1. Kanaya okwa bulighe obwa Marata abyamu kandi n’ekyaleka.

MARATA abya inianemulengekania ngoku mughalha wabu ane omw’isinda, omwa mwangalhu owabya athekire kw’eribwe. Obulighe obw’abyamu bwabya bulithohire okwa muthima wiwe ng’eribwe eryo. Abya isyangatha leka erilengekania ngoku mughalha wabu ey’anzire athya abiriholha. Ebiro bbini ebyo Lazaro aghunza inianaholire mubwabya nga ni buthuku buuli bw’erilirikana, n’abagheni ibanemwasa eribahumulikania.

2, 3. (a) Marata mwayowa athi Yesu akamuhikako? (b) Ebinywe eby’omughaso ebya Marata abugha mubya muminyikalya ng’omundu oyuli athi?

² Marata abere akine aho, mwalhangira Yesu oyuwabya munywani wa Lazaro. Eki kyangabya imukyamwongera obulighe, kundi Yesu abya in’iyo musa omwa kihugho kyosi oyuwangalhamirye mughalha wabu. Aliriryo Marata mwahumulikanibwa Yesu akamuhikako ewabo eyo, hakuhi n’omuyi we Betania owabya okwa kithwe. Omwa buthuku buke obo, olhukeri olhwabya omwa meso wa Yesu mulhwamuhumulikania. Mwamubulya ebibulyo ebyamuwathikaya erihira amalengekania w’okw’ikirirya liwe n’amaha w’erilhubuka. Babere banemukania, Marata mwahika n’okw’ibugha ebinywe by’omughaso munene omwa buno bwiwe athi: ‘Nabirikirirya ko wuli Kristo Mughalha wa Nyamuhanga Oyukasa omwa kihugho.’​—Yn. 11:27.

³ Ebinywe bya Marata ebi bikakanganaya ngoku abya mukali w’erikirirya erighumire. Ebike ebya Biblia yikamukanayako byangana thuwathikya erighumya erikirirya eryethu. Erilhangira ngoku eki kyangabya, thulebaye ebya Biblia yikabugha yikatsuka erikania oku Marata.

4. Ni bahi aba Marata abya ikere nabu, kandi babya bathi bughuma na Yesu?

⁴ Myezi mike ahanyuma, Lazaro abya inianakalire. Babya ibakayathunga omugheni w’omughaso munene, ya Yesu Kristo, omw’eka yabu e Betania. Lazaro, Marata, na Maria babya babuthenwe haghuma kandi ibikere omwa nyumba nguma ibanakulire. Abandi abakasekulhaya okwa myatsi bakanabugha bathi Marata anganabya iyuwabya  mukulhu w’abandi, kundi yuwasulhusutha kutsibu akatheghekera Yesu kandi okwa bundi buthuku, yukatsuka eryahulha abosi basathu bakakanibwako. (Yn. 11:5) Sihali ekikakanganaya indi Marata na Maria mubanathahibwa, kutse Lazaro eribya imwanathahya. Mbulha muban’ingira omwa butheke kutse eyihi, ekya thwasi, babya banywani ba Yesu. Omughulhu Yesu abya akathulira e Yudea, ey’abanira eryendereribwa erikalire, iniakabya ewabu. Ahathe erithika-thika, mwatsemera kutsibu obuholho obwabya omw’eka eyo n’erimusighika.

5, 6. (a) Busana naki Marata yuwasulhusutha kutsibu Yesu akababungira? (b) Maria mwakolhaki Yesu akahika ewabu?

⁵ Marata iniakalengaho kutsibu erilhangira indi eka yikabya iyine mw’obuholho busana n’erikokya abagheni. Ng’omukali mukoli, angabya iniabya akakolha kutsibu. Eki mukyalhangirika n’omughulhu Yesu ababungira. Mwatheghekera omugheni wabu ow’embaghane n’ab’angabya imwasa nabu. Okwa buthuku obo, erikokya kyabya kikulhu kutsibu. Omugheni iniakabya akahika iniakathangirirawa omw’imulyatsirira, ibamulhusya ebiryathu biwe, ebisando biwe ibyanabibwa, n’omuthwe wiwe iniahakabibwa amaghutha aw’akakumba ndeke. (Soma Luka 7:44-47.) Omugheni iniakatsomanawa kutsibu, iniahebwa ah’erikesya ahuwene n’ebyalya.

