Hakabya hamawa ekitsinduli, Abema ba Yehova bakalhua ibathwalira balikyabo abalyahambawako b’obuwathikya. Obuwathikya obu bukakanganaya ngoku thwanzene kutsibu. (Yoane 13:34, 35; 1 Yoane 3:17, 18) Thukawathikaya omwa nziraki?

Thukahayo esyosente. Omughulhu enzalha nene yawa e Yudea, Abakrisitayo abe Antiokia mubalebeka balikyabo b’esyosente esyanga bawathikya. (Emibiri 11:27-30) Kuthya, thukabya thwamowa ngoku balikyethu abali omwa kitsweka kirebe bawire kw’ekitsibu ekikalire, thukabathumira obuwathikya erilhabira omwa kithunga kyethu.—2 Abanya Korinto 8:13-15.

Thukawathikaya n’omwa sindi nzira. Abasyakulhu b’ekithunga abali eyiryawa ekitsinduli bakalhangira bathi bakaminya ahali obuli muthuliri kandi ng’ali athi. Akathunga akakakolha okw’iwathikya kakalhangira kathi ebyalya, amaghetse w’erinya, esyongyimba, ah’erikesya, n’omubatsi bikabahikako. Abema bangyi abasi omubiiri mulebe bakayihayo eriyawathikya, ng’erikokothya amanyumba awabiritsanda n’Ebisenge by’Obwami. Obughuma obwa thuwithe omwa kithunga n’erikolera haghuma bikaleka ithwabana lhuba obuwathikya n’abakendi kolha. Nomwakine indi thukawathikaya “abali omwa kithunga ky’abikirirye,” thukawathikaya n’ab’esindi nyikirirya kyamathokekana.—Abanya Galatia 6:10.

Thukabahumulikanaya bunyakirimu n’omwa malengekania. Abalyawa kw’ekitsinduli bakayithagha kutsibu-tsibu erihumulikanibwa. Okwa buthuku ng’obo, Yehova “Nyamuhanga w’erikirania lyosi” akathuha akaghalha. (2 Abanya Korinto 1:3, 4) Thukatsema thukabwira abali omwa bulighe okwa milhaghe eyiri omwa Biblia, eribakakasya ngoku Obwami bwa Nyamuhanga bukisiya ibwaghunzaho ebitsibu ebyosi ebikaleka ithwaghalhwa.—Eribisulirwa 21:4.

• Ni kyahi ekikathokesaya Abema ba Yehova erikolha omwa byalhuba omughulhu hali ekitsibu ekikalire?

• Ni byahi ebya thwanga bugha thukahumulikania bunyakirimu abalyawa kw’ekitsinduli?