Abanya Beteli bakakolha emibiiri muthina-muthina erisighika omubiiri ow’erithulira omw’ihanga lighuma kutse omwa mahanga mangyi. Bangana kolha ng’abahinduli b’emibughe, eriprintinga esyogazeti, ebitabu, ibakolera ahakabikawa ebitabu, erikolha okwa by’esyovidiyo, kutse eyindi myatsi.

Akathunga k’Omuthahulha kakalebereraya emibiiri eyikakolhawa. Akathunga Akakasondolha kakaha Akathunga k’Omuthahulha akakabya kw’abasyakulhu basathu kutse kwilhaba aho abatholere ndeke b’olhukwamirwa olhw’erithegha-theghania obuli kyaghanda ky’omuthahulha. Akathunga aka kakabya ikanemumanyisya Akathunga Akakasondolha ngoku omubiiri akaghenda n’okwa bitsibu byosi-byosi ebyanga buthukaho. Esyoripoti ng’esyo sikawathikaya Akathunga Akakasondolha erithwamu nga ni myatsi yahi eyanga kanibwako omwa buthuku bw’embere omwa bitabu byethu, okwa mihindano emike-mike n’eminene-minene. Abakathumawa erilhua okwa Kathunga Akakasondolha bakabera erithumwa eribungira emithahulha busana n’eriha abali okwa Akathunga k’Omuthahulha b’obusondoli ngoku banga kolha emibiiri yabu. (Emisyo 11:14) Hakabya n’endegheka ey’embaghane ey’omuthumwa erilhua okwa kyaghanda kikulhu eriha omukania owakahimba abandu abali omwa muthahulha oyo.

Eriwathikya ebithunga ebiri omwa muthahulha oyo. Baghalha bethu abawithe olhukwamirwa abali okwa kyaghanda ky’omuthahulha bakahamaya okw’itsuka ly’ebithunga bihya-bihya. Kandi bakasondolha omubiiri ow’abatemburi, abamisani, n’abalebererya b’omuthimbo abali omwa muthahulha oyo. Bakathegha-theghanaya emihindano eminene-minene, obuhimbe bw’Ebisenge by’Obwami, n’erilhangira bathi ebitabu bikahika omwa bithunga. Ebyosi ebikakolhawa okwa kyaghanda ky’omuthahulha bikaleka omubiiri ow’erithulira iniakolhwa omwa buyithondeke.—1 Abanya Korinto 14:33, 40.

• Ehithunga hy’Omuthahulha hikawathikaya hithi Akathunga Akakasondolha?

• Ekyaghanda ky’omuthahulha kikakolha okwa mibiiri yahi?