⁶ Marata na Maria mubakolha kutsibu bakatheghekera Yesu oyuwendi babungira. Nomwakine indi Maria akalengekanibawa eribya iyuwabya akanza kutsibu er’igha, angabya imwatsuka eriwathikya mwali wabu okwa mibiiri. Aliwe Yesu abere abirihika, mwalhangira iniamabana akaghisa ak’erikangirirya, kandi ekyo ky’anabya akolire! Erithendibya ng’abasondoli b’edini ab’omwa buthuku obo, Yesu iyo iniakasikaya abakali kandi mwabakangirirya okwa Bwami bwa Nyamuhanga, owabya mwatsi mukulhu w’erithulira liwe. Maria abere alhangira Yesu akakangirirya, mw’ikalha hakuhi nayu n’erihulikirira obuli kinywe.

7, 8. Busana naki Marata mwayiponera omwa muthima, kandi mwakikangania athi?

⁷ Thalengekania okw’iyiponera eryabya omwa muthima wa Marata! Busana n’eriyithimbako akathegheka ebyalya muthina-muthina n’erikolha eyindi mibiiri habw’abagheni, mukyaleka iniongera erihangya-hangya n’eriyibulha-bulha. Abere anemubalhaba-lhabako, n’erilhangira mwali wabu kw’anikere buyira isyalimuwathikaya, mbwino mwanathuna obusu, amayisolya, kutse erimulholha ebitsule? Sikyangaswekya amabya imwanayithwa athya. Kwenene syanga thokire erikolha emibiiri eyosi eyi iyuwene!

⁸ Endambi muyahika, Marata isyangathasyahunira ekiri omwa muthima wiwe. Yesu abere anemukania, Marata mwamubughiramu n’ekinigha athi: ‘Mukama, sulithanyikwira bulighe kusangwa mwali wethu abirinyithekera emibiiri kwehi? Wumubwire wuthi  anyiwathikaye.’ (Lk. 10:40) Ebi byabya binywe by’eritsuruma. Esindi Biblia, sikabugha sithi: “Mukama, kwesi siwutsomene?” Neryo mwabwira Yesu athi ahabule Maria kandi athi amubwire athi aya muwathikaye.

9, 10. (a) Yesu mwasubirya Marata y’athi? (b) Thukaminya thuthi ngoku Yesu sy’atsweba Marata habw’erikolha kutsibu?

⁹ Erisubirya lya Yesu lyangabya imulyaswekya Marata, ngoku likana swekaya n’abasomi be Biblia bangyi. Omwa bwolho-bwolho mwamusubirya athi: “Marata, Marata, wabirihangya-hangya n’eriyisulhusuthya omwa bindu bingyi. Aliwe ni bike ebikayithaghisibawa, kutse kighuma kisa. Maria iyo mwakasombolha ekindu ekyuwene, kandi syendi syasaghulhwakyo.” (Lk. 10:41, 42, NW ) Yesu amanyisayaki? Mbwino amanyisaya athi Marata anzire ebindu bya kutsibu? Mbwino amutsweba busana n’erikolha kutsibu akathegheka ebyalya?

¹⁰ Eyihi. Yesu abya inianalhangire ekya Marata akolha ngoku akikolha omwa muthima owahenirye n’ow’olhwanzo. N’ekindi, Yesu syamanyisaya athi n’eritheghekera abagheni b’ebyalya binene ni kibi. Enyuma, Yesu mwana ghenda ‘okw’irya inene’ erya Matayo amutheghekera. (Lk. 5:29) Marata eritsumba ebyalya siky’ekyabya kitsibu, aliriryo ky’ekyahira embere. Mwahwerya amalengekania w’okw’ithegheka ebyalya ebyuwene neryo am’ibirirwa ekindu eky’omughaso munene. Kyabya ini kyahi?

11, 12. Yesu mwahabulha athi Marata omwa bwolho-bwolho?

¹¹ Ekyaletha Yesu, Omughalha ekyusa kya Nyamuhanga omw’eka yabu Marata, lyabya iry’erikangirirya ekwenene. Oku Yesu, sihali ekyabya kirengire eki, nomubyangabya n’ebyalya ebyuwene ebya Marata athegheka. Kyangabya imukyitha Yesu y’obulighe akalhangira Marata akaherya akaghisa k’embaghane aka akanga muwathikirye erighumya erikirirya liwe. Aliwe Yesu mwamuleka ayithwiremu okw’eki. * Aliriryo ibbwa, Marata syabya atholere eribwira Yesu athi akake Maria nayu athale okwa kayisa aka.

