E Biblia muyalhaghulha yithi Kristo akendi syabya abiriholha, abakangirirya b’amabehi bakendi syingira omwa Bakrisitayo ab’erimbere n’eritsandya ekwenene ye Biblia. (Emibiri 20:29, 30) Kwenene kwa kyanabya kyabere kithya. Mubatswangania esyongangirirya sy’amadini w’ekikafiri omwa syongangirirya sya Yesu, neryo hamabuthuka Abakrisitayo ab’amabehi. (2 Timoteo 4:3, 4) Thwangaminya thuthi ngoku thwabiribana ekwenene eyiri omwa Biblia?

Obuthuku mubwahika Yehova amabisulha ekwenene. Mwalhaghulha athi omwa ‘mughulhu w’enduli eriminya lya syakanyirira.’ (Danieli 12:4) Omo mwaka owa 1870, abandu bake ababya bakasondekania ekwenene mubakiminya ngoku esyonyikirirya nyingyi esy’amadini sisiseghemere okwa Masako.Busana n’ekyo, mubatsuka erisekulya omwa Biblia nuku bayitheghereraye ebya yikakangiriraya; neryo Yehova mwabatsumulha.

Abalhume balebe mub’igha ndeke e Biblia. Abigha be Biblia ab’omuhwa aba, mubakolesya esyonzira ndebe bak’igha e Biblia, kandi sya thunemukolesya na munabwire. Ibakasombolha omwatsi mulebe neryo ibalebya e Biblia nga yikakanaya kugho kwa yithiki. Ibakabya bamalemwa eriyitheghererya omulhondo mulebe, ibakarondaya eyindi milhondo eyanga soboreragho. Ibakabya babirilhangira ngoku Amasako akasighika omwatsi, ibakahandika omwatsi oyo. Erileka e Biblia yiyisoborere, mulyaleka ibathasyabana ekwenene eyihambire okwa rina lya Nyamuhanga n’Obwami bwiwe, ekighendererwa kiwe busana n’abandu n’ekihugho, emibere eya baholi bakabyamu, n’amaha w’erilhubuka. Erisekulya lyabu eri mulyaleka ibayihighulha okwa syonyikirirya sy’amabehi.—Yoane 8:31, 32.

Omo mwaka owa 1879 Abigha be Biblia mubalhangira ngoku endambi ey’erilhalhania ekwenene ehosi-hosi yabirihika. Neryo omo mwaka oyo, mubatsuka erihulhukya egazeti eya Akaleberyo Akakarangirira Obwami bwa Yehova, akane muhulhuka na munabwire. Lino thune muthulhughania ekwenene omwa bihugho 240 n’omwa mibughe eyilhabire omu 750. Eriminya ekwenene siriri lya thakanyirira lithya nga munabwire!

• Kristo abere abiriholha, ni kyahi ekyabya kyahikire oko kwenene ye Biblia?

• Ni kyahi ekya thuthokesaya erithasyabana ekwenene eyiri omwa Kinywe kya Nyamuhanga?