Wunanzire erisekulya nuku wang’ongera eriminya e Biblia? Hane ebindu ebya wukayowa iwanzire eriminya omwa Biblia? Kutse wune wathayibulya ekinywe kya Nyamuhanga nga kyangana kuwathikya okwa kindu kyo-kyosi ekikakulyambaya? Byamabya ikwa biri bithya, kolesaya eribikiro ery’omwa Kisenge ky’Obwami.

Muli ebindu ebyanga kuwathikya erisekulya. Obundi si wuwithe ebitabu ebyosi ebiseghemere okwa Biblia eby’Abema ba Yehova omwa mubughe wawu. Aliriryo eribikiro ery’okwa Kisenge ky’Obwami mune ebitabu ebya hulhukibawa lino-lino. Kandi mwanganabya imune esyo Biblia muthina-muthina, edikisyonare eyuwene n’ebindi bitabu ebyanga kuwathikya omw’isekulya. Emihindano yithe yatsuka kutse yikahwamu, wangana kolesya ebitabu ebiri omw’ibikiro. Mwamabya imune ekombyuta, kwanganabya ikune e Watchtower Library. Eyi ni ndegheka ey’ekombyuta eyiri kw’ebitabu byethu binene, kandi erisekulya wukakolesyayo lyolhobire kundi wanganarondya omuthwe w’omwatsi, ekinywa, kutse erisako iwabibana lhuba.

Yikaghasira kutsibu abigha omwa Muhindano ow’Engebe n’Omubiiri Wethu. Wangana kolesya eribikiro eriri omwa Kisenge ky’Obwami eri wukathegheka ekitsweka kyawu. Omulebererya ow’Omuhindano ow’Engebe n’Omubiiri Wethu yuk’imanira eribikiro eryo. Yukalhangira athi ebitabu ebya lino-lino bine omw’ibikiro kandi binathondire ndeke. Iyo kutse oyukakweghesaya e Biblia bangana kukangania ngoku wangabana omwatsi owa wukanza. Aliriryo siwutholere wukathwalha ekitabu eky’omw’ibikiro eryo. Kandi thutholere ithwahamba ebitabu bya ndeke kandi isithwabihandika-handikamo.

E Biblia yikasoborera yithi eribana “eriminya lya Nyamuhanga,” thutholere ithwa lisekulya “ng’ebindu bibisirwe.” (Emisyo 2:1-5) Eribikiro eri lyangana kuwathikya eritsuka erisekulya.

• Ni byahi ebiri omw’ibikiro ery’Ekisenge ky’Obwami ebyanga kuwathikya erisekulya?

• Nindi oyuwanga kuwathikya erithoka erikolesya eribikiro?