Erithoka erithulhughania ndeke “engulhu yuwene” okwa “buli kithunga ky’abandu, n’obuli kihanda, n’obuli mubughe, n’okwa bandu,” thukahulhukaya ebitabu omwa mibughe eyilhabire omu 750. (Eribisulirwa 14:6) Thukathoka thuthi omubiiri mungana n’oyu? Balikyethu erilhua omwa bihugho muthina-muthina bakathuwathikaya erihandika, haghuma n’abahinduli b’emibughe—abosi ni Bema ba Yehova.

Eritsuka, omwatsi akatheghekawa omwa Lhusungu. Akathunga Akakasondolha kakalebereraya omubiiri w’Abakakolha okwa by’Erihandika abali okwa kyaghanda kyethu kikulhu. Aba, bakathegha-theghanaya emibiiri ey’abakahandika abali okwa kyaghanda kikulhu n’eyindi mithahulha mirebe. Eribya n’abahandiki abakalhua omwa bihugho muthina-muthina, kikaleka ithwathoka erihandika emyatsi eyikahamba okwa bandu erilhua omwa bihanda byosi.

Omwatsi oyu akathumirawa abakahindulha. Omwatsi oyu akabya abirilhabwamu ndeke n’erihamibwako, akathumirawa abakahindulha okwa syokombyuta omwa kihugho kyosi, neryo ibahindulha, ibalhaba mugho, n’erisomagho bakalebya nga mune sobya. Bakalengaho erikolesya “ebinywa by’ekwenene” ebikendi lhusyayo esyonzumwa esyo omwa Lhusungu.—Omugambuli 12:10.

Esyokombyuta sikanguhaya omubiiri. Ekombyuta siyanga kolha omubiiri w’abahandiki n’abahinduli. Aliriryo yangana bawathikya eryanguhya emibiiri yabu. Abema ba Yehova babiriyikolera endegheka ey’ekombyuta eyikahulhawa mwa Multilanguage Electronic Publishing System (MEPS). Ekombyuta yikakolesaya endegheka eyi erikolha okwa mibughe mingyi, erihira mw’ebisasani, n’erithonda ebinywe bya ndeke nuku ebitabu byanga hulhukibwa.

Busana naki thukakolha ebyosi ebi, n’okwa mibughe eyikabughawa n’abandu bake? Kundi Yehova anzire “abandu abosi balhamibawe, n’eriminya ndeke omwatsi w’ekwenene.”—1 Timoteo 2:3, 4.

• Ebitabu byethu bikahandikawa bithi?

• Busana naki ebitabu byethu bikahindulhawa omwa mibughe mingyi?