Ekinywe Beteli omwa Kihebrania kikamanyisaya “Enyumba ya Nyamuhanga.” (Enzuko 28:17, 19) Ni rina eritholere eryabirihebwa emyanya eya Abema ba Yehova babirihimba erithimba omwa kihugho kyosi aho omubiiri w’erithulira akasondolerawa n’erisighikwa. Akathunga Akakasondolha kali okwa kyaghanda kikulhu e New York State, U.S.A. kandi kakalebereraya emibiiri ey’ebyaghanda eby’omuthahulha ebiri omwa bihugho bingyi. Abakakolera omwa myanya eyi basibwe ng’Abanya Beteli. Bakikalha n’erikolera haghuma, bakalira ebyalya bya haghuma, n’erighira e Biblia ya haghuma omwa bughuma ng’erihiika.—Esyonyimbo 133:1.

Oyu ni mwanya w’embaghane owali kw’Abanya Beteli abakayihayo. Okwa buli Beteli, kukabya abalhume n’abakali ababiriyihayo erikolha erisonda lya Nyamuhanga n’erikolha emibiiri y’Obwami mughulhu wosi. (Matayo 6:33) Sibali thunga omusara, aliriryo bakahebawa ah’erikesya n’ebyalya n’akasente kake akanga bawathikya okwa biyithawa byabu. Obuli mundu okwa Beteli awithe eky’akakolha, obundi omwa ofisi, omwa kitsumbyo, kutse aha bakalira. Abandi bakakolera aha bakahulhukiraya ebitabu, kutse ibakolha obuyonzo, aha bak’ogheraya esyongyimba, abakasugha, kutse n’eyindi mibiiri.

Abaliko bakakolha kutsibu erisighika omubiri ow’erithulha Obwami. Ekighendererwa kikulhu eky’obuli Beteli ly’erihikya ekwenene ye Biblia y’okwa bandu bangyi. Eky’erileberyako k’akatabu nga kano. Kahandikawa omwisi sy’obusondoli bw’Akathunga Akakasondolha, kamathumirwa abakahindulha emibughe omwa bihugho muthina-muthina okwa syokombyuta, kamahulhukibwa omwa syoprinta esikanguhaya kutsibu esiri omwa syo Beteli ndebe, erighunzerera, kamathumwa omwa bithunga ebilhabire omu 110,000. Omwa byosi ebi, Abanya Beteli bakasighika kutsibu omubiiri owakayithaghisibawa lino kwilhaba eyindi, ni bugha ambu, erithulhughania engulhu yuwene.—Mariko 13:10.

• Ni bahi abakakolera okwa Beteli, kandi bakawathikibawa bathi?

• Ni mubiiri wahi owakayithaghisibawa lino owakasighikawa n’obuli Beteli?