¹² Neryo Yesu omwa bwolho-bwolho mwahabulha Marata omw’isubirira omwa lina lya Marata omwa mulenge mwolho busana n’erimuhumulikania, kandi mwamughumya athi sihali ekyanga leka ‘iniahangya-hangya n’eriyisulhusuthya omwa bindu bingyi.’ Ebihulho nga bibiri bisa byanga ghunzire, kwilhabirirya omughulhu hane n’eky’obunyakirimu. Neryo kwesi syangathokire  erilhusya Maria okwa “kindu ekyuwene” ekyabya iniabirisombolha, eky’erihulikirira Yesu!

13. Erihabulha erya Yesu aha Marata likathweghesayaki?

¹³ Omwatsi oyu owabya omw’eka yobu Marata awithe binene eby’ak’eghesaya abakwamire Kristo munabwire. Sithutholere thukalighira kindu kyosi-kyosi erithulemesya eribya ‘n’obwagha bwa Nyamuhanga.’ (Mt. 5:3) Ni kwenene thutholere ithwagherererya omubere wa Marata ow’erikokya n’ow’erikolha kutsibu, aliriryo isikyaleka ‘thukahangya-hangya n’eriyisulhusuthya’ omwa bindu ebitheyithaghisibawa kutsibu thukakokya erihika okw’ithalha okwa by’omughaso munene. Kutsibu-tsibu thukabya haghuma n’abalikyethu isi busana n’erithegheka kutse eritheghekerwa byalya binene, aliriryo busana n’erisikania emithima n’erihererania emyatsi y’obunyakirimu. (Soma  Abanya Roma 1:11, 12.) Nibya mwangana himbangana imwabirina thegheka hindu hike-hike buyira.

14. Thukaminya thuthi ngoku Marata mwaligha erihabulhwa?

¹⁴ Mbwino Marata mwana ligha erihabulha lya Yesu? Ekyo mwakikolha. Omukwenda Yoane akabya akatsuka erikania oku mughalha wobu Marata, akabugha athi: “Nikwa Yesu abya anzire Marata, na mwali wabo, na Lazaro.” (Yn. 11:5) Habya ihamabiri lhaba myezi mirebe olhubungo lhwa Yesu olhwe Betania lhwali bere. Kilhangirikire ngoku Marata mwathabika oku Yesu kw’ekinigha busana n’erimuhabulha. Mwaligha erihabulhwa. N’omw’eki mwathuhirira h’eky’erileberyako kibuya eky’erikangania erikirirya, kundi kwenene nindi okw’ithwe oyutheyithagha erihabulhwa?

15, 16. (a) Marata angabya imwakolhaki mughalha wabu akalhwalha? (b) Amaha awa Marata na Maria bangabya ibabya bawithe mwahwa athi?

¹⁵ Omughulhu mughalha wabu alhwalha, Marata angabya imwasulhusutha kutsibu akamuthwanira. Mwakolha ekyosi-kyosi eky’angathoka erimuhumulikania n’erimuwathikya anga lhama. Aliwe Lazaro mwayongera erithoha. Obuli ndambi, bali babu ibakabya ibane nayu ibanemumutsomana. Mirundi mingyi Marata angabya imwasamalira omwa busu bwa mughalha wabu ibwabirithumba, n’eryibuka emyaka mingyi eya bamabirighunza haghuma omwa tseme n’omwa bitsibu!

¹⁶ Marata na Maria babere babirilhangira Lazaro ngoku amabirithoha kutsibu, mubalhaghira oku Yesu. Abya inianemuthulira omwa kitsweka ekya hali okw’ibo, olhughendo lhw’ebiro nga bibiri. Mubathuma mwatsi muke ono: ‘Mukama, lebaya, oyo wanzire alhwere.’ (Yn. 11:1, 3) Babya ibanakyasi ngoku Yesu anzire Lazaro, kandi iban’ikirirye ngoku angana kolha ekyosi-kyosi eriwathikya munywani wiwe oyu. Mbwino babya ibane n’amaha bathi Yesu akendyasa lhuba mughalha wabu iniakineho? Kyamabya iky’ekyo, amaha ayo mwahwa. Lazaro mwaholha.

