Wanamalhangira ebisasani ebiri omwa katabu kano ngoku Abema ba Yehova bambere ndeke omughulhu bali okwa mihindano yabu? Busana naki thukatsomana emyambalire n’emiyipambire yethu?

Thukakanganaya ku thusikirye Nyamuhanga. Ni kwenene Nyamuhanga akasamalira omuthima. (1 Samweli 16:7) Aliriryo, omughulhu thukahindana thukamuramya, thukanza ithwakangania ku thumusikirye kandi ku thusikirye abaramya balikyethu. Thwamabya b’eryasa embere sy’omwami kutse prezidenti, ithukendi lhangira thuthi thukambalha ndeke. Kuthya, emyambalire n’emiyipambire yethu omughulhu thuli okwa mihindano bikakanganaya ku thusikirye ‘Omwami w’ebihanda,’ Yehova Nyamuhanga, naha thukamuramiraya.—Yeremia 10:7.

Thukakanganaya ku thukaghendera okwa bya thukigha. E Biblia yikabugha yithi Abakrisitayo batholere ibambalha esyongyimba ‘esitholere n’eriyitheya.’ (1 Timoteo 2:9, 10) Eryambalha esyongyimba ‘esitholere’ kikamanyisaya erithendyambalha esyongyimba esyangaleka abandu ibathuthungerera kutsibu, esithwamakirire, kutse esikakanganaya ebitsuku ebithatholere erilhangirwa. Kandi ‘eriyitheya’ nalyo likathuwathikaya erisombolha esyongyimba esyuwene. Nomwabine, emisingyi eyi siyirithukakiraya eriyithwiramu ngoku thwang’ambalha. Ithwe erilhangirika ndeke lyangan’uwania “erikangirirya ly’Omulhamya wethu” ‘n’eripipa Nyamuhanga.’ (Tito 2:10; 1 Petero 2:12) Eryambalha ndeke thukaghenda okwa mihindano likaleka abandu ibakania ndeke okw’iramya lyethu.

Olhukimba silhuleke wukathendi hindana nethu. Isi walengekanaya wuthi esyongyimba esitholere sy’esy’obughuli. Ekikulhu ly’eribya n’olhuhenirye kandi ilhunalhandikene.

• Busana naki ni kikulhu eryambalha ndeke thukaramya Nyamuhanga?

• Ni misingyi yahi eyikathusondolha thukathwamu ngoku thwanga mbalha n’eriyipamba