Ekinywe “omutemburi” mughulhu mungyi kikakolesibawa okwa bandu abakatsuka erihika omwa bulhambu neryo abandi ibakwamako. Yesu mwakolha ng’omutemburi omughulhu athumawa okwa kihugho erisyathulha omwatsi owa kaha engebe n’eribya iyuwamatsuka erikyungulha enzira y’omulhamu. (Matayo 20:28) Munabwire abamukwamire bakamugherereraya omw’ikolesya buthuku bungyi ngoku banga thoka ‘bakayira abigha.’ (Matayo 28:19, 20) Abandi babir’ingira omwa mubiiri owathukahulha mw’omubiiri w’obutemburi.

Omutemburi y’omundu oyukathulira mughulhu wosi. Abema ba Yehova abosi ni bathuliri b’engulhu yuwene. Aliriryo, abandi babirithwamu erikolha ng’abatemburi b’omughulhu wosi. Bakaghunza esyosaha 70 omw’ithulira obuli kwezi. Erithoka erikolha eki, abangyi bakathwamu erikolha emibiiri eyithe bayithagha mughulhu wosi. Abandi babirithwamu erikolha ng’abatemburi ab’embaghane omwa bitsweka ebiri mw’obuyithawa bunene obw’abathuliri. Bakaghunza esyosaha 130 kutse esilhabire okw’aho omw’ithulira obuli kwezi. Abatemburi bakatsemera ebike ebya bawithe kandi ibanayikethere ngoku Yehova akendi baha ebya bakayithagha. (Matayo 6:31-33; 1 Timoteo 6:6-8) Abathe bangathoka obutemburi obw’omughulhu wosi bangana kolha ng’abatemburi abawathikya bamathoka. Nabo bakaghunza esyosaha 30 kutse 50 omw’ithulira obuli kwezi.

Eryanza Nyamuhanga n’abandu ly’erikaha omutemburi y’omuhwa. Nga Yesu, nethu thukalhangira ngoku abandu bali nabi bunyakirimu munabwire. (Mariko 6:34) Aliriryo thwabiri’gha ebyanga bawathikya lino, ebyanga baha amaha awaghumire. Eryanza abandu likaleka omutemburi iniakolesya endambi n’akaghalha kiwe eriwathikya abandi bunyakirimu. (Matayo 22:39; 1 Abanya Tesalonika 2:8) Erighunzerera, erikirirya liwe likaghuma, iniayithunda hakuhi na Nyamuhanga n’eribana etseme nene.—Emibiri 20:35.

• Wangabugha wuthi omutemburi nindi?

• Ni kyahi ekikaleka abandi ibakolha obutemburi obw’omughulhu wosi?