1. Ni kyahi ekyabya kikakakirya eka ya Adamu na Eva eringira omwa Edeni, kandi ni kyahi ekya Abeli abya anzire ikyabya?

ABELI mwathungerera ekihyo ky’esyombuli siwe isinemulya buholho okwa kithwe. Neryo obundi mwakyurukya ameso erithasyasamalira hali okw’aho, amalhangira ekiri nga kyakakalha ekiri hali. Abya inianasi ngoku aho h’ahali omuyali owakathimba owali kw’ekirimi ky’omuliro, erithimba mughulhu wosi, erikyinga enzira eyikaya omw’irima lye Edeni. Ababuthi biwe banabya bikereyo kera, lero lino ibo kutse abaana babu babya isibanga thasy’ingirayo. Thalengekania akayagha k’erithungyi kakalhaba omo nzwiri sya Abeli akalhalhamira elhubulha akaghanirya okwa Muhangiki. Obughuma obwabya ahakathi-kathi ka Nyamuhanga n’abandu bunemwendi syasasuba? Ekya Abeli abya anzire kyan’ekyo.

2-4. Abeli akabugha nethu athi munabwire?

² Abeli anemubugha nawu munabwire. Wunamwowire? Wangana bugha wuthi eki sikyanga thokekana. Wuthi nibya k’aholha kera-kera! Amakuha wiwe abulirana kera-kera omwa muthaka emyaka nga 6000 eyilhabire. E Biblia yithi: Abaholi “sibasiki.” (Omu. 9:5, 10) N’ekindi, sihali ekinywe ekyo Abeli abugha ekiri omwa Biblia. Neryo angabugha nethu athi?

³ Omukwenda Paulo mwasondolibwa n’omulimu abuyirire wa Nyamuhanga eribugha oku Abeli athi: ‘Busana n’erikirirya liwe, Abeli nomo anaholha, akinabugha.’ (Soma Abaebrania 11:4.) Abeli akinabugha erilhabira omuki? Omw’ikirirya. Abeli yuwabya mundu w’erimbere erikangania omubere mubuya owʼerikirirya. Mwakangania erikirirya linene indi omwa ky’erileberyako kiwe akabya ng’akineho. Nethu thwangana mugherererya munabwire. Thwam’ighira okwa kyʼerileberyako ekyʼerikirirya liwe n’erilengaho kutsibu erimugherererya, neryo obo erilhabira omo mwatsi ow’amuhambireko, Abeli iniakendibya ng’anemukania nethu ng’oyuliho.

⁴ Aliriryo ni byahi ebya thwang’ighira oku Abeli nʼokwa kyʼerileberyako ekyʼerikirirya liwe kandi nibya isyakanibweko kutsibu omwa Biblia? Thuthalebya.

5. Yesu amanyisayaki akakania oku Abeli ng’oyuwabyaho eritsuka omughulhu Nyamuhanga ahangika ekihugho? (Lebaya n’omwatsi ahikwa.)

⁵ Abeli abuthawa abandu imubamatsuka eribya okwa kihugho. Na Yesu mwanakania oku Abeli ng’oyuwabyaho ‘eritsuka omughulhu Nyamuhanga ahangika ekihugho.’ (Soma Luka 11:50, 51.) Ekihugho ekya Yesu amanyisaya b’abandu abanga thongolibirwe oko kibi. Nomwakine indi Abeli abya wakani eribyaho, akabya nga y’ow’erimbere erilhangirwa na Nyamuhanga ng’oyuwanga thongolibwa. * Ni kwenene, Abeli mwakulha isihali abangamubera ky’erileberyako kibuya.

6. Abeli abya awithe ababuthi abasosire bathi?

⁶ Nomwakine indi abandu babya imubanamatsuka eribya omwa kihugho, neryo niki mubabya ibali omwa bulighe bunene. Ababuthi ba Abeli, ya Adamu na Eva bangabya ibabya babuya okwa mubiri, abawithe akaghalha. Aliriryo mubabya ibamabiri yighusa omwa bitsibu ebikalire, kandi mubakilhangira. Batsuka ini bandu abahikene ab’eribyaho kera na kera. Aliriryo mubahalya oku Yehova neryo bamahighithwa omwa Paradiso, eririma lye Edeni. Ibo erihira esyongumbu syabu sy’embere kwilhaba ekindi kindu kyosi-kyosi, na kwilhaba abaana babu, mukyaleka ibaherya erihikana n’engebe y’erikotha.​—Enz. 2:15–3:24.

