1, 2. (a) Busana naki Hana syabya n’etseme akayitheghekera olhughendo? (b) Omwatsi wa Hana angana thughasira athi?

HANA mwahwerya amalengekania wiwe okw’ithegheka olhughendo akanza erilhusyagho okwa bikamulyambaya. Butholere eribya ibwabya buthuku bw’etseme; Abya mubere wa Elkana, mwira wiwe, erithwalha eka yosi omwa lhughendo olhwabya lhukabya obuli mwaka olhu eriyaramirya eyiri e hema, e Silo. Yehova abya anzire obuthuku obu ibwabya bw’etseme. (Soma Eryibuka Ebihano 16:15.) Kandi ahathe erithika-thika, Hana erilhua bulere iniakatsemera emikonga eyo. Lero lino habya ihamabirilhaba buthuku isyakiri n’etseme eyo.

² Mwabana omulhume oyuwabya amwanzire kutsibu. Aliriryo, Elkana mwira wiwe mwathahya owundi mukali. Abya in’iyo Penina, kandi akabya ng’abya anzire inianubya Hana. N’omwa syongendo esy’obuli mwaka esi, Penina iniakalhangira athi ak’aghaliranaya Hana ya kutsibu. Athi? Kandi ekikulhu kutsibu, erikirirya lya Hana mulyamuwathikya lithi erighumira emibere eyabya nga siyangahwaho eyi? Wamabya iwune omwa bitsibu ebikakughunza kw’etseme, omwatsi wa Hana iniangana kuhimba.

3, 4. Ni bitsibu byahi bibiri ebinene-binene ebya Hana abana, kandi busana naki ebyosi byabya bikalire?

³ E Biblia yikathubwira okwa bitsibu binene-binene bibiri ebya Hana abya awithe. Syabya awithe eky’angakolha okwa kitsibu eky’erimbere, nibya n’ekyakabiri. Ekitsibu ky’erimbere, abya ahalikanibwe, neryo kandi mulikyabu iniamuponire. Ekyakabiri, abya ngumba. Eki ni kitsibu ekikalire erighumira okwa mukali wosi-wosi oyuwanzire abaana; aliriryo omwa buthuku bwa Hana ikikaletha obulighe bunene kutsibu. Omwa buli ihiika, abaana ibabakaleka erina ly’eka irithahwaho. Eribya ngumba ikikalhangirawa ng’ekitsumi kandi ng’ekikahemulha.

⁴ Hana angana ghumire ebitsibu ebi Penina kwatha mwendererya. Erithahya abakali banene irikaletha ebitsibu binene. Imukabya  obuha, amalhwa, n’erilhumya omuthima. Omutse oyu mwathwa omusingyi owa Yehova ahiraho omwa Edeni, ow’eribya n’omukali mughuma. (Enz. 2:24) Ebyabya omw’eka ya Elkana bikakanganaya ngoku e Biblia siyirisighika omwatsi w’erithahya abakali banene.

5. Ni kyahi ekyaleka Penina inianza eriaghalya Hana, kandi mwakikolha athi?

⁵ Hana yuwabya mukali omwanze. Abayuda bakabugha bathi Elkana mwatsuka erithahya Hana neryo amathasyathahya Penina ihamabirilhaba emyaka. Neryo kundi Penina abya awithe erihali linene oku Hana, mwalhangira athi akakolha ekyosi-kyosi eryaghalirania Hana. Ekya Penina abya alengirye Hana, iyo iniakabutha. Penina mwabutha-buthania, neryo emiyiheko yiwe iyikongera akabutha obuli mwana. Omwakanya k’erikwira Hana y’obulighe n’erimuhumulikania, Penina ibbwa iyo iniakamusekereraya. E Biblia yikabugha yithi Penina mwenderererya Hana yo kutsibu busana ‘n’erimuthithimania’ kutse erimubulisya obuholho. (1 Sam. 1:6) Penina abya akakighenderera. Anza erihithania Hana, kandi kwenene mukyabya.

