1, 2. (a) Ruta aby’akakolha omubiiri owali athi? (b) Ni bindu byahi bibuya ebya Ruta igha omwa Mighambo ya Nyamuhanga n’okwa bandu biwe?

RUTA mwakukama ahisi akathonda ekisusu eky’alyabotha-botha ekiro kyosi. Bwabya ibuli mw’ira kandi abakoli ibali okw’ikulhuka bakalhua omwa malima awe Betelehemu, erilholha eyiri olhukyo olhukingira omwa katawuni akabya eyighulhu okwa murambi owabya hakuhi. Ahathe erithika-thika Ruta abya iniabirilhuha kutsibu busana n’erikolha omwa musibo wosi. Aliriryo, mwalholha embere erihumba-humba ekisusu eky’alyabotha-botha. Nomwabine bithya, ekiro mukyamughendera ndeke kwilhaba ngoku abya akalengekania.

² Mbwino emibere yabya iyiri mutsuka eryuwanira omukwakali mulere oyu? Ngoku kikanganibwe omwa sura eyihwere, abya iniabiribeghera kutsibu oku nyokobyalha wiwe, Naomi, n’erilhahirya athi syendi syamusighania kandi athi Nyamuhanga wa Naomi, iya Yehova, akendi syabya Nyamuhanga wiwe. Abakwakali babiri aba bahika e Betelehemu bakalhua e Moabu, neryo Ruta omunya Moabu mwalhua iniaminya ngoku Emighambo ya Yehova mune ekihano ekihambire okw’iwathikya abera omwa Israeli, imwamuli n’ab’ehandi. Neryo kandi mwalhangira abandi bandu ba Yehova, ababya bakaghendera okwa Mighambo yiwe ngoku mubakangania olhukeri lhunene, ekindu ekya muhambako kutsibu.

3, 4. (a) Boazi abya iniabirikolhaki ekya hira Ruta mw’amani? (b) Eky’erileberyako kya Ruta kyanga thuwathikya kithi omwa biro bino omughulhu emingirirye yikalire?

³ Boazi abya mughuma w’okwa bandu ng’abo. Abya mulhume mughuda omwinye malima awa Ruta abya akabotha-botheramu. Boazi mwamukangania omuthima w’obubuthi ekiro ekyo. Mukyamutsemesya kutsibu akalengekania okwa binywe ebya Boazi amubwira eby’erimupipa busana n’eritsomana Naomi, kandi busana n’erithwamu erikolha Nyamuhanga, Yehova, mwabusaghiro bwiwe.​—Soma Ruta 2:11-14.

⁴ Nomwabine, Ruta angabya iniabya iniakinabulha engebe nga yikendi mubera yithi embere. Iyo ng’ow’ehandi kandi mwera, oyuthawithe mulhume kutse mwana, angathokire athi eribana ebyanga  bawathikya iyo na Naomi? Eribotha-botha lisa lyangana ghunzire ebiyithawa byabu? Kandi nindi oyuwanga muwathikirye akakekelhuha? Si w’eriswekera amabya imwa hangya-hangya busana n’ebi. Omwa biro bino omughulhu emingirirye yikalire, abanene ku bakanayowa bathya. Thukendibya thunemuminya ngoku erikirirya lya Ruta lya muwathikaya erilhaba omwa bitsibu ng’ebi, thukendibana bingyi eby’erimwighirako.

5, 6. (a) Ekiro ky’erimbere ekya Ruta abotha-botheramu omw’irima lya Boazi mukyamughendera kithi? (b) Naomi mwayowa athi akalhangira Ruta?

⁵ Ruta abere abirighunza erihumba-humba ekisusu n’erikikuma-kumira haghuma, mwabana iniamabiri botha-botha hakuhi kalengyi kaghuma ake efa. (Ruta 2:17, NW ) Omusiko wiwe angabya iniabya w’ekilo 14! Obundi mwabohagho omwa kitambara, erihekagho, n’erighenda e Betelehemu eryuba iryamabirilenga.

⁶ Naomi mwatsema akalhangira mwalyana wiwe omwanze, obundi n’erikukubalha akalhangira omusiko w’ekisusu owa Ruta ahekire. Kandi Ruta mwaletha n’ebyalya eby’asakaya okwa bya Boazi aha abakoli biwe, neryo ababiri aba mubalya haghuma. Naomi mwabulya athi: ‘Wulyabotha hayi munabwire kwehi, kandi wulyahingahi kwehi? Atsumulhawe oyulyakwibuka.’ (Ruta 2:19) Naomi abere akalhangira omusiko owa Ruta aby’ahekire, mwaminya ngoku hane oyuwabirilhangira omukwakali mulere oyu n’erimukangania olhukeri.

