Abandu bangyi bakalengekanaya bathi Abema ba Yehova ni dini mbyaka. Aliriryo, ahabw’emyaka eyilhabire omu 2,700 enyuma, abaghombe ba Nyamuhanga w’ekwenene babya bakakanibwako “ng’abalhangiri” kutse abema. (Isaya 43:10-12) Thukatsuka, thwabya thukahulhwa mw’Abigha be Biblia. Aliriryo omo mwaka owa 1931, muthwatsuka eryahulhwa mw’Abema ba Yehova. Busana naki?

Kikaminyikalhaya Nyamuhanga wethu. Erina lya Nyamuhanga, Yehova, likabanika omwa mikunzo ye Biblia eya kera emirundi eyilhabire omu kasanju. Omwa syombindulha nyingyi sye Biblia, ahangabere erina eri habirihiribwa ebitsumbi nga: Mwami Mukulhu, Mukama kutse Nyamuhanga. Kandi nibya Nyamuhanga mwabwira Musa y’erina liwe ko ya Yehova athi: “Eri lye rina lyaghe erihika kera na kera.” (Eriluayo 3:15, NW) Omwa nzira eyi, mwakangania kwa ni wambaghane okwa sindi nyamuhanga syosi esy’amabehi. Thukayisyetha eryahulhwa omwa lina lya Nyamuhanga eribuyirire.

Kikakanganaya omubiiri owathukakolha. Abandu bangyi abakera, eritsuka okwa muthunganene Abeli, mubaha obwema obukakanganaya ngoku bikirirye Yehova. Emyaka yabere yine mulhaba, Noa, Abrahamu, Sara, Musa n’abandi mubayongera okwa “ndeko nene y’abalhangiri” eyi kutse abema. (Abaebrania 11:4–12:1) Ngoku omundu angan’imira omundu oyuthe kw’omusango, nethu thukimira Nyamuhanga wethu.

Thukagherereraya Yesu. E Biblia yikamwahulha mwa “omulhangiri oyuthaleghulha n’ow’ekwenene.” (Eribisulirwa 3:14) Yesu iyuwene-wene mwabugha athi “mwaminyikalya erina lya Nyamuhanga” kandi athi “mwathulha omwatsi w’ekwenene” oku Nyamuhanga. (Yoane 17:26, NW; 18:37) Busana n’ekyo, abigha ba Yesu ab’okwenene bakahulhawa omwa lina lya Yehova n’eriminyikalyalyo. Eki kya Bema ba Yehova bakalengaho erikolha.

• Ni kyahi ekyaleka Abigha be Biblia ibatsuka eryahulhwa mw’Abema ba Yehova?

• Yehova atsuka eribya n’Abema okwa kihugho mughulhu wahi?

• Omwema mukulhu wa Yehova nindi?