Busana naki abandu aba batsemire? Bali okwa lhuhindano lhwethu olhunene. Ng’abaghombe ba Nyamuhanga abakera, abalhaghirawa erihindana omwa bungyi mirundi isathu obuli mwaka, nethu thukahindana thuthya omwa bungyi. (Eryibuka Ebihano 16:16) Obuli mwaka, thuwithe emihindano minene-minene isathu: emihindano y’omuthimbo ibiri ey’ekiro kighuma-kighuma, n’olhuhindano lhw’erijoni olhw’ebiro bisathu. Thukaghasirawa thuthi omwa mihindano eyi?

Yikaghumaya obughuma bwethu obw’Ekikrisitayo. Ngoku kyanatsemesaya Abaisraeli eripipira Yehova ‘y’omwa syondeko,’ nethu kikathutsemesaya erimuramirya okwa mihindano minene-minene. (Esyonyimbo 26:12; 111:1) Emihindano eyi yikathuha akaghisa ak’eribya haghuma n’Abema ab’omwa bindi bithunga kutse abakalhua omwa bindi bihugho. Omw’ithungyi, thukalya ithune haghuma, neryo ikyaleka ithwongera eritsemera haghuma okwa mihindano eyi. (Emibiri 2:42) Okwa mihindano eyi, thukayilhangirira olhwanzo olhukaleka ‘abalikyethu Abakrisitayo’ ibabya bughuma omwa kihugho kyosi.—1 Petero 2:17.

Yikathuwathikaya erikulha-kulhana bunyakirimu. Kandi Abaisraeli mubaghasirwa busana ‘n’eriminya ebinywe’ by’Amasako ebya kanibawa. (Nehemia 8:8, 12) Nethu thukatsemera erikangiriribwa eriseghemere okwa Biblia erikabya okwa mihindano eyi. Obuli lhuhindano lhukabya ilhunawithe omuthwe owaseghemere okwa Masako. Erilhabira omwa mikania thethethe n’eby’erilhangirirako, thuk’igha ngoku thwanga kolha erisonda lya Nyamuhanga. Kikathuhimba thukowa ebyalholirweko eby’abandu ababirithoka erighumira ebitsibu ebikasa busana n’eribya Bakristayo omwa biro ebikalire bino. Emisathu eyikabya okwa lhuhindano olhw’erijoni, yikaleka ithwayitheghererya ndeke emyatsi ye Biblia kandi yikathukangiriraya emyatsi ey’omughaso. Okwa buli lhuhindano, ababiriyihayo oku Nyamuhanga bakabatizibawa.

• Busana naki emihindano minene-minene ni buthuku bw’etseme?

• Wanga ghasirwa wuthi wamahindana okwa lhuhindano lhunene?