7, 8. Eva mwabugha athiki abiributha Kaina, kandi angabya iniabya akalengekania athiki?

 ⁷ Adamu na Eva babere babirithibithwako omwa Edeni, engebe muyabakalira. Omwana wabu w’erimbere mubamwahulha mwa Kaina, ni bugha ambu “ekiryabuthawa,” neryo Eva mwabugha athi: ‘Nabiributha omwana w’obulhume busana n’Omwami Mukulhu.’ Omwa binywe ebi, Eva akabya ng’abugha erikwamana n’obuminyereri obwa Yehova aha omwa Edeni athi omukali anga buthire “olhubutho” kutse omwana, oyuwanga ghunzire h’omubi oyuwaleka ibasobya. (Enz. 3:15, NW; 4:1) Mbwino Eva mwalengekania athi iyo ya mukali oyuwakanibawako omwa buminyereri kandi athi Kaina ‘lhw’olhubutho’ olhwa lhaghanisibawa?

⁸ Kyamabya ikwakiri kithya, imwathebwa. Kandi Eva na Adamu bamabya imubabwira Kaina ya bathya, imubaleka iniathungira emiyiheko ya bbule. Neryo Eva mwabutha owundi mwana ow’obulhume, lero iyo mwathamukaniako eby’erimuhamya. Mubamulhuka mwa Abeli, ekyangana manyisya “erihulhukya omuka,” kutse “kithawithe mughaso.” (Enz. 4:2) Erimuha erina ng’eri, mbwino mukyamanyisya kithi Abeli sibamuwithe mw’amaha ng’awabawithe omu Kaina? Obundi.

9. Ababuthi ba munabwire bang’ighiraki okwa babuthi b’erimbere?

⁹ Munabwire, ababuthi bangan’igha bingyi okwa babuthi b’erimbere aba. Munemwendi lethera abaana benyu b’emiyiheko, ebilhubirirwa ebithuwene, n’omuthima w’eriyitsomana omwa binywe byenyu n’emikolere yenyu? Kutse munemwendi bakangirirya eryanza Yehova n’eribawathikya erikolha obunywani nayu? Eky’obulighe, ababuthi b’erimbere mubalemwa olhukwamirwa lhwabu. Aliriryo habya ihakine amaha okwa baana babu.

10, 11. Kaina na Abeli babya bakakolha mibiiriki, kandi Abeli aby’awithe mubereki?

¹⁰ Abalhwana babiri aba babere banemukulha, Adamu angabya imwabakangirirya emibiiri eyanga wathikya eka. Kaina mwabya mulimi; Abeli mwabya mulisya.

¹¹ Aliriryo, Abeli mwakolha ekindi kindu ekilengire. Obuthuku bwabere bunemulhaba, mwabya n’erikirirya​—omubere mubuya ow’omukwenda Paulo akanayako. Thalengekania! Abeli sy’abya awithe ow’emibere mibuya ow’erigherererya. Ibbwa kwesi, mwathoka athi eribya n’erikirirya omu Yehova? Thalebya ebindu bikulhu bisathu ebyangabya iby’ebyaleka iniabya n’erikirirya.

12, 13. Erisamalira ebihangikwa bya Yehova kyangabya imukyawathikya kithi Abeli erikulha-kulhania erikirirya?