17. Marata angabya iniabya inianemuyibulyaki, kandi mwakolhaki akowa ngoku Yesu anemwasa?

¹⁷ Marata na Maria abosi haghuma mubalira mughalha wabu, ibanemuthegheka n’amatsiko wiwe, n’eryangirira abagheni erilhua omwa Betania n’omwa yindi myanya eyibathimbireko. Aliriryo babya isibali bowa mwatsi erilhua eyiri Yesu. Obuthuku bwabere bunemulhaba, Marata angabya iniabya inianemuyibulya Yesu ng’alihi. Erighunzerera, ihamabirihalhaba biro bbini Lazaro aliholire, Marata mwowa ngoku Yesu anemwasa. Kandi iyo ng’omukali oyubangukire, n’okwa ndambi y’obulighe eyi, Marata mw’imuka eriyabandana Yesu, isyathabwira na Maria.​—Soma Yoane 11:18-20.

18, 19. Marata abya n’amahaki, kandi busana naki erikirirya liwe lyabya lighumire?

 ¹⁸ Omughulhu Marata alhangira Mukama wiwe, mwabugha ebyabya bikabalyambya omwa muthima habw’ebiro bbini na mwali wabu Maria athi: ‘Mukama, kumbe wabya hano, mughalha wethu nga syalithaholha.’ Aliriryo, Marata abya iniakinawithe amaha. Mwongera athi: ‘Nikwa na lino nyinasi ekinduki wasyasaba Nyamuhanga, Nyamuhanga asyakuhakyo.’ Aho n’aho Yesu mwabugha ekya humulikanaya Marata athi: ‘Mughalha wenyu asyalhubuka.’​—Yn. 11:21-23.

¹⁹ Marata mwalengekania athi Yesu akamanyisaya erilhubuka ery’obuthuku bw’embere, neryo mwasubirya athi: ‘Nyinasi kw’asyalhubuka okw’ilhubuka ly’ekiro ky’enyuma-nyuma.’ (Yn. 11:24) Abya awithe erikirirya erighumire omwa maha w’erilhubuka. Abandi basondoli b’edini y’Ekiyudaya, Abasadukayo, ibakaghana bathi sihali erilhubuka, nomuyanabya ngangirirya eyiri omwa Masako awatheghekanibawa na Nyamuhanga. (Dan. 12:13; Mk. 12:18) Aliriryo Marata abya  inianasi ngoku Yesu mwakangirirya okwa maha w’erilhubuka, kandi ngoku mwanalhubukya n’abandu, n’omwanabya isyali athalhubukya omundu oyuwabya iniamabighunza ebiro bingaha n’ebya Lazaro iniana holire. Mwathaminya ekikayabya.

20. Ebinywe bya Yesu ebithe byang’ibiriranwa ebiri omu Yoane 11:25-27 n’erisubirya lya Marata bikamanyisayaki?

²⁰ Neryo Yesu mwabugha ebinywe ebithe byang’ibiriranwa athi: ‘Ingye indi erilhubuka n’engebe.’ Ni kwenene Yehova abiriha Mughalha wiwe y’obuthoki bw’erisyalhubukya abaholi omwa kihugho kyosi obuthuku obukasa. Yesu mwabwira Marata athi: ‘Wam’ikirirya ebyo kwehi?’ Neryo mwasubirya ebinywe ebiri okwa nzuko y’esura eno. Abya inian’ikirirye ngoku Yesu ni Kristo, kutse Masiya, ngoku ni Mughalha wa Nyamuhanga Yehova, kandi ngoku niyo oyo abaminyereri balhaghulha bathi angasire omwa kihugho.​—Yn. 5:28, 29; soma Yoane 11:25-27.

21, 22. (a) Yesu mwakangania athi eriyowa liwe busana n’ababiriholerwa? (b) Kanaya okw’ilhubuka lya Lazaro.

²¹ Mbwino Yehova na Mughalha wiwe, Yesu Kristo, bakanatsemera erikirirya eriri ng’erya Marata? Ebyabya Marata inianasamalire mubyaha eky’erisubirya ekilhangirikire. Mwanguha eriyaletha mwali wabu. N’enyuma waho, mwalhangira Yesu iniabirikwa obulighe bunene akakanirya Maria n’abandi baliri bangyi ababyaho. Marata mwalhangira ebighirighiri bikasa omwa meso wa Yesu busana n’obulighe obw’obulhumi obukalethawa n’olhuholho. Marata mwowa Yesu akalhaghira athi eribwe lilhusibawe okw’isinda ya mughalha wabu.​—Yn. 11:28-39.