6, 7. (a) Ni kyahi ekyangabya ikyaleka Hana iniathabwira Elkana y’ebyosi, nomwanalengaho erimuhumulikania? (b) Mbwino Hana eribya ngumba, kyamanyisaya kithi Yehova amuponire? Soborera. (Lebaya n’omwatsi ahikwa.)

⁶ Kikalhangirika ngoku obuthuku bw’erighenda e Silo bwa Penina angabya iniabya akakolesya kutsibu eryendererya Hana. Elkana iniakaha obuli mwana wa Penina y’erighabo ly’eriherera Yehova. Aliwe, Hana ngʼomukali mwanzwa, iniakathunga erighabo eryʼembaghane. Neryo Penina iniakayitumaya embere sya Hana n’erimusubiramu kw’ali ngumba neryo ikyaleka in’ikira okwa kiriro n’ebyalya ibyamwoghoka okwa bunu. Elkana mwalhangira ngoku hali ebikalyambaya Hana omwanze wiwe kandi ngoku syalirya, neryo mwalengaho erimuhumulikania. Mwamubulya athi, ‘Hana, wukaliraki, kandi busana naki siwulirya, na busana naki omuthima wawu ali n’obulighe kwehi? Ingye sinyirengire abaghalha ikumi busana nawe kwehi?’​—1 Sam. 1:4-8.

⁷ Ekibuya, Elkana mwaminya ekikalyambaya Hana ngoku ly’eribya ngumba. Kandi ahathe erithika-thika, mukyatsemesya Hana, Elkana akamukakasya kwamwanzire. * Aliriryo Elkana mwathakania okwa bubi bwa Penina; kandi e Biblia siyirithubwira yithi na Hana mwamubwira okwa bya Penina abya akamukolhako. Obundi mwalhangira eribisulha ebya Penina akamukolhako lyanga mwongere obulighe. Mbwino kwenene Elkana angana wathikirye? Eribwira  Elkana sikyangalekire Penina ak’ongera erighaya Hana, kandi sikyangalekire abaana n’abaghombe biwe nabu bakamunubya? Hana iniakongera eriyowa buli kiro nga si w’omw’eka eyo.

8. Wamalhangira nga wukaghayawa kutse erikolhwa nabi, busana naki kikahumulikanaya eryibuka ngoku Yehova ni Nyamuhanga w’obulingirirania?

⁸ Mbulha Elkana mwalhangira akaghayo ka Penina kutse eyihi, Yehova iyo mwalhangira ebyosi. Ekinywe kiwe kikathubwira ebyosi ebyabya. Eki kikakanganaya ngoku sihali ekyathwanga bisa Yehova, nomubwangabya obuha buke kutse eripona abandi. Okwa lhundi lhuhandi, kyangana humulikania abathe kw’olhubanza n’ab’obuholho, nga Hana, bakaminya ngoku Nyamuhanga ow’obulingirirania akalhungulha emyatsi okwa buthuku bwiwe kandi ngoku kitholere okw’iyo. (Soma Eryibuka Ebihano 32:4.) Obundi Hana abya inianasi ekyo, kundi mwasaba Yehova y’obuwathikya.

9. Hana erithwamu erighenda e Silo nibya inianasi ebya mulikyabu akendi mukolhako, kikathweghesayaki?

⁹ Omwa ngyakya-ngyakya, obuli mundu wosi eka, nibya n’abaana, abya inianemuyitheghekera olhughendo. Eka nene eyi yabya iyikayaghenda olhughendo lhw’esyokilomita nga 32 erilhaba omwa kihugho ky’ebithwe ekye Efuraimu erihika e Silo. Babya ibakendi ghunza kiro kighuma kutse bibiri ibanemughenda omwa bisandu. Hana abya inianasi ebya mulikyabu akendi mukolhako. Aliriryo, Hana mwathathwamu erisighalha eka. Busana n’ekyo, mwahira h’eky’erileberyako kibuya okwa baramya ba Nyamuhanga erihika na munabwire. Omughulhu abandi bakathukolha nabi, isithwaleka ekyo kikathukakirya eriramya Nyamuhanga. Bithe bithya, ithukendi thalha okwa mighisa eyangaleka ithwayiyinia.