¹² Ebihangikwa bya Yehova. Kwenene Yehova abya iniabirithakira ekithaka, eribya kikalhasya amahwa n’emisaki-saki ebyaleka obulime ibwakalha kutsibu. Nomwabine, ekithaka ikikeraya ebyalya  ebyabya bikawathikya eka yabu Abeli. Yehova mwathathakira ebisoro, ebinyonyi n’esiswe, ebithwe, esyongetse, esyonyusi, ekyanya, ebithu, eryuba, okwezi, n’esyongununu. Ehosi eya Abeli abya akasamalira, mwalhangira ndeke olhwanzo, amenge n’obubuya bwa Yehova oyuwahangika ebindu ebyosi. (Abanya Roma 1:20.) Ahathe erithika-thika, erighanirya okwa bihangikwa ebi mukyaghumya erikirirya lya Abeli.

¹³ Omo kwenene, Abeli mwaghanirya okwa myatsi y’obunyakirimu. Thathera akasasani inianemulisya esyombuli. Eki kyabya kikayithaghisya erighenda-ghenda kutsibu. Iniakasithwalha okwa hithwa, omwa misya, okwa syonyusi​—mughulhu wosi iniakabya omw’isondekania ahali omuyonga, ahali amaghetse awuwene, ahali ekitsutsu. Omwa bihangikwa bya Nyamuhanga ebyosi, esyombuli sy’esyabya ng’esikayithagha kutsibu eritsomanwa, musyabya nga syahangikawa erisondolhwa n’omundu. Mbwino Abeli nayu mwanayilhangira ng’oyukayithagha obusondoli, eritheghibwa n’eritsomanwa n’omundu w’amenge manene kandi oyuwithe obuthoki kwilhaba abandu? Ahathe erithika-thika mwakikangania omwa misabe, neryo n’erikirirya liwe mulyayongera.

14, 15. Emilhaghe ya Yehova muyaleka Abeli iniaghanirya oku byahi?

¹⁴ Emilhaghe ya Yehova. Adamu na Eva bakathekawa eribya imubabwira abaana babu ebyabya omwa Edeni ebyaleka ibathibithwako. Busana n’ekyo, Abeli aby’awithe bingyi eby’erighaniryako.

¹⁵ Yehova mwabugha athi ekithaka kyanga thakirwe. Abeli mwalhangira ndeke-ndeke amahwa awa berereraya ebinywe ebyo. Yehova kandi mwabugha athi Eva asyabana obwaghali omwa bukule kandi akabutha. Abeli mwalhangira ebinywe ebi bikabererera abandi baana babu bakabuthwa. Yehova mwasangwa aminya ngoku Eva angayowire isyalibana olhwanzo olhukaghunza erilhua oku mwira wiwe kandi ngoku Adamu nayu angamuthabereko. Abeli mwalhangira ekindu ky’obulighe eki kikabya. Omwa buli mwatsi, Abeli mwalhangira ndeke ekinywe kya Yehova kikabererera. Esyonzumwa esi musyaleka Abeli iniayikethera kutsibu emilhaghe ya Nyamuhanga eyihambire okwa ‘lhubutho,’ kutse omwana, oyuwanga ghunzire h’obubi obwa tsuka omwa Edeni.​—Enz. 3:15-19.

16, 17. Abeli angabya imw’ighaki okwa bakerubi ba Yehova?

 ¹⁶ Abaghombe ba Yehova. Abeli syabya awithe okwa kihugho kw’ow’erigherererya. Aliriryo, ebihangikwa by’amenge okwa kihugho sibabya ib’abandu basa okwa buthuku obo. Adamu na Eva babere babirithibithwako omwa Edeni, Yehova mwalhangira athi ibo n’abaana babu sibali thasy’ingiramu. Erithoka erikyinga enzira eyikingirayo, Yehova mwahiraho abakerubi​—abamalaika b’ekitsumbi kinene​—haghuma n’omuyali owakathimba mughulhu wosi owali kw’ekirimi ky’omuliro.​—Soma Enzuko 3:24.

