Yesu mwabwira abakwenda biwe athi: “Muleke ekyakakalha kyenyu kikoleraye kithya embere sy’abandu, balhangire emibiri yenyu mibuya, bapipe Thatha wenyu oyuli elhubulha.” (Matayo 5:16) Kyakikaleka ithwakolesya etekinologia, nge Intaneti. Omuthahulha wethu owa jw.org, wathukakolesaya erikangania emyatsi eyihambire okwa syonyikirirya n’emibiiri y’Abema ba Yehova. Kukabya myatsiki?

Ebya e Biblia yikasubiraya okwa bibulyo ebikabera eribulibwa. Wangana bana kw’eby’erisubirya okwa bibulyo bikulhu-bikulhu ebya bandu bakabulhaya. Ng’eky’erileberyako, etrakit eya Eriaghalhwa Linemwendi Syahwaho? n’eya Kwenene Abaholi Bangana Thasyabyaho? siri omwa mibughe eyilhabire omu 600 okwa muthahulha oyu. Kandi kune e Biblia eya New World Translation omwa mibughe eyilhabire omu 130 n’ebitabu bingyi ebiseghemere okwa Biblia, imwamuli ekitabu E Biblia Yanga Thukangiriryaki? n’esyogazeti esya lino-lino esya Akaleberyo na Awake! Emyatsi mingyi wangana somera yoko kutse erihulikirirayo kutse iwakimyayo omwa mulenge, kutse ng’ebihandiko. Nibya wangana lhusya kw’emyatsi mike eya wangaha omundu oyukanzisibawa! N’emyatsi busana n’abatsiha yineko omwa syovidiyo. Wangana lhusyako obusomi bwe Biblia, emisathu eye Biblia, n’esyonyimbo esyuwene esya wanga hulikirira iwunathekene.

Ebihambire okwa Bema ba Yehova. Kandi wangana banako amakuru n’esyovidiyo esikakanganaya omubiiri wethu ow’ekihugho kyosi, emyatsi eyikahamba okwa Bema ba Yehova, kandi ngoku thukawathikaya abakawa kw’ebitsinduli. Wanganabanako emyatsi eyihambire okwa mihindano minene-minene eyikayabya n’esyongangirira esy’ebyaghanda byethu eby’omuthahulha.

Omw’ikolesya esyonzira esi, thukahikaya ekyakakalha ky’ekwenene omwa myanya eyiri haali omwa kihugho. Abandu omwa kihugho kyosi bane mughasirwa, imwamuli n’abali omwa Antarctica. Thukasaba thuthi “ekinywe kya Nyamuhanga kitsungane lhuba” omwa kihugho kyosi, busana n’eriha Nyamuhanga y’olhukengerwa.—2 Abanya Tesalonika 3:1.

• E jw.org yinemuwathikya yithi abandu bangyi eriminya ekwenene ye Biblia?

• Ni byahi ebya wanzire iwasekulya okwa Muthahulha wethu?