7, 8. (a) Naomi mwalhangira olhukeri lhwa Boazi ilhukalhua okundi, kandi busana naki? (b) Ruta mwongera erikangania athi nyinyi-byalha wiwe y’olhwanzo olhuthyusa?

⁷ Mubingira omwa mukania, Ruta amabwira Naomi okwa lhukeri lhwa Boazi. Busana n’eriowa eki, Naomi mwabugha athi: ‘Omwami mukulhu atsumulhawe, oyutheleka erikangya obubuya bwiwe oko baliho n’oko baholi.’ (Ruta 2:20) Mwalhangira olhukeri lhwa Boazi ilhukalhua oku Yehova oyukahira omwa baghombe biwe mw’omuthima w’eribya benge kandi oyukalhaghanisaya erihemba abandu biwe busana n’erikangania olhukeri. *​—Soma Emisyo 19:17.

⁸ Naomi mwabwira Ruta athi alighe ekya Boazi amubwira eky’eribya akabotha-botha omwa malima wiwe n’eribya akasiba n’abaana-batho b’enyumba yiwe nuku abaghesi sibabye bakamusatha-sathirako. Ruta mwowa. Kandi mwalholha embere  ‘er’ikalha haghuma na nyinyi-byalha wiwe.’ (Ruta 2:22, 23) Omwa binywe ebyo thukathasyalhangira mw’omubere wiwe mubuya, ni bugha ambu, olhwanzo olhuthyusa. Eky’erileberyako kya Ruta kyanganaleka ithwayibulya nga thukanasikaya obughuma bw’omw’eka, erisighika buthaleghulha abanze bethu n’eribawathikya kikayithaghisibwa. Yehova syangabya athethalhangira olhwanzo ng’olho.

9. Ruta na Naomi bakathweghesayaki okw’eka?

⁹ Mbwino Ruta na Naomi basa muyanabya eka? Abandi bakalengekanaya bathi eka eritholera eribya eka mutholere imwabya imune thatha, mama, abaana, sukulhu na mukaka, n’abandi. Eky’erileberyako kya Ruta na Naomi kikathwibukaya ithwe ng’abaghombe ba Yehova ngoku n’abandu babiri bangana kolha eka bamakangania obunywani, olhukeri, n’olhwanzo. Wukanatsemera eka eya wulimu? Yesu mwibukya abigha biwe ngoku ekithunga ky’Ekikrisitayo yanganabya eka n’okw’abo abathawithe ab’okw’ibo.​—Mk. 10:29, 30.

10. Naomi mwanza eriwathikya Ruta yathi?

¹⁰ Eritsuka okw’ighesa ly’ekisusu omwa Kwakani erihika okw’ighesa ly’engano omwa Kwomukagha, Ruta mwabya iniane mubotha-botha omwa malima wa Boazi. Ebiro byabere binemulhaba, ahathe erithika-thika Naomi mwabya iniane muthasyalengekania ng’angakolera mwalyana wiwe omwanze oyu yaki. Naomi iniane e Moabu, syabya awithe maha athi angabanira Ruta y’owundi mulhume. (Ruta 1:11-13) Lero lino, abya inialimuthunga awandi malengekania. Mwahika oku Ruta n’eribugha athi: ‘Sinanga kusondera ah’erilhuhukira, iwathoka eribana obuholho kwehi?’ (Ruta 3:1) Okwa biro ebyo, ababuthi ibakasonderaya abaana babu b’ab’erithahya kutse erithahibwa nabu, neryo Ruta abya iniabiribya mwali wa Naomi ndeke-ndeke. Mwanza eribanira Ruta ‘ah’erilhuhukira,’ ni bugha ambu, obuholho n’obutheya obwanga banika omw’eka eyiri mw’omulhume. Aliriryo ibbwa Naomi angakolireki?

11, 12. (a) Omughulhu Naomi ahulha Boazi mwa ‘muthongolya,’ abya iniakakanaya okwa ndegheka yahi ey’olhwanzo eyabya omwa Mighambo ya Nyamuhanga? (b) Ruta mwasubirya athiki okwa bya nyoko-byalha wiwe amubwira?