¹⁷ Thalengekania Abeli nga mwayowa athi akalhangira abakerubi iniakine mulere.Kundi babya ibabiribya ng’abandu b’omubiri, Abeli mwalhangira ku babya bawithe kaghalha kanene kutsibu. Kandi erilhangira “omuyali” oyo, buthuku bwosi iniane kw’ekirimi ky’omuliro, kandi iniane muthimba, mukyamuhambako kutsibu. Abeli abere anemukulha, mbwino muhanayira endambi amalhangira abakerubi abo ibabirilhuhirira n’erisighania omubiiri wabu? Eyihi. Omwa musibo n’omwa kiro, omwaka omwa wundi, n’emyaka omwa yindi, abamalaika b’akaghalha kanene aba mubabya ibane aha banahirawa. Eki mukyaleka Abeli iniaminya ngoku Yehova anawithe abaghombe abathunganene, kandi abatheleghulha. Abeli mwalhangira ngoku abakerubi aba ni bowa kandi bathaleghulha oku Yehova, ekindu eky’athalhangira okwa b’omw’eka yabu. Ahathe erithika-thika, eky’erileberyako eky’abamalaika eki mukyaghumya erikirirya liwe.

18. Ni byahi ebyanga leka ithwabya n’erikirirya munabwire?

¹⁸ Abeli mwayowa erikirirya liwe irine mughuma busana n’erighanirya okwa byosi ebyo Yehova ayibisulhako erilhabira omwa bihangikwa, emilhaghe yiwe, n’eby’erileberyako eby’abaghombe  biwe abamalaika. Eky’erileberyako kiwe kikathweghesaya bingyi, kwabithe? Kwilhabirirya abalere, kyangana baghumya bakaminya ngoku banganabya n’erikirirya ery’okwenene omu Yehova, ab’eka yabu nomubanga kolha ebiri mbaghane. Busana n’ebihangikwa by’eriswekya ebithuthimbireko, n’eribya ithunawithe e Biblia eyosi, kuthya n’eby’erileberyako bingyi eby’abandu abawithe erikirirya, sihali ekyanga leka ithuthabya n’erikirirya munabwire.

19. Obuthuku mubwahika Abeli amayitheghererya kindu kyahi kikulhu?

¹⁹ Abeli abere ane mw’ongera erikirirya Yehova, mwanza aminye ngoku anga hira erikirirya eryo omwa mikolere. Aliriryo ini kyahi eky’omundu angaha Omuhangiki ow’ebihangikwa byosi? Nyamuhanga syabya akayithagha kihembo kyosi-kyosi kutse obuwathikya erilhua okwa bandu. Aliwe obuthuku mubwahika Abeli amayitheghererya ekindu kikulhu kino: Amakwama kyaha Yehova y’ekibuya omwa by’awitheko omwa muthima owahenirye, ikikendi tsemesya Thatha wiwe w’olhwanzo ow’elhubulha.

20, 21. Kaina na Abeli, mubahongera Yehova yaki, na Yehova mwayowa athi?

²⁰ Abeli mwathegheka erihonga okwa mbuli siwe. Mwasombolha esyuwene, esyabya sy’erimbere, kandi n’erisombolha amaghabu aw’alhangira inianulire. Na Kaina nayu abere akanza athi Nyamuhanga amusime n’erimuha emighisa, mwathegheka obuhere erilhua omwa birimwa biwe. Aliriryo ekilhubirirwa kiwe sikyabya ng’ekya Abeli. Embaghane muyalhangirika bakahayo obuhere bwabu.

²¹ Baghalha ba Adamu aba bangabya abosi imubakolesya ebiherero n’omuliro bakaha obuhere bwabu, obundi ibana lhangire abakerubi, ababyaho okwa buthuku obo ng’abaghombe ba Yehova basa okwa kihugho. Yehova mwayowa athi? E Biblia yithi: ‘Yehova mwasima Abeli n’obuhere bwiwe.’ (Enz. 4:4) E Biblia siyiri thubwira nga mwakangania athi ngoku amasima.

22, 23. Ni kyahi ekyaleka Yehova iniasima ekihongwa kya Abeli?

