Nyamuhanga anzire ithw’ikalha omwa kihugho paradiso mwa kera na kera omwa buholho n’etseme!

Aliriryo wangana yibulya, ‘Eki kyangana thokekana?’ E Biblia yikabugha yithi Obwami bwa Nyamuhanga bukendi syaleka eki ikyathokekana, kandi Nyamuhanga anzire abandu abosi ibigha oko Bwami obo n’ekighendererwa kiwe busana nethu.—Esyonyimbo 37:11, 29; Isaya 9:7.

Nyamuhanga akathusunzira ebibuya.

Ngoku thatha omubuya akasunzira abaana biwe b’ebibuya, Thatha wethu ow’elhubulha anzire ithwabana etseme eyithabahwa. (Isaya 48:17, 18) Abirilhaghanisya athi “oyukakolha erisonda lya Nyamuhanga asyakotha kera na kera.”—1 Yoane 2:17.

Nyamuhanga anzire ithwalendera omwa syonzira siwe.

E Biblia yikabugha yithi Omuhangiki wethu anzire “erithukangirirya esyonzira siwe” nuku thuthoke “erilendera omwa syombalhu siwe.” (Isaya 2:2, 3) Abiritheghekania “abandu busana n’erina liwe” nuku baminyikalhaye erisonda liwe omwa kihugho kyosi.—Emibiri 15:14.

Nyamuhanga anzire ithwamuramya omwa bughuma.

Eriramya ery’okwenene likaleka abandu ibabya bughuma omo lhwanzo omwakanya k’eribaghabulha. (Yoane 13:35) Ni bahi munabwire abakakangiriraya abandu abosi ehosi ngoku bangana kolera Nyamuhanga ibane bughuma? Bana eky’erisubirya erilhabira omwa katabu kano.