Ekithunga kyethu kikahulhukaya n’erighaba esyo Biblia nyingyi kutsibu n’ebindi bitabu obuli mwaka butsir’ighulya. Thukahimba n’erisugha Ebisenge by’Obwami n’esyo Beteli. Esyongumi n’esyongumi sy’abanya Beteli n’abamisani bakahebawa obuwathikya, kandi ithwawathikya abakawa kw’ebitsinduli. Neryo wangana yibulya, ‘Esyosente esyosi esi sikalhuahi?’

Sithuli thuha ekighuma ky’ikumi kutse erilhabya akibo. Nomwakine indi omubiiri wethu ow’erithulira akayithaghisaya esyosente nyingyi, sithuli sabiriraya esyosente. Emyaka eyilhabire omu 100 enyuma, Akaleberyo akakabiri erihulhuka mukabugha kathi thukyasi ngoku Yehova yukathusighika kandi yithi “sithwendi syasabirirya abandu erithusighika.”—kandi kwa bine bithya!—Matayo 10:8.

Emibiiri yethu yikasighikawa n’abakahayo ahathe erikakwa. Abandu bangyi bakatsemera omubiiri wethu ow’eryeghesya abandu be Biblia neryo ibahayo ekya banga thoka. Abema ibobene-bene bakahayo endambi yabu, akaghalha, esyosente, n’ebindi ebya bawitheko erisighika erisonda lya Nyamuhanga omwa kihugho kyosi. (1 Emyatsi y’Emigulu 29:9) Omwa Bisenge by’Obwami n’okwa mihindano yethu eminene-minene kukabya obusanduko obw’erithogheryamu ok’oyukanza erihayo. Kutse iwangana hayo erilhabira okwa muthahulha wethu owe jw.org. Erithwalira haghuma, abakahayo si bugh’indi ni baghuda, bali ng’omukwakali omwera oyo Yesu akanayako ndeke oyuwahayo esente ibiri. (Luka 21:1-4) Busana n’ekyo omundu wosi-wosi anganabya “akabika kihande” erihayo “ngoku abiriyisogha omwa muthima wiwe.”—1 Abanya Korinto 16:2; 2 Abanya Korinto 9:7.

Thuyikethere ngoku Yehova akendi lholha embere erileka abandu banze ‘erimusikya omwa busoki bwabu’ kutse ebya bawitheko erisighika omubiiri w’Obwami, nuku erisonda liwe likolhawe.—Emisyo 3:9.

• Ni kyahi ekikaleka ekithunga kyethu ikyabya ky’embaghane okwa wandi madini?

• Ebikahebawayo bikakolesibawa bithi?