1, 2. (a) Omugheni mwaramukya Maria y’omwa mibereki? (b) Maria abya athi omwa mughulhu w’erithwamu erikalire?

MARIA mwathungerera inianathikire, akalhangira omugheni oyuwamamwasira. Omugheni oyu mwathamubulya okwa babuthi biwe. Asira Maria! Maria mwaminya omugheni oyu kwa syalilhua omwa Nazareti. E Nazareti abya muyi muke, omugheni iniakaminyikalha. Kandi ibbwa omugheni wa Maria iyo abya wa mbaghane kutsibu. Mwaramukya Maria omwa mibere y’embaghane, athi: ‘Wabukire, iwe mutsumulhwa. Yehova ali haghuma nawu.’​—Soma Luka 1:26-28.

² Hano e Biblia yikathubwira oku Maria ow’omwa tawuni ye Nazareti eye Galilaya, mwali wa Heli. E Biblia yikatsuka erimukaniako iniane omwa mughulhu w’erithwamu erikalire. Abya iniakisiya iniaherukibwa na Yozefu, omurandi, omulhume oyuthabya awithe bindu bingyi, aliriryo abya awithe erikirirya. Neryo Maria angabya iniabya inianayitheghekire eriwathikania na Yozefu mwira wiwe n’erikolha haghuma obutheke omwa ngebe y’ebindu bike eyo. Aliriryo abere akine aho, amahikirwa omugheni oyuwathumawa na Nyamuhanga Yehova erimuha olhukwamirwa olhwanga bindwire engebe yiwe.

3, 4. Erithoka eriminya Maria ya ndeke, ni byahi ebya thuthatholere thukatsomana, aliriryo thutsomane byahi?

³ Abangyi bakasweka eribya e Biblia isiyiri kanaya bingyi oku Maria. Yikakanaya bike okw’ikulha liwe n’emibere yiwe kandi siyiri kanaya ekyosi-kyosi okwa bubuya bwiwe. Aliwe ebya Biblia yikamukanayako bikaleka ithwamuminya ndeke.

⁴ Eriminya Maria ya ndeke, sithutholere thukaghendera okwa bya madini akamukanayako. Neryo sithutsomane emibere eya bakamukanganirayamu omwa bisasani. Kandi isithwatsomana esyongangirirya esikahira okwa mukali mwolho oyu kw’ebitsumbi by’erimuhamya nga “Mama wa Nyamuhanga” na “Omwami-kali w’Elhubulha.” Aliriryo thutholere ithwatsomana ebya Biblia yikamukanayako bisa. Yikathubwira ndeke okw’ikirirya liwe kandi ngoku thwanga ligherererya.

5. (a) Eriyowa lya Maria okw’iramukya lya Gabrieli likathweghesayaki? (b) N’isomo lyahi likulhu erya thukighira oku Maria?

⁵ Omugheni wa Maria syabya mundu. Abya ini malaika Gabrieli. Abere akabwira Maria athi ‘iwe mutsumulhwa,’ Maria ‘mwahangya-hangya omuthima’ busana n’ekinywe ekyo n’eriyibulya okw’iramukya ly’embaghane eri. (Lk. 1:29) Nindi oyuwabya iniamamutsumulha kutse erimusima kutsibu? Maria syabya akalengekania athi omwa bandu hali wangamusima kutsibu n’erimuhamya. Aliriryo malaika amanyisaya erisimwa na Yehova. Ekyo kyabya kindu kikulhu kutsibu omwa ngebe yiwe. Aliriryo nomwanatsema busana n’erisimwa na Nyamuhanga, eki mukithaleka akabya mw’emiyiheko. Eky’erileberyako kya Maria kikathweghesaya ku thutholere ithwalengaho erisimwa na Yehova, aliwe isithwabya n’emiyiheko busana n’erisimwa eryo. Kundi nibya Nyamuhanga akalhwa n’abakayiheka, aliriryo akakanganaya olhukogho okwa bakayikehaya.​—Yak. 4:6.