10, 11. (a) Ni kyahi ekyaleka Hana iniaghenda okwa hema ya Yehova akanahika? (b) Omwa musabe, Hana mwabwira athi Thatha wiwe ow’elhubulha ebyosi ebiri okwa muthima?

¹⁰ Erighunzerera, abosi ng’eka ibamabirighunza ekiro kyosi ibanemulhabangana omwa bithwe, mubalhangira e Silo okwa kathwe akathimbirweko ehithwe ehiri-hiri. Babere bane museghera hakuhi, Hana angabya iniabya inianemulengekania okwa by’anga bwira Yehova omwa musabe. Babere babirihika, mubalya haghuma. Hana iyo mwayisununulha okwa bandi n’erighenda okwa hema ya Yehova. Omuhereri mukulhu Eli abya inianeyo, inian’ikere hakuhi n’enzeghuliro. Aliriryo amalengekania wa Hana awosi abya oku Nyamuhanga wiwe. Iniane ahali ehema aho, mwasika ngoku Thatha wiwe w’elhubulha angamwowire, abandi nomubanga ghanire eriyitheghererya ebitsibu biwe. Obulighe bwiwe mubwalithohya omuthima wiwe, neryo amatsukiraho eririra.

 ¹¹ Hana abere anemusekemuka, mwasaba Yehova omwa muthima. Eminywe yiwe misa iya yikabbasangulhaya akalengekania ngoku angasoborera eriyowa liwe. Mwasaba ahabw’abuthuku buuli akabwira Thatha wiwe ebyosi ebiri okwa muthima wiwe. Aliriryo, mwathakwama kya bwira Nyamuhanga ngoku akayithagha eributha omwana lisa. Hana mwanza kutsibu erihebwa emighisa erilhua oku Nyamuhanga, aliriryo kandi nayu iniananzire eriha Nyamuhanga y’ekyosi-kyosi ekyanga thoka. Neryo mwayilhagha athi amabutha omwana ow’obulhume, iniakendi muhayo oku Yehova erimukolera kera na kera.​—1 Sam. 1:9-11.

12. Erisaba lya Hana likathweghesayaki?

¹² Busana n’ekyo, erisaba lya Hana ni ky’erileberyako kibuya okwa baghombe ba Nyamuhanga abosi. Yehova anzire abandu biwe ibamubwira ebyosi ebiri okwa mithima, ahathe erisaghirira, erimubwira ebyosi ebikabalyambaya ng’omwana oyuyikethere thatha wiwe w’olhwanzo angakolha. (Soma Esyonyimbo 62:8; 1 Abanya Tesalonika 5:17.) Omukwenda Petero mwasondolibwa erihandika ebinywe ebikahumulikanaya ebihambire okw’isaba Yehova athi: ‘Muhire erihangya-hangya lyenyu lyosi oku Nyamuhanga, kusangwa akabatheghaya.’​—1 Pet. 5:7.

13, 14. (a) Eli mwaghunzerera lhuba-lhuba athiki oku Hana? (b) Ngoku Hana asubiraya Eli mukyahiraho kithi eky’erileberyako kibuya eky’erikirirya?

¹³ Aliriryo, abandu sibali lhumirirawa abandi nga Yehova. Hana abere anemulira n’erisaba, mwasisira akowa omulenge w’omundu. Abya ini Eli, omuhereri mukulhu, oyuwabya inianamulhangire. Mwabugha athi: ‘Wasyathamira erikolyahi kwehi? Wuyilhusaye kw’ebinyu byawu.’ Eli abya iniabirilhangira Hana kw’akabbasangulhaya eminywe, erisekemuka kandi kwabya ayithwire. Omwakanya k’erimubulya nga hali kitsibuki, mwakwama kya ghunzerera athi athamire.​—1 Sam. 1:12-14.

