1, 2. Omulebererya w’omuthimbo iniakathwalha athi ababya n’erikirirya abali omwa Biblia, kandi busana naki banganabya banywani babuya?

ABERE abirihulikirira omukania w’omulebererya w’omuthimbo oyuwabya omwa myaka y’obusyakulhu, mwali wethu mughuma mwabugha athi: “Akakanaya okwa bandu abali omwa Biblia ng’abanywani biwe.” Kandi kwenene mughalha wethu oyu abya iniabirighunza buthuku bungyi inianemw’igha Ekinywe kya Nyamuhanga n’erikikolesya akakangirirya erihika okw’ileka abalhume n’abakali abakakanibawako omwa Biblia ababya n’erikirirya ibabya nga ni banywani biwe ab’akulire nabu.

² Mbwino abandu b’omwa Biblia aba sibangabya banywani babuya? Wukana balhangira ng’abawangana nywana? Thalengekania nga wanga yowa wuthi wamabya iwunemulyatha nabu n’erikania nabu, erisiba n’abandu nga Noa, Abrahamu, Ruta, Eliya, na Esiteri wukanza eribaminya. Thalengekania okwa bya wanga b’ighirako, n’okwa binywe bibuya eby’erihabulha n’ebikahimba ebya banga kubwira!​—Soma Emisyo 13:20.

3. (a) Thwanga ghasirwa thuthi omw’igha okwa balhume n’abakali ababya bawithe erikirirya? (b) Ni bibulyo byahi ebya thukendi kaniako?

³ Omo kwenene, okwa mughulhu ‘w’erilhubuka ery’abathunganene,’ obunywani obuwene ng’obu bukendisyabya. (Emib. 24:15) Aliriryo na lino thwangana ghasirwa thwam’igha okwa balhume n’abakali ababya bawithe erikirirya aba. Thuthi? Omukwenda Paulo akasubiraya athi: ‘Mubye mukagherererya abikiriraya n’eriyiyinia n’eryangirira ebyo Nyamuhanga alhagha.’ (Ebr. 6:12) Thukayatsuka erigha okwa balhume n’abakali aba, thutsuke erikania okwa bibulyo bike ebikasa omwa malengekania busana n’ebinywe bya Paulo: Erikirirya niki, kandi busana naki thukaliyithagha? Thwanga gherererya thuthi ababya bawithe erikirirya?

4. Abandu bakathwalha bathi erikirirya, kandi busana naki kwabithe bithya?

⁴ Erikirirya ni mubere owakatsemesaya, omubere owa balhume n’abakali abathukend’ighako omwa kitabu kino bathwalha mwa kindu ky’omughaso munene. Abangyi munabwire basi bathi mbwino erikirirya ni kwama kyaligha emyatsi nomuwangabya isiwasi ekikaleka iwalighayo. Aliriryo kwabithe bithya. Erikirirya siry’erikwama kya ligha obuli kindu; si kwama kya yowa iwutholere eriligha. Omubere ng’oyu ni w’akabi. Eriyowa ng’eri lyanganahwa, kuthya n’erith’ikirirya buyira Nyamuhanga siririghunza,  kundi nibya ‘n’esyombinga nasyo sikikiriraya ekyo kandi sikasuka-sukana.’​—Yak. 2:19.

5, 6. (a) Erikirirya lyethu liseghemere okwa bindu byahi bibiri? (b) Erikirirya lyethu lyangabya lithi n’omusingyi owaghumire? Iha eky’erileberyako.

⁵ Erikirirya ery’okwenene likayithagha ekilhabire okw’aho. Th’ibuka ngoku e Biblia yikalisoborera. (Soma Abaebrania 11:1.) Paulo mwabugha athi erikirirya liseghemere okwa bindu bibiri ebya thuthe thwangalhangira. Eky’erimbere, liseghemere okwa bineho munabwire ebyo ‘thuthe lhangira.’ Ameso wethu syangalhangira ebiri elhubulha​—ng’eky’erileberyako, Yehova Nyamuhanga, Mughalha wiwe, kutse Obwami obunemuthabalha lino elhubulha. Ekyakabiri, erikirirya liseghemere okwa bindu ebyo ‘thukahira kw’amaha’​—emyatsi eyithe yabya. Nga lino sithwanga lhangira ekihugho kihya-kihya ekyo Obwami bwa Nyamuhanga bukisiya ibwaletha. Mbwino eki kikamanyisaya kithi erikirirya erya thuwithe omwa bithe lhangirawa ng’ebi siriwithe ekyalimanireko?