6. Omulaika mwabisulira Maria ya lhusunzoki?

⁶ Maria abya akayithagha omubere ow’eriyikehya, kundi ekya malaika amubisulira lhwabya lhusunzo lhunene kutsibu. Mwamubwira ngoku akendi syabutha omwana oyukendi syabya w’omughaso munene. Gabrieli mwabugha athi: ‘Omukama Nyamuhanga asyamuha ekithumbi ky’obwami kya thatha-kulhu wiwe, kandi asyathabalira ekihanda kya Yakobo kera na kera, n’obwami bwiwe sibwendi syahwa.’ (Lk. 1:32, 33) Maria abya inianasi ndeke omulhaghe wa Nyamuhanga abugha busana na Dawudi owabya iniamabiri ghunza emyaka eyilhabire omu rukumi, owakabugha athi omwa lhubutho lhwiwe mwasyalhua oyuwasyathabalha kera na kera. (2 Sam. 7:12, 13) Kwesi mughalha wa Maria abya iyukendisyabya Masiya oyo abandu ba Nyamuhanga babya ibamabirighunza myaka mingyi ibanalindirire!

7. (a) Ekibulyo kya Maria mukyamukangania ng’omundu oyuli athi? (b) Ni kyahi ekya minyethu eya munabwire yik’ighira oku Maria?

⁷ N’ekindi, omulaika mwabwira Maria athi omwana oyu akendi ahulhwa mwa ‘Mughalha wa Nyamuhanga w’Endatha Kutsibu.’ Kyangathokekene kithi omundu eributha mughalha wa Nyamuhanga? Aliriryo kwenene, Maria angabuthire athi omwana kandi nibya isyali aherukira Yozefu? Na Maria nayu mwayibulya ekibulyo ekyo akabugha athi: ‘Ingye ngathe ngatha bana mulhume ko omwatsi oyu angabya athi kwehi?’ (Lk. 1:34) Omwa binywe ebi, Maria mwathakwa isoni eribugha athi syali athabana mulhume. Aliriryo, Maria iyo mwalhangira  ini kitsumbi eribya isyali athabana mulhume. Munabwire, eminyethu mingyi yikayitsungira omwa myatsi y’engyingo isibali bathahibwa neryo ibatsuka eritsweba abathe bikolha. Ekihugho kyabiri hinduka. Aliriryo, Yehova iyo syali athahinduka. (Mal. 3:6) Ng’omwa biro bya Maria, Yehova akina lhangira abakaghendera okwa misingyi yiwe mwa b’omughaso.​—Soma Abaebrania 13:4.

8. Maria nomwanabya isyahikene, angabuthire athi omwana oyuhikene?

⁸ Maria syabya ahikene, nomwanabya mughombe muthaleghulha wa Nyamuhanga. Neryo, kwesi angabuthire athi omwana oyuhikene, mughalha wa Nyamuhanga? Ekyo Gabrieli mwakisoborera athi: ‘Omulimu abuyirire asyakuhikako, n’obuthoki bw’ow’Endatha Kutsibu bwasyamusukulirya. Busana n’omwatsi oyo, omwana abuyirire oyo wasyabuthwa asyahulhwa mwa Mughalha wa Nyamuhanga.’ (Lk. 1:35) Ekibuyirire kikamanyisaya “eky’erire,” “ekihenirye.” Nikya buhangwa abandu abathahikene, erisighalirya abaana babu b’obuthahikana bwabu. Oku Maria, Yehova abya iniakendi kolha ekithiko-thiko eky’embaghane. Abya iniakendimya engebe ya Mughalha wiwe erilhua elhubulha n’erihirayo omw’ibunda lya Maria neryo iniakolesya akaghalha kiwe, omulimu abuyirire eriswika Maria busana n’eritheya omwana okw’isighalya ekibi. Mbwino Maria mwaligha ebyo malaika abugha? Mwakolhaki?

9. (a) Busana naki abakahakanisaya emyatsi bawire erithika-thikira ekyabya oku Maria? (b) Gabrieli mwaghumya athi erikirirya lya Maria?