¹¹ Omughulhu Ruta ahulha Boazi erimbere, Naomi mwabugha athi: “Omulhume oyo ni w’okw’ithwe. Ni mughuma w’okw’abathongolya bethu.” (Ruta 2:20, NW ) Ekyo kyamanyisayaki? Emighambo ya Nyamuhanga okwa Abaisraeli mwabya endegheka y’olhwanzo  ey’eritsomana amaka awakabana ebitsibu busana n’obusama kutse eriholerwa. Omukali anabya amabya mukwakali isyalyabutha mwana, ikikamwitha bulighe bunene kutsibu-tsibu busana n’erina lya mwira wiwe eribiriranwa, ni bugha ambu, olhubutho lhwiwe erihweraho. Aliriryo, Emighambo ya Nyamuhanga iyikalighira mughalha w’obu muholi erithahya omukwakali nuku angabutha omwana oyuwanga sighalya erina ly’omuholi n’eritheya ebindu by’eka. *​—Ebi. 25:5-7.

¹² Naomi mwabwira Ruta ngoku angabana omulhume. Angabya imwathanda obuno nyoko-byalha wiwe akamubwira eky’erikolha. Ruta abya isyalyaminya ndeke Emighambo n’emirwa y’Abaisraeli. Nomubyanabya bithya, aby’asikirye Naomi ya kutsibu indi mwahulikirira ndeke ebyosi ebyo amubwira. Ekya Naomi amubwira athi akole kyangabya ikyabya ikik’itha esisoni kutse erihemulha. Aliriryo, Ruta mwaligha. Omw’iyikehya, mwabugha athi: ‘Ebyosi ebya wukabugha nasyakolhabyo.’​—Ruta 3:5.

13. Ni kyahi ekya thuk’ighira oku Ruta ekihambire okwowa erihabulha ly’abakulhu? (Lebaya na Yobu 12:12.)

¹³ Okwa bundi buthuku kikanakalira abalere erihulikirira erihabulha ery’abakulhu. Kyolhobire erilengekania wuthi abakulire sibasi ebitsibu ebya balere bakabana. Eky’erileberyako kya Ruta eky’eriyikehya kikathwibukaya ngoku kyangana thughasira kutsibu erihulikirira  erihabulha ery’abakulire abathwanzire n’erithusunzira ebibuya. (Soma Esyonyimbo 71:17, 18.) Aliriryo ibbwa, Naomi mwahabulha athiki, kandi kwenene mukyanaghasira Ruta erihulikiriralyo?

14. Ekihumbiro kyabya kikabya hayi, kandi babya bakakolera kwaki?

¹⁴ Erigholho eryo, Ruta mwaghenda okwa kihumbiro aho abalimi bangyi babya bakayahumbira n’erighulhukirya ebirimwa by’esyonguma. Ekihumbiro eki ikikabya okwa hithwe ahabya hakahitha omuyagha omw’ithungyi n’omw’igholho. Erithoka erilhusya esyonguma sy’omwa bithi, abakoli ibakakolesaya ebindu ebiri ng’ekitiyo erighulhukya nuku ebithi bilhue omwa syonguma.

15, 16. (a) Kanaya okwa byabyaho okwa kihumbiro Boazi akaghunza emibiiri ey’ekiro ekyo. (b) Boazi mwaminya athi ngoku Ruta anakesirye ahali ebisandu biwe?

¹⁵ Aha Ruta abya, mwathungerera abakoli bakaghunzerera emibiiri yabu erigholho. Boazi abya inianeho erilebya emibiiri ngoku yikakolhawa, neryo aha bw’irira, ekisusu kiwe ikyamabiribya kirundu kinene. Abere abir’irya ndeke, mwayakesya okwa lhuhandi lhughuma olhw’ekirundu. Kikalhangirika ngoku eki kyabya kikakolhwa, obundi eritheya ebya birihulhulhwa okwa bibi. Ruta abere alhangira Boazi kw’amabirighotsera, mwaminya ngoku endambi yamahika ey’erikolesya amenge awa Naomi amuha.

¹⁶ Ruta mwasoba, omuthima iniane mupuka-puka. Mwalhangira ngoku omulhume abirihwera omwa thulho. Neryo ngoku Naomi anamubwira, mwayasukulha ebisandu biwe, n’erikesya aho biri. Neryo mwalinda. Endambi yamamalha. Oku Ruta obu bwangabya imubwabya nga buthuku muuli kutsibu. Erighunzerera, omwakathi  k’ekiro, Boazi mwatsuka eriyibindulha. Iniane mutukumira busana n’embeho, mwakakya okuboko kwiwe, obundi akanza erithasyaswika ebisandu biwe. Aliriryo mwowa ihane omundu. E Biblia yikabugha yithi, ‘Lebaya! Omukali inianaghotsere ahali ebisandu biwe!’​—Ruta 3:8.

