1, 2. Busana naki thukayithagha erihimba erikirirya lyethu omwa byalhuba? Iha eky’erileberyako.

ERIKIRIRYA. Eki ni kinywe kibuyanga ekikimanira omubere owuwene kutsibu. Aliriryo, omughulhu thukowa ekinywe ekyo thutholere ithwalengekania okwa kindi kino: “Omwa Byalhuba!” Kundi thwamabya isithuwithe erikirirya, thutholere ithwalithunga omwa byalhuba. Kandi thwamabya ithunawithe erikirirya, omwa byalhuba thutholere ithwalitheya n’erilikulha-kulhania. Busana naki?

² Thalengekania iwunemulhaba omo mbwarara nene kutsibu. Iwukendi yithagha kutsibu amaghetse. Wamabanagho, iwukendi theyagho okwa mwisi. Kandi iwukendi yithagha eribya iwune mwongera okw’awawuwithe erihika aha wukendi syaghunzira olhughendo lhwawu. Munabwire, thuli omo mbwarara y’obunyakirimu, ekihugho ekithe mw’erikirirya ly’okwenene, kandi ng’amaghetse w’omo mbwarara siriri banika lhuba-lhuba kandi rikuma lhuba wamathendi litheya n’erilisubirirya. Erikirirya ni mubere owa thukayithagha omwa byalhuba; ngoku thuthe thwangabyaho butsira maghetse, sithwangabyaho bunyakirimu thuthawithe erikirirya.​—Abar. 1:17.

3. Ni kyahi ekya Yehova abirithuha erithuwathikya eribya n’erikirirya, kandi ni bindu byahi bibiri ebya thutholere ithwibuka erikolha?

³ Yehova anasi ngoku thukayithagha erikirirya omwa byalhuba, kandi anasi ngoku kikalire munabwire erilibana n’erilitheya. Ekyo ky’ekyabirileka inialhangira athi hakabya abathwanga gherererya. Yehova mwasondolha omukwenda Paulo erihandika athi: ‘Mubye mukagherererya abikiriraya n’eriyiyinia n’eryangirira ebyo Nyamuhanga alhagha.’ (Ebr. 6:12) Kandi ky’ekyabirileka ekithunga kya Yehova ikyathuhira mw’omuhwa ow’erikolha kutsibu erigherererya abalhume n’abakali abathaleghulha ng’abathwamabir’ighako omwa kitabu kino. Aliwe ibbwa lino thukoleki? Thutholere ithwibuka bindu bibiri bino: (1) Thutholere ithwalholha embere erighumya erikirirya lyethu; (2) thutholere ithwabya ithune mulengekania okwa maha awathuwithe.

4. Sitani abirikangania athi ngoku ni nzighu y’erikirirya, aliwe busana naki isithwalhuhirira?

⁴ Lholha embere erighumya erikirirya lyawu. Erikirirya liwithe enzighu eyikalire​—Sitani. Omuthabali w’ekihugho kino abirihindulha omughulhu ono eribya mbwarara eyikumaya erikirirya. Awithe akaghalha okw’ithwe. Eki kinatholere ikyaleka ithwalhuhirira erihimba n’erighumya erikirirya lyethu? Eyihi n’ahake! Yehova ni Munywani mukulhu w’abosi abakasondekanaya erikirirya ery’okwenene. Akathukakasaya athi iyo eribya iniane okwa lhuhandi lhwethu, thwanganalhwa na Sitani nibya iniathusagha! (Yak. 4:7)  Thukalhwa nayu omw’ibana endambi buli kiro erighumya n’erihimba erikirirya lyethu. Thuthi?

5. Abalhume n’abakali abathaleghulha ab’omwa Biblia bathunga bathi erikirirya lyabu? Soborera.

⁵ Ngoku thwabirilhangira, abalhume n’abakali abathaleghulha abakakanibawako omwa Biblia, sibabuthawa ibane n’erikirirya. Omwa ngebe syabu mukyalhangirika ngoku omulimu abuyirire w’akaleka abandu ibabya n’erikirirya. (Gal. 5:22, 23) Mubasaba obuwathikya, na Yehova mwaghumya erikirirya lyabu. Nethu thukole ng’ibo, eribya ithunibukire ngoku Yehova akaha omulimu wiwe abuyirire omwa buswire okwa bakasabagho kandi ibakolha erikwamana n’emisabe yabu. (Lk. 11:13) Hane ekilhabire okw’aho ekya thwanga kolha?

6. Ni kyahi ekyanga thuwathikya erighasirwa ndeke omughulhu thuk’igha okwa biri omwa Biblia?

⁶ Omwa kitabu kino, thwamathakania okwa by’erileberyako bike eby’abawithe erikirirya. Aliwe yikine abandi banene! (Soma Abaebrania 11:32.) Obuli ky’erileberyako kiwithe bingyi ebya kyanga thweghesya thwamakighako ndeke n’erighanirya kandi ithune musaba. Thwamakwama kya soma buyira okwa bandu ab’erikirirya aba, isithwendi himba erikirirya lyethu. Thwamanza erighasirwa ndeke, thutholere ithwaminya ndeke enzuko n’ebyosi ebihambire oko mwatsi oyo. Mughulhu wosi thwamibuka abalhume n’abakali abathahikene abo ngoku ‘babya bandu ng’ithwe,’ eby’erileberyako byabu ibikendi thuhambako ndeke. (Yak. 5:17) Thwamayihira omwa bisandu byabu, ithwangana lhangira ngoku babya bakayowa bakabana ebitsibu ebiri ng’ebyethu.