⁹ Abakahakanisaya emyatsi, n’abandi abasomire ebya madini kikabakalira eriligha bathi omundu oyuthe wathabana mulhume anganabutha. Nomubanasomire bingyi, bakalemawa eriyitheghererya n’ekwenene eyinalhangirikire. Malaika Gabrieli mwakibugha athi, ‘oku Nyamuhanga sihali ekithethokekana.’ (Lk. 1:37) Maria mwaligha ebinywe bya Gabrieli ko ni kwenene, kundi abya mumbesa w’erikirirya linene. Aliriryo, erikirirya liwe si ryabya ly’ekinya mwirima. Ng’omundu wosi-wosi ow’amenge, Maria mwanza aminye ebyangaleka inialigha. Gabrieli abya inianayitheghekire erimubwirabyo. Mwamubwira okwa muhughu wiwe iya Elizabeti oyuwabya asibwe ng’engumba, ngoku Nyamuhanga abirileka iniaheka obukule!

10. Busana naki sithutholere thukalengekania thuthi olhukwamirwa lhwa Maria simwabya bitsibu?

¹⁰ Maria angakolireki? Abya atholere eriberererya olhukwamirwa olho ahebawa kandi iniamabiriminya ngoku Nyamuhanga akendi kolha ebyosi ebyo Gabrieli alyabugha. Isithwalengekanaya thuthi olhusunzo olhu si lhwabya mwa bitsibu. Ng’eky’erileberyako, angabya imwayibulya Yozefu ng’anemwendi thasyamuherukya abiriminya ku ni mukule. N’ekindi angabya imwayowa olhukwamirwa  olhw’ahebawa olhu nga lhukalire kutsibu kundi abya iniakayaheka omwa nda yiwe mw’ekihangikwa kikulhu kya Nyamuhanga​—Mughalha wiwe omwanze! Abya atholere erilembera omwana oyu n’erimutheya okwa kihugho kibi. Kwenene olhu ka lhwabya lhukwamirwa olhukalire!

11, 12. (a) Okwa bundi buthuku, n’abalhume ab’erikirirya erighumire ibakakolhaki Nyamuhanga akabaha olhukwamirwa? (b) Ebya Maria asubiraya Gabrieli mubya mukangania ng’omundu oyuli athi?

¹¹ E Biblia yikakanganaya ngoku n’okwa bundi buthuku, nibya n’abalhume ab’erikirirya erighumire ibakanasagha eriligha olhukwamirwa olhukalire erilhua oku Nyamuhanga. Musa mwaghana eribya mbuyi ya Nyamuhanga kundi athi syasi eribugha ndeke. (Eri. 4:10) Yeremia mwabugha athi syendi thoka omubiiri owo Nyamuhanga amamuha ‘kusangwa ni mulhwana.’ (Yer. 1:6) Na Yona mwathibitha amasagha omubiiri owo ahebawa! (Yona 1:3) Kandi ibbwa Maria?

¹² Ebinywe eby’abugha omwa bwolho-bwolho n’eriyikehya ni by’omughaso munene okwa bosi abawithe erikirirya. Maria mwasubirya Gabrieli athi: ‘Ingye indi mughombe wa Yehova! Kinyibyeko ngoku wabiribugha.’ (Lk. 1:38) Omughombe w’obukali iniakabya mughombe w’ahisi kutsibu; engebe yiwe yosi iyikasondolhawa n’omukama wiwe. Na Maria mwayowa ikwali athya embere sya Mukama wiwe Yehova. Mwaminya ngoku Yehova akendi mutheya, ngoku Yehova ni muthaleghulha okwa bathe leghulha, kandi ngoku akendi tsumulha akaghalha ak’akahiraho omwa lhukwamirwa olhukalire olhu.​—Esy. 18:25.

13. Nyamuhanga amathuha omubiiri owathukalhangira ng’akalire kutse nga syanga thokekana, eky’erileberyako kya Maria kyanga thughasira kithi?

