eky’akabugha athi thukole. Omukwenda Yoane mwahandika athi: “Erianza Nyamuhanga ni kwama ebihano biwe, kandi ebihano biwe sibikalire.”​—1 Yoane 5:3.

18, 19. (a) Ebighuma by’okwa bindu ebya Yehova akabugha athi ni bibi by’ebyahi? (b) Thukaminya thuthi ngoku Nyamuhanga syali thusaba ebya thuthe thwanga thoka?

¹⁸ Aliwe ni byahi ebya Yehova akabugha athi ni bibi? Hane ebighuma by’okw’ibyo omwa kasanduku “ Pona Ebya Yehova Akapona.” Erimbere, iwangana lhangira n’ebighuma by’okw’ibyo nga si bibi. Aliwe wukabya wukasoma e Biblia n’erighanirya ndeke okwa bya wukasoma, wukayitheghererya amenge awali omwowa ebihano bya Yehova. Kandi iwangana yowa iwutholere iwakolha esyombinduka omwa ngebe yawu. Nomwakine indi okwa bundi buthuku  eki kyangana kalha, wamakolha esyombinduka esi iwukendi bana obuholho n’etseme ebikalhwiririra omw’ibya munywani oyuthaleghulha wa Nyamuhanga. (Isaya 48:17, 18) Thukaminya thuthi ngoku kinathokekene erikolha esyombinduka esi?

¹⁹ Yehova syali thuyithagha kw’ebya thuthe thwanga thoka. (Eryibuka Ebihano 30:11-14) Iyo ng’Omunywani, athwasi ndeke kwilhaba ngoku thuyasi. Anasi ebya thwanga thoka n’ebya thuthe thwanga thoka. (Esyonyimbo 103:14) Omukwenda Paulo mwabugha athi: “Nyamuhanga syali leghulha, siendi syaligha mukalengwako kwilhaba amaaka wenyu; nikwa omw’irengwako eryo asyabaha amaaka w’eriyiyinia n’enzira y’eribalha.” (1 Abanya Korinto 10:13) Thukayikethera ngoku mughulhu wosi Yehova akendibya inianemuthuha akaghalha ak’erikolha ebihikire. Akendikuha ‘obuthoki bunene’ erikuwathikya eriyiyinirya emibere eyikalire.​—2 Abanya Korinto 4:7.

20. Ni mibere yahi eya wutholere iwagherererya, kandi busana naki?

²⁰ Thwamabya thwanzire eribya banywani ba Yehova, si thutholere thukakolha eby’akabugha athi ni bibi. Aliwe isi thwasubuliraya aho. (Abanya Roma 12:9) Abanywani ba Nyamuhanga bakanza ebyanzire. Bakakanibawako omu Esyonyimbo 15:1-5. (Soma.) Abanywani ba Yehova bakagherereraya emibere yiwe n’erikangania “olhwanzo, obutseme, obuholho, eriyibombeka, obwenge, obubuya, erithendi leghulha, omuthima mwolho, n’eriyitheya.”​—Abanya Galatia 5:22, 23.

21. Wang’igha wuthi erikangania emibere eya Nyamuhanga anzire?

²¹ Wang’igha wuthi erikangania emibere mibuya ng’eyi? Wutholere iwigha ebya Yehova akanza omw’isoma n’erigha e Biblia mughulhu wosi. (Isaya 30:20, 21) Wukendibya wune mukolha eki, olhwanzo olhwa wuwithire Yehova, lhukendi yongera, n’olhwanzo olho lhukendibya lhune muyongera wukendianza erimwowa.

22. Wamowa Yehova iwukendi ghasirwa wuthi?

²² Esyombinduka esya wangakolha omwa ngebe syangana linganisibwa n’erilhusya esyongyimba esikulire n’eriambalha esyombyaka. E Biblia yikabugha yithi wutholere ‘iwaghabana n’omundu wa kera’ n’eriambalha ‘omundu muhya-muhya.’ (Abanya Kolosai 3:9, 10) Nomwakine indi sikyolho, omughulhu thukakolha esyombinduka esi n’eriowa Yehova, akathulhaghanisaya erithuha “olhuhembo lhunene.” (Esyonyimbo 19:11) Neryo kwesi, wutholere iwathwamu eriowa Yehova kandi iwakangania Sitani ku ni mubehi. Kolera Yehova, butsira busana n’olhuhembo olhw’angakuha, aliwe busana n’olhwanzo olhwa wumuwithire. Neryo aho iwukendibya munywani wa Nyamuhanga!