Ahathukaramiraya thukahulhaho mwa Kingdom Hall kutse Ekisenge ky’Obwami kundi ebya thuk’ighiramu bihambire oko Bwami bwa Nyamuhanga—omwatsi mukulhu owa Yesu abya akathulhughania.—Luka 8:1.

Ni myanya eyikabya mw’eriramya ly’ekwenene. Abema ba Yehova bakakolesaya emyanya eyi erithegha-theghania omubiiri w’erithulira omwa kitsweka kyabu. (Matayo 24:14) Ebisenge by’Obwami sibirilingirirana omwa bunene kandi sibisosene, aliriryo bihimbire ndeke butsira mapambu-pambu, kandi ebindi bikakolesibawa n’ebithunga ebilhabire okwa kighuma. Omwa myaka eya lino-lino, thwabirihimba esyongumi n’esyongumi sy’Ebisenge by’Obwami bihya-bihya (hakuhi ebisenge bithano obuli kiro) busana n’eryongera ly’ebithunga byethu. Eki kikathokekana kithi?—Matayo 19:26.

Bikahimbawa omwa syosente esikahirawa haghuma erikolha omubiiri oyo. Esyosente esi sikathumawa okwa kyaghanda ky’omuthahulha nuku syanga hebwa ebithunga ebikayithagha erihimba kutse erithasyuwania Ekisenge ky’Obwami.

Bikahimbawa n’abandu b’emisindo yosi abakayihayo ahathe erithuhwa. Omwa bihugho bingyi, habirihiribwa balikyethu abakahimba ebisenge by’Obwami (Kingdom Hall Construction Groups). Abaghombe abahimbi n’abakayihayo bakabya n’olhukwamirwa olhw’erighenda bakahimba Ebisenge by’Obwami omwa bitsweka muthina-muthina eby’ekihugho ekya balimu nibya n’omwa bitsweka by’ehaali, bakawathikaya ebithunga by’eyo erihimba Ebisenge byabu by’Obwami. Omwa bindi bihugho, balikyethu abatholere babirisombolhwa erilebererya obuhimbe bw’Ebisenge by’Obwami omwa kitsweka kirebe ekya babirihebwa n’erithasyabyuwania. Nomwakine indi abandi abasi erikolha omubiiri ow’erihimba erilhua omwa kitsweka ekyo bakayihayo okwa buli buhimbe, abali omwa kithunga b’abakayihayo kutsibu eriwathikya. Omulimu wa Yehova n’akaghalha ako bandu biwe bakahiraho n’omuthima wosi bya bikaleka ebyosi ebi ibyathokekana.—Esyonyimbo 127:1; Abanya Kolosai 3:23.

• Busana naki emyanya eya thukaramirayamu thukahulhayo mwa Bisenge by’Obwami?

• Kikathokekana kithi erihimba Ebisenge by’Obwami omwa kihugho kyosi?