⁶ Eyihi! Paulo mwasoborera athi erikirirya ery’okwenene likabya n’omusingyi owaghumire. Abere akakania okw’ikirirya ‘ng’eriminya kundu’ ekyo wulindirire kwenene ko kikendibya, mwakolesya ekinywe ekyanganathasya hindulhwa mwa “ekihandiko ky’endaghano.” Ng’eky’erileberyako, omundu inianza erikuha enyumba. Omughulhu akakuhereraya ekihandiko ky’endaghano yayu, iniangana bugha athi: “Imaya, enyumba yawu yenu.” Akabya isyalimanyisaya athi olhupapura olho ya nyumba; akamanyisaya athi ekihandiko eki kiwithe obuthoki bunene erihika okw’ibya ikyangan’ahulhwa mwa nyumba. Kuthya n’erikirirya lyethu, ebya limanireko ni by’okwenene, kandi bighumire indi wangana bilinganisya n’erikirirya erya thuwithe.

7. Erikirirya ery’okwenene mwamuliki?

⁷ Neryo kwesi erikirirya ery’okwenene mwamuli eribya iwunakakasirye indi ebyawasi ni kwenene, kandi iwunalighire ndeke ngoku biseghemere oku Yehova Nyamuhanga. Erikirirya likaleka ithwamulhangira nga Thatha wethu w’olhwanzo n’eriyikethera ndeke ngoku emilhaghe yiwe yosi yikendi syabererera. Aliriryo erikirirya ly’okwenene silirisubulira aho. Iryo erithoka eribyaho likayithagha erilisibwa ng’ekindu ekikahumulha. Litholere irya kanganibwa omwa mikolere, bithe bithya irikendi holha.​—Yak. 2:26.

8. Busana naki ni kikulhu eribya n’erikirirya?

⁸ Busana naki ni kikulhu kutsibu eribya n’erikirirya? Paulo mwaha enzumwa eyuwene. (Soma Abaebrania 11:6.) Thuthawithe erikirirya sithwanga yithunda hakuhi na Yehova kutse erimutsemesya. Busana n’ekyo, erikirirya likayithayisibawa kutsibu thwamabya ithuli b’eriberererya ekighendererwa kikulhu eky’obuli kihangikwa ky’amenge eky’eriyithunda hakuhi na Thatha wethu w’elhubulha, Yehova, n’erimuha olhukengerwa.

9. Yehova abiri kikangania athi kw’anasi ko thukayithagha erikirirya?

 ⁹ Yehova anasi kwa thukayithagha erikirirya, busana n’ekyo akathuha eby’erileberyako ebyanga thukangirirya ngoku thwanga himba erikirirya lyethu n’eririkangania. Akahira omwa kithunga mw’abalhume abawithe erikirirya abakasondolha. Ekinywe kiwe kikabugha kithi: ‘Gherereraya erikirirya lyabu.’ (Ebr. 13:7) Kandi sib’abo basa. Paulo mwakania okwa ‘ndeko nene y’abalhangiri,’ abalhume n’abakali abakera ababirithuhirira h’eky’erileberyako ekyuwene eky’erikirirya lyabu. (Ebr. 12:1) Abathaleghulha abo Paulo athondogholha omwa kitabu kya Abaebrania sura 11 si b’abo basa. Omwa Biblia mune emyatsi eyihambire okwa balhume n’abakali, abalere n’abakulhu, ab’emibere yosi, abakanganaya erikirirya kandi abathwang’ighira kwa bingyi omwa mughulhu ono owali mw’abandu abathawithe erikirirya.

10. Eriyeghesya lyethu lyanga thuwathikya lithi erithoka erigherererya ababya bawithe erikirirya?

¹⁰ Siwanga gherererya omundu wuthalyatsuka erimuyitheghererya ndeke. Wukendibya wunemusoma ekitabu kino, wukendilhangira ngoku erisekulya linene lyabirikolhwa erikuwathikya eriyitheghererya abalhume n’abakali aba ababya bawithe erikirirya. Busana naki nawu iwathongera erisekulya habwaghu? Wukayeghesya, sekulhaya ndeke omwa Biblia omw’ikolesya ebitabu byethu. Wukaghanirya okwa bya wuk’igha, lengaho erithera akasasani ngoku byabya n’ebyosi ebyabyaho. Ni bugha ambu eribya nga wunasamalire aha byabya, nga wunowire emirenge, n’eribya nga wunemubeherwa ebiriho. Ekikulhu kutsibu, lengaho eriminya eriyowa ly’abawukasomako. Wukendibya wunemulengaho kutsibu eriyihira omwa bisandu by’abalhume n’abakali ababya bawithe erikirirya aba, ibakendibya ng’abandu abawunasi, kandi abawubeghere​—n’abandi ibakendi kubera ng’abanywani abawukulire nabu.

11, 12. (a) Ni kyahi ekyangaleka iwayowa Abrahamu na Sara ibabiribya ng’abanywani bawu? (b) Wanga ghasirwa wuthi omwa ky’erileberyako kya Hana, Eliya kutse Samweli?