²² Kandi Marata iyana mwangu, mwaghana athi omwa biro bbini ebi, omubiri angabya iniali okw’ibeha. Yesu mwamwibukya athi: ‘Mundethakubwira nyithi, wamikirirya, wasyalholha okwa lhukengerwa lhwa Nyamuhanga?’ Mwikirirya ebyo, kandi kwenene mwalhangira olhukengerwa lhwa Yehova. Aho n’aho Nyamuhanga mwaha Mughalha wiwe y’obuthoki obw’erilhubukya Lazaro! Thalengekania okwa byabya omwa malengekania wa Marata erihika okwa lhuholho lhwiwe bino: Yesu akabirikira athi, ‘Lazaro, hulhuka!’; eripasya-pasya eryowika omwa mwangalhu Lazaro akahangana, kandi akasa lyolho-lyolho erihika okwa lhukyo lhw’omwangalhu iniakinasenga-sengire omwa lhukimba olhwa senga omubiri wiwe; Yesu erilhaghira athi, ‘mumusengule aghende’; kandi ngoku omwa bitsange binene baghulhuka, iyo na Maria bakayawa oku mughalha wabu. (Soma Yoane 11:40-44.) Obulighe obwabya bulithohirye omuthima wa Marata, mubwahwa!

23. Niki ekya Yehova na Yesu banzire erikukolera, kandi wutholere iwakolhaki?

²³ Omwatsi oyu akakanganaya ngoku abaholi erisyalhubuka sibilhotho;  Ni ngangirirya eyikahumulikanaya eyiri omwa Biblia, kandi ni kindu ekyanabere na kera. (Yobu 14:14, 15) Yehova na Mughalha wiwe banzire erihemba abakakanganaya erikirirya, ngoku bahemba Marata, Maria, na Lazaro. Nawu bakendi syakuhemba wamabya n’erikirirya erighumire.

24. E Biblia yikathubwira mwatsiki ow’erighunzerera oku Marata?

²⁴ E Biblia yikathasya kanaya oku Marata engendo y’erighunzerera okw’itsuka ly’eyenga y’erighunzerera ey’eribyaho lya Yesu okwa kihugho. Yesu abya inianasi ebitsibu ebikayamuhikako omwa yenga eyo, neryo mwathwamu kandi eriyahumulikanira eyiri banywani biwe, e Betania. Aha, h’anga hongokire akaya e Yerusalemu olhughendo lhw’esyokilomita isathu. Yesu na Lazaro babya ibanemulya omwa nyumba ya Simoni omuhagha, eyo ya Marata akakanibawako ebinywe bino engendu y’erighunzerera: ‘Marata abya akahukulha.’​—Yn. 12:2.

25. Busana naki ebithunga ebiwithe abakali abali nga Marata bitsemire?

²⁵ Kwenene oyu abya mukali mukoli! Thukabya thukatsuka erimusomako omwa Biblia thukeghaya iniane mukolha, kandi thukabya thukamusomako erighunzerera, iniabya iniakinakolha kutsibu eritsomana ab’ali nabu. Munabwire, ebithunga by’abakwamire Kristo bikatsema eribya n’abakali abalinga Marata, abawithe omuthima w’obuthubaha n’eribya benge, mughulhu wosi erikangania erikirirya lyabu omwa mikolere omw’iyihayo. Marata mwanalholha embere erikolha ekyo? Ekyo angabya imwakikolha. Byamabya ikwabiri bithya, eyo yabya mikolere eyuwene y’erikangania erikirirya eyanga muwathikirye erighumira ebitsibu eby’angabwene embere.

26. Erikirirya lya Marata mulyamuwathikya lithi?

²⁶ Habere halhaba buthuku buke buyira, Marata mwabana obulighe bw’eriholerwa Mukama wiwe, Yesu, eyaby’anzire kutsibu. Kandi abathebya babi abo aban’itha Yesu mubaya embiitha y’eritha na Lazaro, kundi erilhubukibwa liwe lyabya likaghumya erikirirya ly’abangyi. (Soma Yoane 12:9-11.) Kandi nibya Marata nayu, erighunzerera, olhuholho mulhwa mughabulha okwa baana babu ababya bughuma bathya. Sithwasi ekyo nga mukyabya mughulhu wahi, aliwe thwangana bugha thuthi: Erikirirya lya Marata mulyamuwathikya eriyiyinia erihika okwa lhuholho. Busana n’ekyo, Abakristayo munabwire batholere ibagherererya erikirirya lya Marata.