¹⁴ Ka kyangabya imukyahithania Hana ya kutsibu omulhume ow’ekitsumbi kinene erithamuhangirira athya! N’omw’eki mwahira h’eky’erileberyako ekyuwene eky’erikirirya. Mwathalighira ebisobyo by’omulhume oyu bikamulemesya eriramya Yehova. Mwasubirya Eli omwa syongeso n’erimusoborera ekitsibu kiwe. Eli mwasubirya, obundi omwa mulenge owuwene n’owahehere athi: ‘Wughende buholho, Nyamuhanga wa Israeli alighe erisaba lyawu erya wulyasaba.’​—1 Sam. 1:15-17.

15, 16. (a) Hana mwaghasirwa athi eribwira Yehova y’ebyosi ebiri okwa muthima n’erimuramirya eyiri ehema? (b) Eky’erileberyako kya Hana kyanga thuwathikya kithi omughulhu nethu thuli omwa bulighe?

¹⁵ Hana mwaghasirwa athi eribwira Yehova y’ebyosi ebiri okwa muthima n’erimuramirya eyiri ehema? E Biblia yikabugha yithi: ‘Neryo omukali oyu mwaghenda athya, kandi mwalya, n’obusu  bwiwe isibukiri n’obulighe kandi.’ (1 Sam. 1:18) Hana mwahumulikana, kundi mwabya ng’oyuwamasumbira omuheke w’obulighe bwiwe w’okwa bithigho by’omundu oyuwithe akaghalha kanene kwilhaba akiwe, nayo ini Thatha wiwe w’elhubulha. (Soma Esyonyimbo 55:22.) Hane ekitsibu kyosi-kyosi ekyanga mulema? Eyihi​—sikiri kyathabyaho, si kyangabyaho, kandi si kyendi syabyaho!

¹⁶ Omughulhu thukayowa ithulithoherwe, kutse ithuli omwa bulighe bunene, thutholere ithwakwama eky’erileberyako kya Hana omw’ibwira Oyo e Biblia yikahulha ‘mw’oyukasubiraya erisaba’ y’ebyosi ebiri okwa muthima. (Esy. 65:2) Thwamakolha ekyo ithun’ikirirye, nethu ithukendi lhangira obulighe bwethu bukahwa, ithwathunga ‘obuholho bwa Nyamuhanga obulhabire amenge wosi.’​—Fil. 4:6, 7.

17, 18. (a) Elkana mwakangania athi ngoku akasighika eriyilhagha lya Hana? (b) Penina mwalemwa athi oku Hana?

¹⁷ Engyakya, Hana mwasuba eyiri ehema bana Elkana. Angabya iniabya iniabiri bwira Elkana okw’isaba n’eriyilhagha liwe, kundi Emighambo ya Musa yabya yikabugha yithi omulhume abya awithe ehamuli ey’erighana eriyilhagha erya mukali wiwe akakolha iyo isyasi. (Emig. 30:10-15) Aliriryo, omulhume muthaleghulha oyu mwathakolha ekyo. Aliwe, iyo na Hana mubaramya haghuma Yehova eyiri ehema bathe basuba ewabu.

¹⁸ Penina mwaminya mughulhu wahi ngoku syanga thasyathoka erihithania Hana? E Biblia siyiri thubwira, aliriryo yikabugha yithi Hana mwaghenda ‘obusu bwiwe isibukiri n’obulighe,’ erikangania ngoku eritsukiraho mwatsema. Aliwe, Penina mwalhua iniakiminya ngoku eby’akayikolesaya sibyanga thasyahithania Hana. E Biblia si yiri thasyahulha erina liwe erilhwiririra naho.

19. Hana mwabana mughisaki, kandi mwakangania athi ngoku mwaminya aho mughisa oyo alhua?

¹⁹ Ebiro byabere bine mulhaba, amalengekania wa Hana awathekene mumwalhwiririra etseme nene kutsibu. Mwabya mukule! Omwa tseme nene eyi, Hana mwathibirirwa nahake ah’omughisa owamabana oyu ngʼakalhua okundi. Omwana abere akabuthwa, Hana mwamulhuka mwa Samweli, ekikamanyisaya “Erina lya Nyamuhanga” kandi kikalhangirika ngoku iry’eribirikira okwa lina lya Nyamuhanga, nga Hana kw’akolha. Lero omwaka oyo, mwathaghenda na Elkana n’ab’eka yiwe e Silo. Mw’ikalha eka ahabw’emyaka isathu erihika ah’omwana atsirira amabere. Neryo mwatsuka erithegheka amalengekania wiwe busana n’ekiro ekyo anga hereyo mughalha wiwe omwanze oku Yehova.

