Thukaghenda okwa mihindano yethu mughulhu wosi obuthuku nomubwangabya isibuwene kutse nomukyanga yithaghisya erighenda olhughendo lhuuli. Busana naki Abema ba Yehova bakalengaho eribya haghuma n’Abakrisitayo balikyabo nomubangabya ibawithe ebitsibu kutse ibalhuhire busana n’emibiiri eya balyakolha?

Likaleka ithwabya ndeke omwa maghalha. Omukwenda Paulo mwahandika athi “owundi alengekanaye okwa wundi” akakania okwa bathukabya nabo omwa kithunga. (Abaebrania 10:24, NW) Eki kikamanyisaya kithi thutholere ithwaminyangana. Busana n’ekyo ebinywe ebi bikathuhira mw’omuhwa ow’eritsomana abandi. Eriminya abandi Bakristayo balikyethu likaleka ithwaminya ngoku abandi babirilhaba omwa bitsibu ebya thuwithe kandi bangana thuwathikya eribisingura.

Likakamathaya obughuma bwethu. Abathukahindana nabu okwa mihindano yethu bakabya ini banywani ndeke. Okwa bundi buthuku thukabana endambi ey’eriyitsemeseryamu haghuma. Eribya haghuma ng’eri likathughasira lithi? Likaleka ithwaminya abandi ba ndeke, neryo ikyakamathya olhwanzo lhwethu. Neryo bamabana ebitsibu kikathwanguhira eribawathikya kundi thwabirikolha obunywani obughumire. (Emisyo 17:17) Omw’ibya haghuma n’abalikyethu abosi ab’omwa kithunga kyethu, thukakanganaya ngoku ‘thukawathikanaya.’—1 Abanya Korinto 12:25, 26.

Thukakuhira mw’omuhwa ow’erinywana abakakolha erisonda lya Nyamuhanga. Abanywani ng’abo wukababana omwa Bema ba Yehova. Kisi isihabya ekikakulemesaya erihindana nethu.

• Busana naki kikathughasira eribya haghuma okwa mihindano?

• Wanzire iwahindana nethu mughulhu wahi erithuminya?