17. Abakalengekanaya nabi okwa bya Ruta akolha, bak’ibirirawaki?

¹⁷ Mwamubulya athi, ‘Niwendi kwehi?’ Na Ruta mwasubirya, obundi inianakwire engitsi, athi: ‘Ingye indi Ruta, omughombe wawu, wuswike omughombe wawu okwa lhukimba lhwawu, kusangwa wuli w’ekithunga kyethu.’ (Ruta 3:9) Abandi munabwire bakabugha bathi ebya Ruta akolha n’eribugha mwabya olhuli nga lhuthetho. Aliwe hane ebindu bibiri ebya bak’ibirirawa. Eky’erimbere, Ruta akolha athya erikwamana n’emirwa ey’obuthuku obo, eyithakiriho munabwire. Busana n’ekyo, iwukendibya iwamasobya wamaghanirya okwa bya Ruta akolha omw’ikolesya amalengekania wa munabwire awatsandire kutsibu omwa by’esyongeso. Ekyakabiri, erisubirya lya Boazi mulyakangania ndeke ngoku iyo mwathwalha ekya Ruta akolha ng’ekindu ky’esyongeso kandi ng’ekitholere.

18. Ni kyahi ekya Boazi abugha erihumulikania Ruta, kandi mwakania okwa nzira syahi ibiri esya Ruta akanganiraya mw’olhwanzo olhuthyusa?

¹⁸ Boazi mwasubirya, kandi ahathe erithika-thika iyo erikania omwa mulenge owathekene, mulyahumulikania Ruta. Mwabugha athi: ‘Mwali waghe, Omwami Mukulhu akutsumule; wabirikangya obubuya bungyi okwa mughulhu w’enduli kwilhaba erimbere, kusangwa sulithakwama abalhwana nomubangabya bera kutse ab’ebindu.’ (Ruta 3:10) Boazi eribugha athi “omughulhu w’erimbere” amanyisaya olhwanzo olhuthyusa olhwa Ruta akanganaya akakwama Naomi n’erimutsomana bakasa e Israeli, kandi n’eribugha athi “omughulhu w’enduli” amanyisaya ekya Ruta akolha ekiro ekyo. Boazi mwalhangira ngoku omukali mulere nga Ruta anganzire iniabana omulhume omwa balhwana, mbulha ni w’ebindu kutse mwera. Aliriryo, mwanza erikolha ebibuya butsira oku Naomi musa, aliriryo n’okwa muholi oyuwabya mwira wa Naomi, nuku erina ly’omuholi oyo siribiriranawe omwa Israeli. Sihali ekyanga leka iwuthalhangira ekyaleka Boazi iniatsemera omukali oyu.

19, 20. (a) Ni kyahi ekyaleka Boazi iniathalighira aho-n’aho erithahya Ruta? (b) Boazi mwakangania athi olhukeri n’eriyitheya erina lya Ruta?

¹⁹ Boazi mwongera athi: ‘Na lino mwali waghe, siwubahe; ngendi kukolera ebyosi wukabugha; kusangwa omuyi wosi w’abandu baghe banasi ngoku wuli mukali mughenge.’ (Ruta 3:11) Omwatsi  w’erithahya Ruta mwamutsemesya; obundi mukitha muswekya kutsibu eribya Ruta imwamwahulha mw’ow’ekithunga kyabu. Aliriryo, Boazi abya mulhume oyuthunganene, neryo mwathanza erithwamu erikwamana n’eriyowa liwe. Mwabwira Ruta athi hane owundi ow’okw’ibo oyubahambireko ndeke omw’ihiika ly’omuholi mwira wa Naomi. Boazi angatsukire erimuhikako n’erimubwira athi yubye mwira wa Ruta.

²⁰ Boazi mwabwira Ruta athi athasyakesaya erihika aho bukendikera; neryo anatswaho isibathamulhangira. Akolha eki nuku abandu sibalengekanaye bathi mbwino mubakasingira, neryo kikabatsandya kw’erina. Ruta mwalholha embere erithasyakesya ahali ebisandu bya Boazi, obundi isyakikwire ngitsi kundi Boazi mwamusubirya omwa bwolho-bwolho. Neryo omwa mitsange, Ruta mwahangana. Boazi mwosulya omwa kitambara kya kiwe mw’ekisusu, neryo amasuba e Betelehemu.​—Soma Ruta 3:13-15.