¹³ Okwa bundi buthuku Nyamuhanga anganathuha omubiiri owa thukalhangira ng’akalire kutse nga syanga thokekana. Aliriryo, erilhabira omwa Kinywe kiwe, akathubwira ebyangaleka ithwamuyikethera, ithwayihira omwa byalha biwe ngoku Maria akolha. (Emi. 3:5, 6) Thunemwendikolha thuthya? Thwamakolha thuthya, akendi thutsumulha neryo ikyaleka ithwamuyikethera kutsibu.

14, 15. (a) Yehova mwaleka athi Maria iniaghasirwa omw’ibungira Elizabeti mukali wa Zekaria? (b) Ebinywe bya Maria ebiri omu Luka 1:46-55, bikamukanganaya ng’omundu oyuli athi?

¹⁴ Oku Maria ebya Gabrieli abugha oku Elizabeti byabya by’omughaso munene. Elizabeti musa yuwangaminyire obulitho bw’emibere ey’abyamu. Maria mwanguha eriya e Yuda, ekihugho ky’ebithwa,  erighunza biro bisathu kutse bbini omwa nzira. Abere akahika ewa Elizabeti mukali wa Zekaria omuhereri, Yehova mwakolha ekindi kindu ekya ghumaya erikirirya lya Maria. Elizabeti abere akowa eriramukya lya Maria, omwana mwayisumba omonda ya Elizabeti n’obutseme. Neryo Elizabeti mw’usulibwa n’omulimu abuyirire neryo amahulha Maria mwa ‘koyo w’Omukama waghe.’ Nyamuhanga abya iniabiri bisulira Elizabeti ngoku mughalha wa Maria yukendi syabya Mukama, Masiya. Kandi mwasondolhwa n’omulimu abuyirire erisingya Maria busana n’eribya mwowa omw’imubwira athi: ‘Obutseme buli okwiwe wukikiriraya.’ (Lk. 1:39-45) Omwa kwenene, ebya Yehova alhagha Maria byabya ibikendi bererera!

 ¹⁵ Na Maria mwakania. Eby’abugha binahandikire ndeke omwa Biblia. (Soma Luka 1:46-55.) Omwa bya Maria abirithakania omwa Biblia, oyu wa mukania muuli, kandi akakanganaya emibere yiwe. Omwa binywe biwe ebi, akalhangirika kw’awithe omubere w’erisima kundi mwasingya Yehova busana n’olhusunzo lhw’eribya mama wa Masiya. Erikirirya liwe erighumire likalhangirika akakania oku Yehova ng’oyuka panza-panza abakayiheka n’erihamya abakayikehaya abanzire erimukolera. Kandi kikakanganaya ngoku abya awithe amenge. Kikakanganibawa indi angabya imwanabugha okwa byabya omwa masako w’Ekihebrania awalhabire oku 20! *

16, 17. (a) Maria na mughalha wiwe mubakangania bathi omubere owa thutholere ithwagherererya? (b) Maria eribungira Elizabeti, kikathukanganaya mughasoki okwa bunywani?

¹⁶ Ahathe erithika-thika, Maria iniakaghaniraya okwa Kinywe kya Nyamuhanga. Kandi mwasighalha inianayikehirye, iniakanza erikolesya Amasako butsira eribugha eby’akalengekanaya. Kandi endambi muyahika, n’omwana oyuwabya omo nda yiwe amakangania eriyikehya ng’eri, omughulhu abugha athi: ‘Ebyo ngakangiriraya si byaghe, nikwa ni by’oyuwanyithuma.’ (Yn. 7:16) Kyuwene eriyibulya: ‘Ngana kanganaya erisikya ng’eri n’erikenga Ekinywe kya Nyamuhanga? Kutse nganza inaghendera okwa byanga lengekanaya?’ Maria iyo mwakolha ekihikire.

¹⁷ Maria mwikalha na Elizabeti habw’amezi ng’asathu, abosi ibanemuhimbangana. (Lk. 1:56) Omwatsi owali omwa Biblia owahambire okwa lhubungo olhu, akathukanganaya ngoku obunywani ni kindu ky’omughaso. Thwamabya n’abanywani abanzire Nyamuhanga wethu Yehova, ithukendi kulha bunyakirimu n’eriyithunda hakuhi nayu. (Emi. 13:20) Neryo endambi ya Maria erisuba eka muyahika. Yozefu angabughire athiki akaminya omwatsi wa Maria?