20. Hana na Elkana mubaberererya bathi eriyilhagha lyabu oku Yehova?

 ²⁰ Erighabulhana n’omwana wiwe sikyabya kyolho. Ni kwenene, Hana abya inianasi ngoku Samweli akendi lemberwa ndeke e Silo, obundi erilemberwa na bakali ababya bakakolera eyiri ehema. Nomwabine, abya iniakine mwana kutsibu, kandi ni mubuthi wahi oyuthe wanganza eribya n’omwana wiwe? Aliriryo, Hana na Elkana mubathwalha omwana wabu, isihali erikakwa, kandi ibanatsemire. Mubahayo obuhere okwa nyumba ya Nyamuhanga, n’erihambya Samweli ya Eli, n’erimw’ibukya eriyilhagha erya Hana abya iniabirikolha emyaka eyilhabire.

21. Omusabe wa Hana mwakangania athi erikirirya liwe linene? (Lebaya n’akasanduku Emisabe Ibiri ya Hana.)

²¹ Hana mwaha omusabe owa Nyamuhanga alhangira athi atholere eribya omwa Kinywe kiwe. Wukasoma ebinywe biwe ebiri omwa 1 Samweli 2:1-10, wukendi bana erikirirya liwe linene irinakanganibwe omwa buli mulhondo. Mwapipa Yehova busana n’erikolesya ndeke obuthoki bwiwe​—amaaka wiwe awalengethukire aw’erikehya abakayihamaya, eritsumulha abera, eriherya engebe kutse nibya erilhamyayo okwa lhuholho. Mwapipa Thatha wiwe busana n’obubuyirire bwiwe, obulingirirania, n’obuthaleghulha bwiwe. Ahabw’enzumwa mbuya, Hana mwabugha athi: ‘Sihali wundi mwimiri [olhukuka, NW ] nga Nyamuhanga wethu.’ Yehova ni w’eriyikethera mughulhu wosi kandi syali hinduka, ni busayiro bw’abera n’abakaghalibawa abakamusaba obuwathikya.

22, 23. (a) Thukaminya thuthi ngoku Samweli mwakulha inianasi ababuthi biwe ku bamwanzire? (b) Yehova mwongera eritsumulha athi Hana?

²² Omulhwana Samweli abya w’omughisa erithunga mama oyuwabya awithe erikirirya linene omu Yehova. Nomwakine indi kwenene angabya imwanabya akakwa mama wiwe y’olhukando, mwathayowa  nga babirimwibirirwa. Obuli mwaka, Hana iniakalethera Samweli y’akakanzu ak’angambalha akakolha omubiiri w’okwa hema, e Silo. Iniakasona ehikanzu ehyo erikangania ngoku anzire n’eritsomana mughalha wiwe. (Soma 1 Samweli 2:19.) Thathera akasasani iniane mwambalya mughalha wiwe y’akakanzu akahyaka, erimuthonda koko, erimusamalira inianatsemire, kandi inianemukania nayu ebinywe ebyuwene n’ebikahimba. Samweli abya w’omughisa erithunga mama oyuli ng’oyu, kandi mwakulha amaghasira ababuthi biwe n’Abaisraeli abosi.

²³ Hana nayu mwath’ibiriranwa. Yehova mwamutsumulha, neryo amabuthira Elkana y’abandi baana bathanu. (1 Sam. 2:21) Obundi ibbwa owundi mughisa munene owa Hana abana, bwabya ibw’obughuma bwiwe na Thatha wiwe, Yehova, obwabya ibunemuyongera kutsibu. Ambi nawu eki ikyakubyako wukagherererya erikirirya lya Hana.