Wasi Abema ba Yehova bangahi? Abandi banganabya ini baliranwa bawu, iwukakolha nabu, kutse iwukasoma nabu. Kutse banganabya ibanakanirye nawu okwa myatsi ye Biblia. Aliriryo thuli bandu muthina ki, kandi ni kyahi ekikaleka ithwabwira abandu ebya thwikirirye?

Thuli bandu ba buli kiro. Thulhuire omwa mibere muthina-muthina. Abandi okw’ithwe balhua omwa madini muthina-muthina, n’abandi sibabya bikirirye Nyamuhanga. Aliriryo, thwabere thuthe thwabya Bema, ithwe bosi muthwatsuka erigha ndeke e Biblia. (Emibiri 17:11) Muthwaligha ebya thw’igha, neryo thwamathwamu eriramya Nyamuhanga Yehova.

Erigha e Biblia likathughasira. Nethu thukabana ebitsibu n’erilemererwa ng’abandi. Aliriryo erighendera okwa misingyi ye Biblia buli kiro, lyabirileka ithwathoka eribya n’engebe eyuwene. (Esyonyimbo 128:1, 2) Eki kikaleka ithwabwira abandi okwa bibuya ebya thuk’igha omwa Biblia.

Thukaghendera okwa bihano bya Nyamuhanga. Emisingyi eyiri omwa Biblia yikaleka ithwayowa ndeke n’erisikya abandi, kandi yikaleka ithwabya mw’ekwenene n’eribya b’olhukeri. Emisingyi eyi yikaleka abandu ibabya n’emibere eyuwene kandi ibakolha ebibuya, kandi yikaleka abandu ibabya n’obughuma n’esyongeso omw’eka. Thuli lhughanda lhughuma olhw’obunyakirimu omwa kihugho kyosi, olhuthawithe lhubibi, kundi thukyasi ndeke ngoku “Nyamuhanga syawithe bithagha” kutse akasolholho. Nomwathune bandu ba buli kiro, thuli mbaghane.—Emibiri 4:13; 10:34, 35.

• Abema ba Yehova bali bathi ng’abandi bandu?

• Ni byahi ebya Abema ba Yehova babirigha erilhua omwa Biblia?