²² Ni kyahi ekyaleka Nyamuhanga iniasima ekihongwa kya Abeli? Abeli mwahonga ekindu ekikahumulha, eryutha omusasi wakyo ow’obughuli. Mwanaminya obuhere ng’obo nga bwangabere bw’omughaso buthi? Habere halhaba myaka mingyi Abeli aliholire, Nyamuhanga mwakolesya ekihongwa eky’embuli eyithe k’obulema. Eki kyakanganaya ekihongwa ekya Mughalha wiwe-wiwe oyuhikene oyuli ‘Kyana ky’Embuli kya Nyamuhanga,’ oyuwanguthire omusasi wiwe owatheko lhubanza. (Yn. 1:29; Eri. 12:5-7) Aliriryo ebyosi ebi Abeli abya isy’abyasi.

²³ Nomwabine, ekya thwasi ndeke kya kino: Abeli mwahayo ekihongwa ekyuwene. Yehova mwathasima ekihongwa kisa aliriryo  n’oyuwahakyo. Eryanza Yehova n’erimwikiriryamu ndeke by’ebya leka Abeli iniakolha eki.

24. (a) Busana naki ekihongwa kya Kaina sikyabya kibi? (b) Kaina abya athi ng’abangyi munabwire?

²⁴ Kaina iyo mubithabya bithya. Yehova ‘mwathasima Kaina n’obuhere bwiwe.’ (Enz. 4:5) Si bugha ambu ekihongwa kya Kaina kyabya kibi, kundi nibya enyuma waho emighambo ya Nyamuhanga muyanalighira abandu erihonga ebirimwa. (Law. 6:14, 15) Aliwe e Biblia yikabugha yithi ‘emibiiri ya Kaina yabya mibi.’ (Soma 1 Yoane 3:12.) Ng’abandu banene munabwire, Kaina mwalengekania athi erithakwama kyalhangirwa buyira ng’oyune mukolera Nyamuhanga kikaghunza. Iyo erithendibya n’erikirirya ly’okwenene kutse eryanza Yehova mukyalhangirika omwa by’akolha.

25, 26. Yehova mwakunga Kaina athiki, aliwe Kaina mwakolhaki?

²⁵ Kaina abere abirilhangira athi Nyamuhanga syathamusima, mwananza erigherererya Abeli? Eyihi. Aliwe mwahithana n’eripona mughalha wabu oyo. Yehova mwalhangira ekiri omwa muthima wa Kaina kandi mwalengaho erimuwathikya erihengulha amalengekania wiwe. Mwamukunga ngoku emibere yiwe yikendi lhwiririramu ekibi ekikalire. Kandi mwamubwira athi iniakendi ‘syaliwa’ amabinduka okwa nzira yiwe nyibi.​—Enz. 4:​6, 7.

²⁶ Kaina mwathaghendera okwa bya Nyamuhanga. Mwabwira mughalha wabu athi baghende omw’irima. Babere bahika eyo mwamughulhukirako n’erimwitha. (Enz. 4:8) Neryo kwesi, Abeli yuwabya w’erimbere er’ithibwa busana n’erikirirya liwe. Nomwanaholha, ebiwe mubithahwera aho.

27. (a) Busana naki ithwaligha ngoku Abeli akendi syalhubuka? (b) Thwanga kolhaki erisyamulholhako?

²⁷ Omusasi wa Abeli mwabya ng’owamalirira Yehova indi habye erithuhulya, kutse obulingirirania. Na Nyamuhanga mwabuhiraho, kundi mwasuyira Kaina. (Enz. 4:9-12) Ekikulhu kutsibu, ebihambire okw’ikirirya lya Abeli biwithe ekya bikathubwira munabwire. Emyaka eya Abeli aghunza, obundi nga kikumi, yabya mike okwa ey’abandu babya bakaghunza okwa buthuku obo, aliwe mwakolesya emyaka yiwe eyo ya ndeke. Mwaholha inianasi ngoku Yehova amwanzire. (Ebr. 11:4) Kwesi sihali ekyangaleka ithuthaligha ngoku Yehova anamw’ibukire, kandi ngoku akendi syalhubukira okwa kihugho paradiso. (Yn. 5:28, 29) Nawu wunemwendi syingiramu wukamulholhako? Ee, wamathwamu erihulikirira Abeli akabugha nethu n’erigherererya erikirirya liwe.