¹¹ Wukendibya wabiribaminya ndeke, iwukendyanza eribagherererya. Ng’eky’erileberyako, thalengekania iwunemughanirya okwa lhusunzo lhuhya-lhuhya olhwa wabirihebwa. Omwa kithunga kya Yehova, iwabya wabirikokibwa erikanyirirya omubiiri wawu w’erithulira omwa nzira ndebe. Obundi iwabwirwa indi wughende eyiri obuyithawa bw’abathuliri, kutse iwabwirwa indi wukolesaye enzira ndebe y’erithulira eya wuthabeghere kutse eya wukayowa isiwanga thoka. Wunemulengekania okwa lhusunzo olhu n’erikihira omwa misabe, mbwino sikyangabya kya mughaso erighanirya okwa ky’erileberyako kya Abrahamu? Iyo na Sara babya ibanayitheghekire erisighania omuyi mubuya owe Uri kandi mubatsumulhwa kutsibu  busana n’erikolha ekyo. Wukendibya wunemukwama olhughobe lhwabu, wukendi yowa kwenene iwabiribaminya ndeke kwilhaba ngoku wulhue wubasi.

¹² Kandi ibbwa omundu amakukolha nabi neryo kikakughunza mani, wukanza n’erithendi ghenda okwa mihindano? Wamaghanirya okwa ky’erileberyako kya Hana ngoku asingura akasekereryo ka Penina, kyangana kuwathikya erithwamu ndeke​—kandi ikyangana leka Hana iniabya nga munywani wawu. Kandi wamahwa amani busana n’eriyowa nga siwutholere, Eliya inianganabya munywani wawu omughulhu wukend’igha okwa bitsibu eby’alholhako kandi ngoku Yehova amuhumulikanaya. N’eminyethu eyikabana akahathikano erilhua okwa banyasukuru balikyabo abatswatswa, Samweli anganabya munywani wabu enyuma w’erigha ngoku abya akolire omughulhu abya haghuma n’abaghalha ba Eli ab’emitse mibi.

13. Mbwino erigherererya erikirirya lyabene kyanganaleka erikirirya erya wangabya nalyo iryathasimwa na Yehova? Soborera.

¹³ Mbwino erigherererya erikirirya lyabene kyanganaleka erikirirya erya wangabya nalyo iryathasimwa na Yehova? Eyihi nahake! Wibuke ngoku Ekinywe kya Yehova kikathuhira mw’omuhwa ow’erigherererya abandu abawithe erikirirya. (1 Kor. 4:16; 11:1; 2 Tes. 3:7, 9) Nibya kandi n’abandi abathukend’ighako, nabu bagherereraya ababya n’erikirirya abatsuka eribyaho okw’ibo. Ng’eky’erileberyako, omwa Sura 17 ey’ekitabu kino, ebya Maria abugha bikakanganaya ngoku angabya imwaghanirya okwa binywe bya Hana n’erimuthwalha ng’eky’erileberyako ekyuwene. Eki mukyanaleka erikirirya lya Maria irithaghuma? Eyihi nahake! Aliriryo eky’erileberyako kya Hana mukyawathikya Maria erihimba erikirirya eriwe erihika okw’ithoka eriyikolera erina libuya embere sya Yehova.

14, 15. Ni byahi ebiri omwa kitabu kino, kandi byanga thuwathikya bithi?

¹⁴ Ekitabu kino kikolirwe busana n’erikuwathikya erighumya erikirirya lyawu. Esyosura esikakwamako ye myatsi eyiwithe omuthwe “Gherereraya Erikirirya Lyabu.” eyabya yikasira omwa syo Watchtower esya 2008 erihika 2013. Aliriryo hane ebyabiri thasyongerwamu. Mwabirihirwa ebibulyo eby’erithuwathikya omw’ikanirania kandi ngoku thwanga kolesya omwatsi. Mwabiryongerwa ebisasani bingyi ebyuwene n’erikolhwa mwa binene-binene. N’okwa bindi ebirimo ebyanga thuwathikya, mune ahakakanganaya erisubungukana ly’emyaka n’ebyabya, kandi n’esyomapu. Ekitabu Gherereraya Erikirirya Lyabu kikolirwe busana n’eriyeghesya, erik’igha ng’eka, n’erik’igha omwa kithunga. Amaka mangyi angana thwamu erisomera haghuma emyatsi eyi omwa mulenge owakowika.

¹⁵ Leka ekitabu kino kikuwathikaye erigherererya erikirirya ly’abaghombe ba Yehova abakera. Kandi leka kikuwathikaye erikulha-kulhania erikirirya lyawu wune muyithunda hakuhi na Thatha wawu w’elhubulha, Yehova!