ERISOMO 8
Eby’Erileberyako Ebikakangiriraya
Matayo 13:34, 35
OMWA BIKUHI: Omw’ikangirirya lyawu, kolesaya eby’erileberyako ebyolhobire ebyanga kura obulengekania bw’abahulikiriri kandi ebyangana kangirirya esyonzumwa ngulhu-ngulhu.
NGOKU KYANGA KOLHWA:
-
Kolesaya eby’erileberyako ebyolhobire. Nga Yesu, kolesaya ehindu hike-hike omw’isoborera ebindu ebinene-binene, kutse ebyolhobire erisoborera ebikalire. Isiwahira omwa ky’erileberyako mwa bingyi ebitheyithaghisibawa ebyanga leka ikyakalha eriyitheghererya. Lhangira wuthi kwenene ebiri omwa ky’erileberyako binahambire okwa nzumwa eya wukakangiriraya nuku abahulikiriri sibalengemeribawe.
-
Lengekanaya okwa bahulikiriri bawu. Sombolha eby’erileberyako ebihambire okwa mibiiri y’abahulikiriri n’ebya batsomene. Yitheghaye okw’ikolesya eby’erileberyako ebyanga hemulha kutse eriponesya abandi.
-
Kangiriraya esyonzumwa ngulhu-ngulhu. Ambi eby’erileberyako ibyabya ibikasoborera esyonzumwa ngulhu-ngulhu. Lhangira wuthi abahulikiriri sibal’ibuka eky’erilhangirirako kisa, aliwe n’enzumwa eyirimu.