21. Ni kyahi ekyaleka Ruta iniaminywa ‘ng’omukali omughenge’ kandi thwanga mugherererya thuthi?

²¹ Ka kyangabya imukyahumulikania Ruta akalengekania okwa bya Boazi amubwira ngoku abandu abosi bamwasi ‘ng’omukali mughenge’! Ahathe erithika-thika, eribya n’erina eryuwene eri mukyamuha omuhwa munene ow’eryanza eriminya Yehova n’erimukolera. Kandi abya iniabirikangania Naomi n’abandu biwe b’olhukeri n’erikangania kw’atsomene emirwa yabu, akaghendera kuyo nomuyanabya mihya-mihya okw’iyo. Thwamagherererya erikirirya lya Ruta, ithukendi lhangira thuthi thukasikaya ndeke abandi haghuma n’emirwa yabu. Thwamakolha ekyo, nethu ithwanganabya n’erina libuya.

22, 23. (a) Ekihembo ekya Boazi ahekaya Ruta kyangabya ikyabya kikamanyisyaki? (Lebaya n’omwatsi ahikwa.) (b) Naomi mwabwira Ruta y’athiki?

²² ‘Wulindi mwali waghe kwehi?’ Naomi kw’abulhaya athya Ruta akahika eka. Obundi amubulhaya athya kundi bwabya isibuli bwakya ndeke, aliriryo kandi anza eriminya Ruta ng’akine mukwakali kutse ng’abiribana oyukendi muthahya. Neryo Ruta mwalhua iniabwira nyokobyalha wiwe y’ebyosi ebyabere. Kandi mwahererya Naomi y’ekihembo ky’ekisusu ekya Boazi amulebeka. *​—Ruta 3:16, 17.

²³ Naomi ng’omukali mukulhu w’amenge, mwabwira Ruta athi  abye eka ekiro ekyo, omwakanya k’eriyabotha-botha omwa malima. Mwamukakasya athi: ‘Wuyibombeke aho, mwali waghe, erihika aho wasyaminyira omwatsi ng’asyabya athi. Kusangwa omundu oyo syendi lhuhuka athe abugha omwatsi oyo munabwire.’​—Ruta 3:18.

24, 25. (a) Boazi mwakangania athi ngoku ni mulhume oyuthunganene kandi oyukatsomana abandi? (b) Ruta mwatsumulhwa athi?

²⁴ Ebya Naomi abugha oku Boazi byabya bihikire. Boazi mwaya okwa lhukyo lhw’omuyi, aho abakulhu b’omuyi babya bakasanga-sangana, amalinda erihika aho mughalha wabu w’ekithunga asira. Embere sy’abalhangiri, Boazi mwabwira mughalha wabu oyo athi yukole ng’omuthongolya omw’ithahya Ruta. Aliriryo, omulhume oyo mwaghana, athi amakolha eki ikikendi tsandya omwandu wiwe. Neryo, embere sy’abalhangiri, okwa lhukyo lhw’omuyi kw’aho, Boazi mwabugha athi akendikolha ng’omuthongolya, erighulha ebyabya bya mwira wa Naomi, iya Elimeleki, n’erithahya Ruta oyuwabya mukali wa mughalha wa Elimeleki, iya Malona. Boazi mwababwira amaha wiwe athi eki kyanga hanganirye ‘erina ly’oyuwaholha omo mwandu wiwe.’ (Ruta 4:1-10) Omwa kwenene Boazi abya mulhume oyuthunganene kandi iniakatsomana abandi.

²⁵ Boazi mwathahya Ruta. Neryo e Biblia yithi: ‘Yehova mwamuha eriheka obukule, neryo mwabutha omughalha.’ Abakali be Betelehemu mubatsangira Naomi n’eripipa Ruta busana n’eribya mubuya embere sya Naomi kwilhaba abaghalha musanju. Enyuma waho thukigha ngoku mughalha wa Ruta mwabya thatha-kulhu w’Omwami Dawudi. (Ruta 4:11-22) Na Dawudi mwabya thatha-kulhu wa Yesu Kristo.​—Mt. 1:1. *

26. Eky’erileberyako kya Ruta na Naomi kikathwibukayaki?

²⁶ Kwenene Ruta mwatsumulhwa, kuthya na Naomi oyuwawathikaya erirembera omwana ng’owiwe. Eky’erileberyako ky’abakali babiri aba kikathwibukaya ndeke-ndeke ngoku Yehova Nyamuhanga akabya inianalhangire abosi abakayikasa kutsibu eriwathikya ab’okw’ibo omw’iyikehya kandi ibanemukolha buthaleghulha n’abandu biwe. Syangabya butsira erihemba abandu biwe abathaleghulha nga Boazi, Naomi, na Ruta.