Buthuku buke Yesu iniakisiya iniaholha, mwabugha athi: “Engulhu yuwene y’Obwami eyi yasyatsuka erithulhughanibwa omwa kihugho kyosi busana n’eriminyisya ebihanda byosi, neryo enduli yasyahika.” (Matayo 24:14) Aliriryo ibbwa, omubiiri ow’erithulira oyu ow’ekihugho kyosi anga kolirwe athi? Omw’ikwama eky’erileberyako ekya Yesu ahiraho iniane okwa kihugho.—Luka 8:1.

Thukalengaho erihika okwa bandu omwa miyi yabu. Yesu mwakangirirya abigha biwe erithulha engulhu yuwene nyumba okwa nyumba. (Matayo 10:11-13; Emibiri 5:42; 20:20) Abathuliri ab’omwa kighonye ky’erimbere ibakahebawa amalhambu aw’erithuliramu. (Matayo 10:5, 6; 2 Abanya Korinto 10:13) Kuthya munabwire, omubiiri wethu ow’erithulira akakolhawa omwa buyithondeke, kandi obuli kithunga kikahebawa obulhambu obw’erithuliramu. Eki kikathuthokesaya eriberererya ekihano kya Yesu eky’erithulha “engulhu yuwene oko bandu.”—Emibiri 10:42.

Thukalengaho erihika okwa bandu ahosi-hosi ahabali. Kandi Yesu mwahira h’eky’erileberyako eky’erithulira omwa myanya eyikabya mw’abandu banene, ngokwa myalo kutse okwa bithehero. (Mariko 4:1; Yoane 4:5-15) Nethu thukathulira abandu ahosi-hosi ahathwanga beya—okwa syombalhu, omwa hithali, kutse okwa simu. Kandi thwamabana akaghisa, thukathulira abaliranwa, abathukakolha nabu, abathukasoma nabu, n’abahughu. Ebyosi ebi byabirileka abandu bangyi omwa kihugho kyosi ibowa “engulhu yuwene” ey’omulhamu.—Esyonyimbo 96:2.

Wukalhangira hane abandu abawanga thulira engulhu yuwene ey’Obwami bwa Nyamuhanga n’eribabwira ngoku yanga baghasira omwa buthuku obukasa? Isiwayihunira n’omwatsi owakaha amaha oyu. Lhangira wuthi omwa byalhuba wukababwiragho!

• Ni “ngulhu yuwene” yahi eyitholere erithulhughanibwa?

• Abema ba Yehova bakagherereraya bathi eky’erileberyako kya Yesu eky’erithulira?