‘Mubye bakangirirya.’ (Ebr. 5:12) Thakilengekaniako! Yehova​—Omukangirirya oyulengethukire omwa buhangwa bwosi—​akathukokaya athi thukangiriraye abandi okw’iyo! Olhumimbi lhwosi-lhwosi olhw’erikangirirya, mbulha ni mw’eka, omwa kithunga, kutse omw’ithulira, ni lhusunzo lhw’obughuli bunene kandi ni lhukwamirwa olhulithohire. Thwanga thokalho thuthi?

Eky’erisubirya kikabanika omwa binywe ebya mukwenda Paulo ahandikira Timoteo athi: “Wuyihe okw’omubiiri w’erisomera abandu ekitabu kya Nyamuhanga, kandi wuyihe okw’ihana n’erikangirirya.” Paulo mwongera athi: “Wamakolha wuthya wasyayilhamya haghuma n’abakakuhulikirira.” (1 Tim. 4:13, 16) Wuli n’omwatsi owakalhamaya esyongebe ow’eribwirako abandi. Neryo ni kikulhu erilengaho eryuwania erisoma lyawu n’erikangirirya. Ebrokyuwa eno yikolirwe erikuwathikya erikolha ekyo. Thuthalebya ebighuma-bighuma okwa birimuyo.

Yehova ya “Mukangirirya” Mukulhu. (Isa. 30:20) Nomwakine indi ebrokyuwa eno yikendi kuwathikya eryuwania erisoma n’erikangirirya lyawu, isiwibirirawa ngoku Yehova ya Mwinye mwatsi owathukathulha kandi ngoku yukaletha abandu b’okw’iyo. (Yn. 6:44) Busana n’ekyo, mughulhu wosi musabe omulimu wiwe abuyirire. Kolesaya mughulhu wosi Ekinywe kiwe. Isiwaha amalengekania wawu, leka abandu balhangire ngoku ni malengekania wa Yehova. Lengaho eriwathikya abahulikiriri bawu erimwanza kutsibu.

Wabirikokibwa erikangirirya omwatsi mukulhu kutsibu owabirithahebwa abandu. Thuli n’amaha thuthi wukendibya wunemwongera eriyikethera “amaaka agho Nyamuhanga” akaha, wukendi thoka.—1 Pet. 4:11.

Abakangirirya balikyenyu,

Akathunga Akakasondolha ak’Abema ba Yehova