7-9. (a) Abandi balhume n’abakali abawithe erikirirya ab’omwa Biblia, banga yowire bathi ku baramya Yehova ng’ithwe munabwire? (b) Busana naki thutholere ithwa ghumya erikirirya lyethu omwa mikolere?

⁷ Emikolere yethu nayu yikathasya ghumaya erikirirya lyethu. Kundi nibya, ‘erikirirya butsira mibiiri liholire.’ (Yak. 2:26) Thalengekania abalhume n’abakali abathwabirikaniako aba nga banga tsemire bungahi ku bahebwa omubiiri owali ng’owa Yehova athuhere munabwire!

⁸ Ng’eky’erileberyako, Abrahamu anga yowire athi kw’abwirwa indi aramiraye Yehova butsira okwa kiherero ky’amabwe ekihimbirwe omwa mbwarara, aliriryo aramaye iniane omwa kithunga ky’abaramya balikyabo okwa Kisenge ky’Obwami ekyuwene n’okwa mihindano eminene-minene, aho emilhaghe eyo alhangira “hali” yikakanibawako n’erisoborerwa ndeke? (Soma Abaebrania 11:13.) Kandi ibbwa Eliya nayu anga yowire athi kw’abwirwa indi omubiiri wiwe ly’eribungira abandu omwa buholho n’eribakolya kw’omwatsi ow’akahumulikanaya n’eriha amaha, omwakanya k’erihebwa omubiiri w’erithoghothya abaminyereri ba Baali kandi iniane mulengaho erikolera Yehova omwa buthabali bw’omwami oyuwabya iniabirighana Nyamuhanga? Ahathe erithika-thika, abalhume n’abakali abawithe erikirirya aba banga tsemire kutsibu ku bahebwa olhusunzo lhw’eriramya Yehova ng’ithwe munabwire?

⁹ Kwesi thulhole embere erighumya erikirirya lyethu omwa mikolere. Thwamakolha ekyo, ithukendibya ithukagherereraya abalhume n’abakali  abawithe erikirirya abali omwa Kinywe kya Nyamuhanga. Ngoku kikanganibwe omwa nzuka-nzukana, ithukendi yowa ibabiribya nga banywani bethu ndeke. Aliriryo, endambi iyikendi hika ithw’ongera eribalhangira mwa banywani bethu ab’okwenene.

10. Thukendi syabya n’etseme yahi omwa Paradiso?

¹⁰ Eribya ithune mulengekania okwa maha awathuwithe. Abalhume n’abakali abathaleghulha babiribana akaghalha busana n’amaha awa Nyamuhanga abiribaha. Nawu kwa wune wuthya? Ng’eky’erileberyako, thalengekania okwa butseme obw’eribana abaghombe ba Nyamuhanga abathaleghulha bakabana engebe ‘omw’ilhubuka ly’abathunganene.’ (Soma Emibiri 24:15.) Wanzire iwasyababulya bibulyo nga byahi?

11, 12. Omwa kihugho kihya-kihya ni byahi ebyawanga bulya abandu bano: (a) Abeli? (b) Noa? (c) Abrahamu? (d) Ruta? (e) Abigaili? (f) Esiteri?

¹¹ Omughulhu wukendi syabana Abeli, wune mwendi syanza erimubulya ababuthi biwe nga babya basorire bathi? Kutse iwangana mubulya wuthi: “Muwana kania n’abakerubi ababya bakatheya enzira eyikalholha omwa Edeni? Mubana kusubirya?” Kandi ibbwa ya Noa? Iwangana mubulya wuthi: “Mbwino muwan’ubaha Abanefili? Muwathoka wuthi eritheya ebisoro ebyosi ebyabya omwa bwathu?” Wamasyabana Abrahamu iwangana mubulya wuthi: “Wanabya wukakania na Semu? Nindi oyuwakukangiriraya oku Yehova? Mukyana kw’olhobera erilhua e Uri?”

¹² Kandi thuthalebya ebibulyo bike ebyanga bulibwa abakali abathaleghulha abakendi syalhubuka. “Ruta, ni kyahi ekyaleka iwanza eribya muramya wa Yehova?” “Abigaili, muwanasagha eribwira Nabali ngoku wabiriwathikya Dawudi?” “Esiteri, ebyawu na Mordekayi mubyahwerera hayi enyuma w’ebya thubasiko ebiri omwa Biblia?”

13. (a) Abakendi syalhubukibwa bangana syakubulya bathiki? (b) Wukayowa wuthi busana n’amaha w’erisyalholha okwa balhume n’abakali abathaleghulha abakera?

¹³ Omwa kwenene abalhume n’abakali abathaleghulha abo nabo bangana syabya n’ebingyi by’erikubulya. Ka kikendi syatsemesya eribabwira okwa biro by’enyuma ebikalire kandi ngoku Yehova atsumulha abandu biwe omwa buthuku obo! Ahathe erithika-thika kikendi syabatsemesya kutsibu bakaminya ngoku Yehova aberereraya emilhaghe yiwe yosi. Omwa biro ebyo kikendisyabya isikikiyithaghisaya erighanirya okwa baghombe ba Nyamuhanga abathaleghulha abakakanibawako omwa Biblia. Thukendisyabya ithune nabo omwa Paradiso! Kwesi lino wulhole embere erikolha ekyosi-kyosi erilhangira wuthi abandu abo bakabya banywani bawu. Lholha embere erigherererya erikirirya lyabo. Ka kikutsemesaye erikolera Yehova iwune haghuma nabo ng’abanywani bawu erihika kera na kera!