18. Ni kyahi ekya Maria abwira Yozefu, kandi Yozefu mwayowa athi?

¹⁸ Maria mwathalinda obukule eritsuka eriminyikalha athali abwira Yozefu. Aliriryo, athali amubwira angabya imwalengekania omulhume mubuya kandi oyusikirye Nyamuhanga ng’akendi yowa athi. Syabya awithe eky’erikolha, mwamuhikako amamubwira ebyosi ebya muhikireko. Nawu ngoku wangana kilhangira, eki mukyalyambya Yozefu ya kutsibu. Angabya imwananza eriligha ebya mumbesa oyu amubwira, aliwe imwayowa iniabirimughoberya. E Biblia siyiri bugha ebya Yozefu abya akalengekania. Aliriryo yikabugha yithi mwathwamu erimukomolha. Omwa buthuku  obo ababya ibakisiya ibaherukania ibakathwalhawa ng’abathahenie. Kundi mwathanza erimuhemulha omwa bandu, neryo mwathwamu erimukomolha bubiso-biso. (Mt. 1:18, 19) Maria angabya imwayowa nabi akalhangira omulhume mwolho oyu akalirikana busana n’omwatsi oyu. Aliriryo, Maria mwathamuswekera.

19. Yehova mwawathikya Yozefu y’athi erithwamu ndeke?

¹⁹ Yehova mwawathikya Yozefu erithwamu ekihikire. Omwa nzoIi, malaika wa Nyamuhanga mwamubwira ngoku ni kwenene Maria aheka obukule omwa nzira y’ekithiko-thiko. Eki ka kyangabya imukyamuhumulikania! Neryo Yozefu mwaligha erighendera okwa kya Yehova akendi bugha nga Maria kw’akolha. Mwaherukya Maria, n’eriyitheghekera olhukwamirwa lhw’embaghane olhw’erilembera Mughalha wa Yehova.​—Mt. 1:20-24.

20, 21. Ni kyahi ekya abathahenie n’abakayitheghekera eringira omwa butheke bang’ighira oku Maria na Yozefu?

²⁰ Abathahenie n’abakayitheghekera eringira omwa butheke batholere ibagherererya eky’erileberyako ekya Yozefu na Maria ababyaho myaka nga 2,000 eyihwere. Yozefu abere anemulhangira Maria akakolha emibiiri y’obutheke, angabya imwasima malaika wa Yehova eribya imwamuhabulha ndeke. Yozefu mwalhangira omughaso w’eriyikethera Yehova wukathwamu. (Esy. 37:5; Emi. 18:13) Ahathe erithika-thika iyo ng’omuthwe w’eka angabya imwabya akayitheya kutsibu akathwamu.

²¹ Kandi thwanga bugha thuthiki, oku Maria eribya imwaligha eriherukira omundu oyuwamuthika-thikira? Nomwakine indi Yozefu mwathika-thikira ebya Maria amubwira, Maria mwalindirira ekya Yozefu akendi thwamu kundi yuwangabere muthwe w’eka. Erisomo erya Maria igha likaghasira n’abakali Abakrisitayo munabwire. Erighunzerera, emyatsi eyi yangabya imuy’eghesya Yozefu na Maria ekibuya ekiri omw’ikanirania omo kwenene.​—Soma Emisyo 15:22.

22. Obutheke bwa Maria na Yozefu bwabya buseghemere okuki, kandi babya ibakayathunga lhumimbiki?

²² Yozefu na Maria mubatsuka obutheke bwabu okwa musingyi owaghumire ndeke. Abosi babya banzire Yehova ya kutsibu kandi ibanzire erimutsemesya ibo ng’ababuthi. Aliriryo embere yabya iyinemwasira emighisa mingyi, kuthya n’ebitsibu. Babya ibanalindirire olhumimbi olhw’erikulya Yesu, oyuwabya iniakendi syabya mulhume w’omughaso munene omwa kihugho kyosi.